مع المغرب...
فرش علاء في الجنان وطلع بوه معاهم....ولع الشواية ويجهز في اللحم بمساعدة الاء...
ابو علاء: قولي ياعلاء...شن الخدمة الجديدة اللي حصلتها..
علاء يمروح ع الجمر: سواق لعيلة يابوي..شكله حالتهم كويسة...شافني الراجل في المطعم وطلب مني نشتغل معاهم
ابوعلاء: ليبين؟!
علاء: اي...بس شكلهم كانو عايشين برا ليبيا
ابوعلاء: علي خير ياولدي...غير رد بالك
علاء: ان شاء الله يابوي ماتخافش تربياتك أني....وافرحي ياابلة الاء بيعطوني سيارة
الاء: حي جديات 😀
علاء: اي...مرة مرة نستأذن من صاحب الشغل وندهورك وتفرهدي 😉
الاء: ياسلام....👏👏
ضياء فتح باب الحوش: اووووو شوايات شن هالدلع 😱
ابوعلاء: وين ادور...من الصبح ماشفتكش 😡
ضياء: كنت عند صاحبي نقرو...عندنا امتحان الاسبوع الجاي
ابوعلاء: 😏 تو نشوفو أخرة هالقراية
ضياء قرب بحماس: هيا شن مازال ماحطيتو شي😋
علاء: خلي يسخن الجمر قبل
ضياء خدي منه المروحة: هات عليك هات 😃
علاء: الدجاج خليه لاختك عارفها ماتحبش اللحم 😒
ضياء: اهو هلبا تاكل هالمنتفة لين تعرفه دجاج 😏
نجاح تشرب في القهوة مع خوها في مكتبه: لامتي بتقعد مخاصمها هكي...قريب تنجن البنت وتقول بابا معاش يحبني
عبدالله: مازال خليها...نبي نعاقبها...عشان تفكر مية مرة قبل ماتتصرف غلط مرة ثانية...عمري ماحرمتها من حاجة ولا عمري رفضتلها طلب...بس شكلي بالغت لين معاش قدرتها...
نجاح: اوكي اللي تشوفه... وهالسواق الجديد تعرفه من قبل؟! وشن قصته ؟!
عبدالله: لا والله...تعرفت عليه في المطعم كان تذكري اللي الحقني للسيارة
نجاح: معقولة تخلي بنتك معاه.الله أعلم شن نيته وشن أخلاقه؟!
عبدالله: بالعكس تعرفي مطمنله بطريقة مش عادية مش عارف ليش
نجاح: بنتك اصغيرة ياعبدالله وتربت ع الدلع رد بالك
عبدالله: ماتخافيش صح لجين اصغيرة ومش قد المسؤولية بس مستحيل إدير حاجة توطي راسي...كله طيش ومراهقة بنات...تبي شوي مراقبة..
في غرفة لجين ..
كالعادة تكلم في لؤي ع التليفون: باه شن بنقول لبابا😓
لؤي: انتي مش غدوة بتبدي مع السواق الجديد...قوليله بجيبك للعنوان اللي قتلك عليه. والمواد حنبعت حد ينزلهولك
لجين: قصدك غدوة بنتزوجو...،😓
لؤي: اي ياقلبي غدوة بتكوني مرتي 😍
لجين: بس مانقدرش نتأخر لؤي 😓
لؤي: عادي قولي ان الكلية زحمة وتنزيل المواد ياخد وقت
لجين: كتير خايفة لؤي 😪
لؤي: مادام أني معاك ماتخافي من شي...أني مرتب للموضوع كله..😙
لجين تنهدت بحيرة: اوكي..
لؤي: خلاص ارقدي ياعروسة وارتاحي...غدوة وراك نهار متعب 😉
بلعت لجين ريقها بخوف: تصبح علي خير😪
لؤي: وإنتي بخير ياعمري 😙 ماتنسيش تجيبي جواز سفرك كإثبات هوية
عند علاء....
حطو أول طرحة لحم بأشراف ضياء طبعا اللي استحوذ ع الشواية...علاء قعمز يقرض في السلاطة والاء تجهز في الصواني ....
طق الباب..هيثم: علاء ياعلاء
علاء: هي لحظة بس جايك....حطلي شوايات ترا ضياء
ضياء: تي مايسدش ياراجل 😨 لمن بتعطي😒
علاء: تي حط شويا يابخيل😏....وخدي منه علاء كم طرف في صونية وحط معاهم سلايط مع شيشة مشروب كبيرة وطلع....: هاك هيثم أعطيهم للصغار
هيثم: علاش متعب روحك والله مافي داعي
علاء: لا تعب ولاغيره هاذي حصتهم حسبتهم فيها
هيثم: بارك الله فيك
علاء: خش كسد معانا شويا
هيثم: لا والله صحيت بنروح نرتاح نحس في روحي مدقدق
علاء: اوكي تصبح علي خير
كملو الشواء...قعمزو يتعشو ويهدرزو وسط ضحكات ومشاكسات الاء لعلاء..وضياء اللي نازل في اللحم بشراهة 😁
ضم علاء الحوسة بمساعدة الاء....صلي العشي وقعمز يقرا في ورده اليومي من القرآن...
ارتمي ضياء ع الفراش بتخمة: آآآه شوايات علي أصولهم
سكر علاء المصحف: صحتين... اي حقا نسيت...حط إيده في جيبه وطلع مبلغ عطاه لضياء
ضياء بفرحة: تي شنو الدلع هاذا😍...وعدهم...100 دينار بس 😏
علاء: ماتعرفش تقول الحمد لله بكل 😒..اشري بيهم شن ناقصك ومشي بيهم أمورك
ضياء : مع إنهم مايديرو شي لكن يلا خير من بلاش...
علاء مد فراشه : غدوة الصبح كلمت عامل السباكة عشان المطبخ..اوقف عليهم أني مانقدرش نسيب الشغل
ضياء يتاوب: يصير خير
علاء امتد غمض عيونه وهو يردد في أذكار النوم...وامشي في سابع حلمة
######################
أنت تقرأ
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
