ياريتني

الحلقة30

لجين بخوف: علاء شن في؟
علاء انتبه: نعم؟
لجين: خيرك مصدوم
علاء: لا شي....غير شفت حالة مرت  قدامي ووجعتني
لجين بعدم تصديق: اوكي....
علاء: احم احم...قعمزي اهني....نمشي نجيب حاجة ناكلوها...
لجين: باه ننزل معاك عشان نعرف نتفاهم معاهم...
علاء: مافيش داعي...تو نمشي أموري...قعمزي انتي ماتقعديش واقفة باهي..
لجين: باه....
نزل علاء بسرعة وقف  قدام باب المصحة شاف يمينه ويساره كأنه يدور علي حد: زعما نتخايل والا فعلا 😕... لمح عربة  لبيع المأكولات السريعة امشي ناحيتها.....
طلعت الاء من الكشف: وين علاء؟!
لجين: امشي بيجيب حاجة ناكلوها...هاشن صار معاك؟
الاء: مانعرفش...مافهمتش ولا كلمة 😂
الدكتور "بالالماني":لقد أخدنا القياسات وقمنا بالفحوصات اللازمة...
لجين " بالالماني": ومتي موعد التركيب
الدكتور ضحك: ههههههه لا تستعجلي مازال الوقت مبكرا علي التركيب
لجين: 😁
علاء لمحها من بعيد قرب منهم وفنص فيها تفنيصة قريب قسمتها نصين....
علاء: شن كملتو ضحك؟ 😒
لجين: 😓
الدكتور: تستطيعي أن تمري علي الاستعلامات لكي تأخدي تاريخ الزيارة القادمة
لجين: حاضر
الدكتور مع ابتسامة: أستأذنكم
الاء: علوش شن جبتلنا ؟
علاء: مانعرفش لقيته يبيعو فيه جبته شكله زي الشاورما
لجين: حي عليك يمكن لحم خنزير 😨
علاء: شنو 😱
لجين: اي يبيعو فيه اهني مفروض سألته
علاء: تي شن عرفني....خلاص بلاش منه..وحاجة فيها لحم فكونا منها...
لجين: جيعانة 😣
علاء: تو نطلبو من الفندق أضمن هيا...
~~~~~~~~~~~~~~~~~~~~~~~
رجعو للفندق....طلبو الغدي وقعمزو يتغدو....
لجين مدت إيدها بتاخد طاسة فيها عصير ع الطاولة...
علاء نحاها: لا ماتشربيش مصقع...بتشربي خودي حاجة دافية
لجين: مافيش عصير دافيء 😒
علاء: خلاص مافيش داعي تاخدي عصير 😒
  لجين: اوووف 😒
علاء: اي حقا شن قال الدكتور بكري؟
لجين: قاا انهم خدو القياسات ودارو الفحوصات اللازمة
علاء: وباه امتي التركيب
لجين: قال مازال
الاء:مش عارفة كيف بنتحرك بيها...تعودت علي إيد وحدة😓...
لجين: ماتخافيش حبيبتي حيديرولك علاج طبيعي بعد التركيب ويتابعو معاك لين تتعودي عليها
الاء: معناها بنطولو اهني ؟
علاء: قالو ع الاقل شهرين...
الاء: باه والمدرسة كيف يصير فيها؟
علاء: ماتخافيش شرحتلهم الوضع وتفهمو بيدخلوك ع الامتحانات النهائية
لجين: وأني كليتي كيف يصير فيها 😣
علاء: حليت الموضوع ووقفت قيدك ...قلتلهم حامل وماتقدرش اداوم حاليا😁
لجين تحشمت ووجها اتحمرط...
الاء: 😂😂
علاء:😂
قرب منهم النادل: هل تريدون شيء أخر سيدتي 
  لجين: لا شكرا جزيلا لك..
علاء بعصبية: لجين😡
لجين: نعم😓
علاء: كيف تتكلمي معاه واني قاعد شن طرطور...
لجين: باه تكلم انت معاه أسفة 😒
علاء: أ..أ....طبعا مش حيقدر لانه مايفهمش ألماني 😁...خلاص خلاص...هيا نوضو بنركبو للدار...ووقف
لجين والاء: 😂
علاء: تي هيا 😡
~~~~~~~~~~~~~~~~~~~~~~
خشت لجين بتاخد دوش سريع...اما الاء لانها نايضة بدري خداها النوم ورقدت.....
طلعت لجين من الدوش ....فتحت الدولاب ادور في اللاب توب: وينه الصبح حطيته اهني 😕...زعما خداه علاء....خلي نمشي نشوفه....
لفت وشاحها ...فتحت الباب شافت يمين ويسار...مافيش حد طلعت بسرعة وطقت علي غرفة علاء....
علاء فتح الباب....واستغرب لما شاف لجين....جبدها من إيدها ودخلها: انجنيتي انتي كيف تطلعي من الدار ببيجاما 😨
لجين: مافيش حد...قلت نطلع ونرجع ع السريع
علاء: لا يامدام مرة ثانية حطي عليك عبايتك مش حتخسري شي 😡
لجين: باهي خلاص فهمت....اللاب توب عندك ؟!
علاء: اي خديته بكري كلمت هيثم ع السكايب 
لجين بطفولية: باه حتي أني نبي نكلم ربا... افتحلي النت...
علاء بخبث: مقابل شنو؟!
لجين ارتبكت وخشت بعضها: خلاص معاش نبيه
علاء مسكها من إيدها: تي غير تعالي اهني...علاش ديما فاهمتيني صح 😉
لجين وجها اتحمرط: علاء 😣
علاء: هههههه... باه تعالي نفتحلك النت وبنمشي ناخد دوش....ماتطلعيش من الدار بالمنظر هاذا راه...بعد نطلع نمشي نجيبلك عبايتك
لجين: باه....افتحه هيا.....
فتحولها علاء وخش يدوش....
ربا صرخت: لووووووجي 😱 ياضرسانة وينك ؟ اشتئتلك 😂
لجين: بري ياقردة....والله لما نوريك غير نروح باهي 😒
ربا:😂... انا صرت بلبنان مافيكي توصلليلي
لجين شهقت: قصدك سافرتي
ربا: اي اليوم وصلت...
لجين: خسارة 😩
ربا: ولايهمك...بس بتزوج انا وضياء رح تملي مني
لجين: كيف حال عمتو...وعمي ابوعلاء
ربا: كلن مناح... وعمتو وصتني لو فتحتي النت احكي معها ضروري
لجين: اوكي تو نكلمها بعدك
ربا: ها احكيلي كيف اجواء برلين معك 😉
لجين: عادي 😒
ربا؛ كيف عادي يابنت... شو مجنونة انتي...استغلي الفرصة وقضو شهر عسل حلو 😉
لجين: أصلا كل واحد يرقد في دار
ربا: 😱 شو؟
لجين: اي هكي أحسن 😒
ربا: شو أحسن يامجنونة 😨... شو حكت معك عمتو وشو فهمتك لوجي..
لجين: مازال شويا ربا 😣
ربا: اي خليكي هيك...لحتي تاخدو منك شي ألمانية حلوة😒... وبعدين تعي اشكي وتبكبكي
لجين: عارفته علاء مايديرهاش 😌...كان تشوفي كيف خايف عليا..و يغار عليا...يووهبل في حنيته عليا ياربا
ربا: اي معناها بيحبك ياحمارة 😒
لجين سرحت شويا: شكله هكي
ربا: خلاص معناها بيكفي زعل وارحميه للرجال...
لجين بتفكير: امممممم نشوف
فتح علاء باب التواليت وطلع لاف فوطة علي وسطه....
ربا عيطت بصوت عالي وحطت ايديها علي عيونها: يييييييي ياذلي ياذلي🙈
علاء سكر اللاب بسرعة: مازال ما كملتوش...نحسابك كملتي 😓
لجين وقفت : علاء علاش سكرته....وسكتت لما شافت منظره وارتبكت
علاء وقف مقابلها: اخي منظري هكي قدام البنت...وبعدين شن انتي ماتغاريش عليا زي مانغار عليك 😉
لجين تحاول تبان عادية : لا....
علاء: حرام عليك معقولة....توا كيف كنتي تشكري فيا لربا 😁
لجين ارتبكت معناها سمع الحديث...
علاء: انتم صوتكم عالي شن بندير😉
لجين: باه نحي من قدامي بنمشي لاء
علاء: الاء راقدة في سابع حلمة....خليك شويا نهدرزو 😉
لجين خشت بعضها: لا...لا بنمشي...
علاء: 😂... باهي استني نغير ونمشي نجيبلك عبايتك...
لبس علاء حوايجه وخدي المفاتيح من لجين وامشي جاب عبايتها من الدار
لبستها لجين وكيف بتطلع...حطت إيدها علي يد الباب ....مسك علاء إيدها وباسها: تعرفي علاش نغار عليك؟ لانك انتي متاعتي أني وبس...
لجين ابتسمت بخجل: نحي بنمشي...
علاء: حرام عليك...ارحميني ع قولة ربا 😉لجين فتحت الباب بسرعة وطلعت.....
~~~~~~~~~~~~~~~~~~~~~~~ 
خلينا نرجعو لأرض الوطن شويا.......
في ليبيا
ام هيثم ماشية تغير في جو عند وحدة من بناتها...هيثم في الصالة هو ونجاح....أيهم يحل في واجبه...اما ردينة تتفرج ع طيور الجنة ومنسجمة...
هيثم: نجوحة خيرك؟!
نجاح:مشغولة علي لجين...خايفة من تصرفاتها الطائشة تخسر راجلها
هيثم: لا لا ماتخافيش..علاء مش حيفرط فيها...لانه بدا يتعلق فيها حتي هوا
نجاح: زعما؟!
هيثم: أكيد...صاحبي ونعرفه
نجاح: باه وربيعة نساها
هيثم: نجوحة صعب الواحد ينسي اول حب....بس في حب يعوض عن حب...المشكلة اللي خايفة منها توا...هي.....تنهد وسكت
نجاح: مشكلة شنو؟!
هيثم: ربيعة اطلقت
نجاح: جد 😨
هيثم: اي الكلام ليه إسبوع تقريبا..بس علاء ماعنداش علم
نجاح: وشن السبب؟
هيثم: والله مانعرف 
نجاح:  ياعليك بخت عندها بنت خوي...يعني بعد راجلها بدا يحبها تتطلق خطيبته الاولي 😪
هيثم: ومن قالك حتي لو علاء عرف بيرجعلها...
نجاح: مانعرفش...بس انت قلتها بروحك الحب الاول ماينتساش
هيثم: لا لا علاء عقله كبير ومستحيل يجرح لجين من جديد...متأكد
نجاح بحزن: ان شاء الله
هيثم حط إيده علي بطنها: كيف حال البيبي ؟ 😉
شافتلهم ردينة بغضب وقرنت حواجبها : 😡😡
نحا هيثم إيده بسرعة: احم احم.....أيهم شن كملت واجبك
أيهم: مازال شويا بابا
هيثم: احم احم....باه
رجعت ردينة تتفرج ع التلفزيون....
هيثم خدي نقاله وبعت رسالة لنجاح: ضرتك هاذي ووووه قريب تضربنا...
نجاح ابتسمت وردت عليه بمسج : عليك ضرة تهبل...
هيثم: المهم مارديتيش عليا...كيف حال البيبي ؟
نجاح: كويس 😂
هيثم: ربي يعينه مسكين....نحس فيه بيحصل تشلبيخات باهيات  من ردينة غير يجي بس😂
نجاح: 😂😂
~~~~~~~~~~~~~~~~~~~~~~
في برلين....
نزلو الاء وعلاء ولجين....بيحضرو عرض لفيلم في حديقة الفندق....كان في شاشة كبيرة وجهاز عرض....واغلب النزلاء يحضرو فيه....
طبعا علاء في الاول رفض نهائيا بس بأصرار من الاء ولجين اقتنع خصوصا لما عرف ان الفيلم رعب ونظيف يعني مافيشي لقطات بايخة....ماحبش يكسر بخاطرهم...
نزلو اختارو أبعد مكان ع الناس....تحت شجرة بروحهم...
الاء: كيف بنشوفو من اهني 😒
علاء: تبو تقعمزو اهني باهي....كان هاذا هيا نركبو....
لجين: لا لا خلاص حتي اهني باهي..
علاء: والله ماني راضي راه....هاذا إسمه اختلاط
الاء: علاء بالله عليه فكها وفكنا من النكد
علاء: نكد عينك...هاذا كله حرام وظلال.😡.
لجين: باهي اهو مقعمزين بعاد عليهم علاء...ولبسنا محترم وواسع...
علاء: باهي خلاص قعمزو... خلي تمشي هالليلة علي خير.....
فرشو فرشة صغيرة....وقعمزو...لجين جابت معاها سلة صغيرة عبتها مكسرات وعصائر وتشيبس...ومعاها شرشف ثقيل شوي.
علاء: حايسة ع الوضع انتي عاد..😒.
لجين: 😁
شغلو الفيلم والكل يتابع باانسجام....الاء نعست حطت راسها علي فخد علاء وتتفرج....
علاء: الاء لو بترقدي... خلي نركبو
الاء: لا لا قاعدة نتفرج...
الفيلم كان يخوف فعلا....ولجين كل شويا تنخلع وتغطي في وجها....
علاء: خوافة 😂
لجين: 😛
الاء خداها النوم.....علاء: رقدت...قلتلها نركبو سكرت راسها....
لجين: خلي شويا يتم الفيلم ونركبو...
علاء يمسح علي راس اخته بحب ويساويلها في شعرها.....
لجين ابتسمت: مرات نحس فيك تعامل في الاء كأنها بنتك مش أختك...
علاء: فعلا هي بنتي.... كان عمرها شهور لما توفت أمي...وبوي بسبب اصابته ماقدرش يهتم بيها....أني تكفلت بيها....نغير ونلبس ونحمم لين شدت روحها...  ومع إصابتها هاذي كان الموضوع صعب عليا الحق...اشتغلت ليل ونهار عشان ماتنقصها حاجة لا هيا ولاضياء....والحمد لله بالرغم من إن عشنا ايام صعبة لكن ربي فرجها....
لجين بحب: انت عانيت هلبا في حياتك صح؟
علاء: الحمد لله ع كل حال 
لجين: مرات نتحشم لما نشوف ناس زيك قداش عانو في حياتهم وكانو قراب من ربي وأني بالرغم من ان حياتي كانت وردية لكان كنت بعيدة كل البعد 😩
علاء: مادام الانسان عايش وفيه نفس...يقدر يغير كل شي لجين....ويقدر يكفر عن كل ذنوبه....المهم النية الصافية بس
شافتله لجين كويس وبعدين رمت راسها علي كتفه بحب: قداش مانحب كلامك ويطمن فيا
علاء: تحبي كلامي بس😉....
لجين ابتسمت وماردتش عليه......حاوطها علاء بإيده كويس...
لجين: علاء نسألك؟!
علاء: شنو؟!
لجين: منو شفت اليوم في المستشفي؟
علاء ارتبك : أه...ماشفت حد....علاش هالسؤال
حطت لجين عينها في عيونه وقعدت تشوفله كأنها تبي توصله انها مش مصدقاته.....
باس علاء جبينها في محاولة للتهرب منها: هيا نركبو تأخر الوقت.... وقف وقام الاء
لجين تنهدت: اوكي زي ماتبي....
حط علاء الاء في سريرها...وغطاها كويس...
لجين في سريرها: تصبح علي خير...
علاء قعمز ع طرف السرير...رجع خصلات من شعرها ورا وذنها: لامتي يالجين؟
لجين نزلت راسها وماردتش...
علاء:نبي تكون رحلة علاج وشهر عسل في نفس الوقت....خلينا ننسو اللي صار...
لجين:........
علاء: مش حنضغط عليك...فكري بشويا عليك اوكي....قرب وطبع بوسة خفيفة علي شفافها....حست لجين معاها بأنها نست كل شي وسامحاته علي صار...
همس بحب: تصبحي علي خير....وتغطي كويس ....
~~~~~~~~~~~~~~~~~~~~~~~ 
مرو 3 ايام عاديات بدون أحداث تذكر...
الصبح امشو للمصحة من جديد....عشان يكملو باقي الفحوصات لأء....
المرة هاذي خشو علاء ولجين مع الاء لغرفة الفحص...
الدكتور  ابدي ياخد في قياسات إيد الاء ويعاين فيها....عشان يقررو كيف حتكون الايد الجديدة...
علاء في جنب الاء ماسك إيدها عشان يطمنها وماتخافش...
معاهم في الغرفة ممرضة شقرا والعيون زرق والبشرة حليب....كانت طول الفحص عيونها علي علاء..ولاصقة فيه ..علاء مركز مع اخته ومش منتبه أصلا....
اما لجين كانت معاها عشرة علي عشرة وترحي عليها...
كملو الفحص وقرر الدكتور انه بعد يومين حيكون التركيب ان شاء الله.....
طلعو من المصحة وقرر علاء يتمشو شويا في شوارع برلين ويغيرو جو.....
علاء انتبه للجين اللي كانت مضايقة: لجين خيرك؟
لجين بعدم اهتمام: شي
علاء استغرب من ردة فعلها.... قعمزو ع كراسي في الحديقة يتفرجو علي بحيرة حلوة فيها بط.....امشت الاء للبحيرة بتتفرج ع البطات...
علاءمبتسم من منظر اخته اللي باين عليها مرتاحة ومش خايفة من قصة التركيب....شاف للجين من جديد لقاها قالبة وجها...
علاء: لجين شن في؟ مريضة؟! جيعانة؟! شن في؟!
لجين لفت وجها: قتلك مافي شي...
علاء: 😒....كان في عربة تبيع في الجلاطي قريبة امشي خدالهم منها...
لجين شرقت وتكح.....
علاء  قرب منها يضرب علي ظهرها بخفيف: بشويا عليك حبي بشويا
شافتله لجين وعيونها تعبو دموع من جديد....
علاء بدهشة : يابنت خيرك احكيلي...
لجين: مافيا شي قتلك 😢
قعدو تقريبا ساعة.... وبعدين رجعو للفندق....لجين بسرعة سبقتهم للدار مضايقة ...
الاء: خيرها لجين؟!
علاء: والله مانعرف... سألتها مية مرة وماردتش....
الاء: بالك اذكرت بوها...
علاء: يمكن....انتي اركبي شوفيها...لو حستيها اضايقت هلبا كلميني باهي....اني في غرفتي
الاء: اوكي تمام...
خش علاء لغرفته نحا قميصه...وكيف بيخش للتواليت....يسمع في طق الباب
فتح الباب وتفاجأ لما شاف لجين واقفة وعيونها امعبية دموع ووجها أحمر....
علاء بخوف: لجين..... وقبل مايكمل كلامه....
قعدت لجين تخبط فيه علي صدره ودموعها ينزلو: كانت حتاكلك بعيونها وانت عاجبك الوضع 😡😢
علاء باستغراب: شنو؟ تي من هيا....غير تعالي....جبدها وسكر الباب 
لجين: ست الحسن الممرضة اللي كانت لاصقة فيك وانت منسجم
علاء؛😕😕
لجين: علاء طلقني مانحبكش طلقني 😢
ابتسم علاء لما عرف ان القصة كلها غيرة....مسك لجين من خصرها وقربها ليه: تغاري عليا 😉
لجين تحاول تتخلص منه: بعد من عليا...علاء 😣
همسلها علاء في وذنها: *********
لجين وجها طماطم: علاء....
علاء بخبث: اي والا لا جاوبي
لجين: مادخلكش نحي 😒
زاد لصقها فيه لدرجة حست معاش قدرت تتنفس : جاوبي اي والا لا 😡
لجين خافت : اي...ارتحت توا....نحي بنمشي
ابتسم علاء ابتسامة خبث: بصراحة خديتي وقت هلبا للتفكير ومعاش عندي صبر.......
لجين قدرت تتخلص منه وهربت.....بس علاء وقف حاجز بينها وبين الباب
لجين: علاء....تعرف تقرب مني........نعيط ونلم عليك الناس
علاء: باه تعالي نقولك سر ...
لجين: شنو 😓
علاء: تعالي قربي بس....
لجين: ها قربت 😓
علاء ع أساس بيهمسلها في وذنها بس في لحظة قامها وهوا يضحك.....و.............خلاص برو ارقدو سادكم شفرت القناة  😂😂😂

يتبع.......
~~~~~~~~~~~~~~~~~~~~~~~