لجين بدهشة: هاذا شنو علاء؟
علاء: عشان تكوني مرتي بجد.....
لجين عيونها دمعو وارتمت في حضنه بفرح: نحبك علاء نحبك 😘
علاء تردد شويا بعدين حاوط خصرها بإيديه الزوز: عارف والله عارف.....
لجين بعدت عليه وتشوفله بحب وفرح: بجد تبيني نكون مرتك علاء 😍
علاء بحنية: ليش لا...انتي بنت طيية يالجين...صح مرات تنرفزي فيا 😒 بس داخلك نظيف...خلينا ننسو علاش تزوجنا والظروف اللي تزوجنا فيها.. ومن أول السطر نبدو
لجين ابتسمت: وانت حلم حياتي 😍ومن زمان نتمني نسمع منك هالكلام
علاء: بس نبي منك وعد لما تتضايقي مني في أي حاجة قوليلي طول....مش عارف بس مرات نحس في تصرفاتي معاك ماتعجبش فيك..
لجين: حاضر... وحتي انت نفس الشي لو ضايقك شي فيا قولي ..او حابب تنصحني بحاجة حنتقبل بدون اعتراض
علاء: خلاص البسي النقاب
لجين: لا 😒 الا هاذا... انت قلت بتخليني براحتي علاء 😣
علاء قرب وباس جبينها: ههههههه ...ربي يحفظك
فتحت ربا الباب علي غفلة حطت إيدها علي فمها تكتم شهقتها: اوووه ...سوري
علاء ارتبك : احم احم...خلي ننزل نكمل مع هيثم باقي الشوايات
ربا: اوكي 😁...وشافت للجين بخبث: شو عم يصير؟
لجين مدت إيدها لربا بفرحة: يبيني نكون مرته بجد ياربا..لبسني الدبلة شفتي
ربا بحيرة: ليش انتي شو هلأ😕
لجين: ياغبية..يعني مشاعره بدت تتحرك ناحيتي 😣
ربا: جد؟!! كثير حلو..
لجين تنهدت بحب: حاسة قلبي بيتقلع من مكانه...نحبه ياربا نحبه ونتوتر لما يقرب مني
ربا: ههههههه انتي خلصتي ع الأخر...يلا يلا تأخرنا وأنا كثير جوعانه
لجين : اوكي هيا
~~~~~~~~~~~~~~~~~~~~~~~
هيثم بشك: وين مشيت؟
علاء: وانت خيرك تقصقص 😒
هيثم: ههههه باه سكتنا 🙊
ضياء: شنو كملتو والا مازال مرتي حبيبتي بتموت من الجوع😍
علاء: تحشم علي وجهك خير مايسمعك بوك يغبرها علي راسك😒
ضياء: حتي بين الراجل ومرته بتخشو.. عجب وخلاص 😏
علاء: حتي الحشم باهي 😒
ضياء: اي خطرها ع الحشم...بنبات اهني مع مرتي راه😌
علاء: قهرتك 😒
ضياء بااعتراض: وعلاش ؟
علاء: شن عندك ماد وجهك اهني... روح مع بوك واختك واني بنبات معاهم
ضياء: وشنو انت علي راسك ريشة😒
علاء: افهم يابني أدم ...مازال ماتعتبرش مرتك رسمي...لين اديرو العرس يادمنقل
ضياء: وخيرك انت ولجين؟😏
علاء: اني ولجين قصتنا غير... من الاول مش مخططين نديرو عرس 😒
ضياء: تي شن شفتني قتلك بنتعنقها يعني ...بنبات اهني بس
علاء: قتلك روح وفكني من تكسير الراس 😡
ضياء مش عاجبه الكلام: يصير خير 😏... غير هيا وين العشي
علاء: هاك اعطيهم غاديكا... وتعالا كول اهني
ضياء: بناكل مع مرتي 😌
علاء: تاكل مع جداك... تعالا اهني خلي النساوين براحتهم..😡..مايصيرش تمد زومتك معاهم .
ضياء يتمتم: ياريتني قعدت في لبنان... جينا للتخلف اهني
علاء: كان العيب والحشم تخلف يامرحبتين بيه يااستاذ 😏
~~~~~~~~~~~~~~~~~~~~
لجين: شن جوك مع الحمل اعميمة؟
نجاح: الحمد لله... لتوا الامور تمام
وصلت الاء بوها لخوتها وهيثم ورجعت قعمزت معاهم...
ربا: ياتري ولد او بنوتة؟
نجاح: مازال بدري عشان نعرفو...
ردينة مقعمزة جنبهم ع الكراسي ومكشرة: مانبوس بنوتة اخييي 😡
لجين: علاش اللطف دودي...عشان تلعبي معاها
ردينة بعصبية:'لا لا مانبيس 😡
نجاح غمزتلهم: لا لا مانبوش... عندنا بنوتة وحدة حلوة وهي دودي
ربا فهمت عليها: اها 😁... اي دودي كتير حلوة ومابدنا بنوتة تانية
ردينة: 😌
الاء: حتي انتي لوجي جيبيلنا بنوتة حلوة هيا...نبي يكون عندي صغار خو زي الناس
لجين انحرجت: ان شاء الله حبيبتي
ربا: لاتخافي عن أريب ان شاء الله 😂
لجين نخصتها: ربا 😡
نجاح: شنو ربا..امتي حددتو العرس؟
ربا: لسا...لحتي ضياء يلاقي شغلانة ويئدر يفتح بيت..
نجاح: علي خير ان شاء الله
ربا: اصلا بابا بالبداية كان رافض تماما ضياء.. بس بعد تدخلات وضغط من ماما وافق
نجاح: تحسيها صعبة شويا...بنته تبعد عليه وخصوصا بتعيش في بلاد ثانية
ربا: اي والله مابعرف شلون رح باعد عنهم وعيش من غيرهم
لجين خنقتها العبرة: احمدي ربي ع الاقل قاعدين في هالدنيا...وامتي ماتبي تلقيهم جنبك....ياريته بابا يرجع ولو لحظة بس ومعاش نبي شي 😩
ربا: الله يرحمو 😩
لجين غطت وجها بإيديها: مشتاقتله ومحتاجتله بجد😢
نجاح عيونها دمعو: خلاص حبيبتي...ادعي ربي يرحمه ويخفف عليه.
لجين: ربي يغفرله ويرحمه يارب....😢
~~~~~~~~~~~~~~~~~~~~~~
ردينة مشت لبوها...اللي كان مقعمز بعيد مع ابوعلاء...وعلاء وضياء....
أيهم: بري قعمزي مع النساوين شن اديري اهني
ردينة: انت مادخلكس 😡... بابا نبي سواية
أيهم: بري مش عطيناكم بكري... مافيش 😒
ردينة: بابا قوله أيهومي 😢
هيثم: فكنا منها تعالي خودي وبري لعمتو نجاح...
ردينة: عمتو نجاح تبكي هي ولجين
قام علاء راسه : خيرها لجين؟
ردينة: تبكي 😢
هيثم: وعلاش يبكو...نهارك تطلعي مدايرة حاجة😡
ردينة: لا لا مس أني 😢
وقف علاء بقلق.... خدي تليفونه واتصل بلجين...
لجين مسحت دموعها وردت ع الاتصال: ايوه علاء
علاء: خيره صوتك؟
لجين: عادي خيره....
علاء: باه تعالي نبيك جنب اسطبل الخيل
لجين: اوكي...لحظة ونجيك
وقف علاء يتأمل في الخيل...التفت لما سمع صوت خطوات وراه وابتسم لما شاف لجين....
لجين: نعم...
مد علاء إيده: تعالي....
مدت إيدها بفرح ووقفت جنبه يتفرجو ع الخيل...
علاء تنهد: تصدقي حتي أني استاحشته
لجين بااستغراب: منو؟!
علاء: عمي عبدالله..
لجين دمعت: مش مصدقة انه فعلا مات....نحس في روحي نحلم وفي يوم حنشوفه
حط إيده علي كتفها بحب: ادعيله بالرحمة لجين... وماتبكيش
لجين: غصبا عني...😢
علاء: تعرفي فكرت قداش احني مقصرين معاه...
لجين: مافهمتش؟!
علاء: عمي عبدالله سيب فلوس واملاك ماشاء الله مفروض نصدقو عليه ع الاقل يتونس في قبره...وربي يخفف عليه ذنوبه
لجين: قصدك الصدقات يوصلوله؟
علاء ابتسم: أكيد...الصدقة والدعاء الوحيدة اللي توصل للميت من أهله... يقولو يجيه الدعاء في طبق من نور وينادو عليه ويقولوله هاذا من ولدك او بنتك ويقعد فرحان بيهم...
لجين: الله ياعلاء قداش ريحتني...يعني نقدر نتواصل مع بابا
علاء: أكيد
لجين نزلت راسها بخجل: أتاري قداش مااني جاهلة في أمور ديني...وشافت لعلاء بحماس: علاء نبي نعرف كل شي ع الدين ونبي نقرب من ربي اكثر واكثر
ابتسم علاء: حاضر... بس أهم شي تقتنعي من داخلك
لجين: مقتنعة وندمانة علي كل يوم فرطت في علاقتي بربي...ياريتني تلاقيت معاك من زمان ياعلاء
علاء : تعرفي انك مرة علي مرة تكبري في عيني
لجين بخجل: وحتي انت مرة علي مرة نزيد نحبك...
ضمها علاء لحضنه بحنان: ربي يباركلي فيك
غمضت لجين عيونها براحة وهي حاسة بمشاعر علاء اللي تغيرت بشكل كبير معاها...وواضح
~~~~~~~~~~~~~~~~~~~~~~~
بعد سهرية حلوة تجمعو فيها الاحباب والاصحاب....روح ضياء وهو يغلي مع بوه وأخته...
وهيثم خدي عيلته وروح هو الثاني...
اما علاء قعد مع لجين وربا في حوش عبدالله....
ربا ولجين في المطبخ....
ربا: وينو علاء؟
لجين: في مكتب بابا
ربا:رح ينام هونيك
لجين: ممكن
ربا: مجنونة انتي 😨 كيف بتخليه ينام بعيد عنك
لجين: ياقردة وين تبيه يبات...في داري مثلا...
ربا: وليش لا؟
لجين: وانتي!!
ربا: 😁 أني لاتحملو همي.. اهم شي تكونو مع بعض 😉
لجين: بلا سخافة زايدة 😒... قتلك كل شي يجي بشويا
ربا: حكي فاضي... لازم تستعملي ذكاءك مشان تخليه يأرب اكثر واكثر منك.... مو لازم تعطيه فرصة لحتي يغير رأيو
لجين: يغير رأيه في شنو؟
ربا: في كل شي يامجنونة...علاء الباين انه عم يصارع مشاعره ولسا خايف.. والتقارب الجسدي بينكم رح يخلي مشاعرو تكون واضحة اكثر...
لجين: لا لا مانبيش نخاطر... وفي نفس الوقت مانبيش نكون وقحة وجريئة شن تبيه يقول عليا...😓
ربا: انتي بس ارمي الصنارة واتركي كل شي إلو 😁
لجين: كيف🙈
ربا: تعي لحتي فهمك...😁
~~~~~~~~~~~~~~~~~~~~~~~~
علاء كان يراجع في ورق بعثهم ليه محامي عبدالله فيهم بعض المعلومات علي املاكه وحركة حساباته....
طقت لجين ع الباب: فاضي؟!
علاء: تعالي...قاعدة مارقدتيش
قعمزت لجين: مش جايني نوم
علاء:عندك كلية غدوة؟!
لجين: لا لا غدوة راحات
علاء: باه كويس ترقدي براحتك ياكسولة
لجين: نحب النوم 😁
علاء: قتلك كسولة 😁
لجين بتردد: انت بترقد اهني؟
علاء: اي جيبيلي شرشف بعدين وتو نرقد ع الكنبة
لجين: بس صقع اهني...
ابتسم علاء: تعرفي أحلي حاجة فيك حنيتك...
رجعت لجين خصلات من شعرها ورا وذنها بتوتر:ارقد فوق في داري...نخاف نرقد بروحي
علاء بااستفهام: ربا وين؟
لجين: بترقد في دار عمتو
علاء: وعلاش؟!
لجين: قتلي مانبيش نضايقكم
علاء: لا لا قوليلها تبات معاك...اني بنرقد اهني
لجين: كلمتها سكرت راسها....بتخليني بروحي معقولة...
علاء: تو نكلمها أني...
لجين بتوتر: اوكي براحتك....تصبح علي خير
علاء قرن حواجبه بضيق حس إنه تصرف غلط....خاف تحس إنه مايبيش يكون جنبها...
خشت لجين للدار متنرفزة: ربا هاذي اللي يسمع كلامها اووووووف.... خشت للحمام وخدت دوووش سريع.....
لفت فوطة علي جسمها وطلعت بدون ماتنتبه للي مقعمز ع الكنبة ويشوفلها بصدمة...
علاء: احم احم
لجين : علاء 😳 وتوترت...نحسابك قاعد تحت....
وقف علاء وقرب منها: ماحبيتش ترقدي زعلانة
بلعت لجين ريقها بصعوبة وهي تضغط ع المنشف: أه... لا مش زعلانة
علاء ابتسم بخبث وقرب اكثر: إثبتيلي
لجين: أه مافهمتش 😓
مسك علاء إيدها : تعالي نفهمك😉
~~~~~~~~~~~~~~~~~~~~~~~
أشرقت شمس أحلي صباح يمر علي علاء ولجين....تسللت أشعة الشمس تداعب في وجه لجين اللي كان مدفون في صدر علاء بحب.....
فتحت عيونها شافت لعلاء جنبها ابتسمت وأخيرا اكتملت فرحتها وهي تشوف في علاء جنبها وحاضنها بحب....
قربت باست خده وهمستله: علاء ...علاء
قرن علاء حواجبه وفتح عيونه...ابتسم لما شاف لجين: صباح الخير
لجين: صباح النور
علاء قبل جبينها: خيرك تشوفيلي هكي...
دفنت راسها في حضنه بخجل: نحبك
علاء: نعرف....
لجين قامت راسها: امتي حتقولي حتي اني نحبك....
علاء: ربيعة احني شن اتفقنا مش قلنا كل شي يجي بشويا....
لجين: ربيعة 😳
يتبع......
~~~~~~~~~~~~~~~~~~~~~~
أنت تقرأ
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
