ياريتني

الحلقة1

في بيروت....
عبدالله بعصبية: هالبنت هاذي مش عارف كيف بنتصرف معاها....قالتلي ال 10 نكون في الحوش وشوفي الساعة كم توا 😡 قربت ع ال 12 ...
نجاح: معليش ياخوي الغايب عذره معاه...وبعدين تبي الحق أني من الاول ماكنتش راضية عليها المشية...
عبدالله: ماهو قتلك يانجاح بري معاها انتي سكرتي راسك 😪
نجاح: وين بنمشي؟! حفلة عيد ميلاد وكلهم صغار...شن ندير مادة وجهي معاهم 😓
عبدالله تنهد: خليها تجي وساهل تو نعرف كيف نتفاهم معاها... 😡
نجاح: خليك حازم معاها مش زي كل مرة تزلبحك بكلمتين 😒
عبدالله: تي مش هكي القصة...بس هالبنت نقطة ضعفي مانقدرش نكون قاسي معاها...ساد انحرمت من أمها وهي صغيرة مانبيش نزيدها 😪
نجاح: ماقلنا شي...لكن لو ماكنتش أقسي من هكي معاها البنت حضيع منا ياعبد الله..
عبد الله تنهد: شكله رجوعنا لليبيا أمر لابد منه😪
نجاح: ياريت نرجعو ياريت...ع الاقل لجين غاديكا ماتخافش عليها...اما اهني عاداتهم غير عاداتنا...وطبعهم غير طبعنا
عبد الله: المشكلة أشغالي اهني هلبا وصعب بين يوم وليلة ننهي كل شي...
نجاح: خلاص خليني نرجع اني وياها....وانت الحقنا
عبد الله: مستحيل كيف نخليكم نساوين بروحكم غاديكا مستحيل.... ووقف جنب الشباك يفكر وشارد

في مكان في ليبيا وفي بيت أقل من عادي...جدرانه وسكانه أرهقهم الزمن...
علاء رفع بوه المقعد من علي كرسيه وحطه في فراشه...
ابو علاء: ربي يحميك ياولدي ويوفقك...
علاء : يارب يابوي...تصبح علي خير😊....اطفي الضي وطلع
ألاء: هيا علاء تعالا حل معايا واجب الرياضيات بنرقد 😣
علاء: اصبري نحطلكم تتعشو قبل..
ضياء: شن العشي؟!
علاء: مكرونه حارة علي كيف كيفكم😉
ضياء: فيها لحم😒
علاء: غدوة بنبدا في الخدمة الجديدة...كان حصلت فلوس ناخدلكم لحم...اليوم مشوها
ضياء: اوووووف عيينا من المكرونة وعيينا ناكلو في اللحم
كان في الاعراس...اني مانبيش تصبحو علي خير ...😏
علاء: 😩
الاء: أني نبي علاء صبلي 😊
علاء ابتسم: اوكي..😊
حط العشي وتعشا هو وأخته....وبعد ماكمل حل معاها واجب الرياضيات وخشت للدار مع بوها رقدت...
قام علاء صفرة العشي...خدي سطل كالعادة و عباه من شيشمة الجنان...علي خاطر أنابيب المطبخ مسكرات ويبو خدمة...
غسل الماعين وضم المطبخ....امشي للمربوعة خدي فراشه من ورا الباب فرشه وتغطا....وكيف غمض عيونه
ضياء: لامتي بنقعدو في هالفقر...امتي بنعيشو زينا زي كل هالناس..
فتح علاء عيونه: انت قاعد نايض ؟!
ضياء: كيف تبيني نرقد...الجو سخون والناموس قطعني 😒
علاء: وشن الجديد يعني...هاذا حالنا كل ليلة وترقد عادي
ضياء تنهد: عييت 😣
علاء: تصبح علي خير... وماتنساش اذكار النوم وسورة الملك

عائلة بطلنا..." بطلنا علاء 26 . سيب قرايته من وقت عمره 15 بعد حادث فظيع صار لامه وبوه...خطف منهم الام وتركلهم أب مقعد ومشلول...كل مرة يشتغل في حاجة عشان يقدر يصرف علي خوته وبوه

اخته الاء عمرها 13 تقرا ثالثة إعدادي...كانت مع أهلها في الحادث وقتها كان عمرها شهر بس.. نجت من الحادث بأعجوبة بس فقدت وحدة من إيديها بعد ماكانت بين الحياة والموت في المستشفي لمدة شهرين تقريبا..