ياريتني

الحلقة32والأخيرة

علاء سكت شويا...وبعدين: الحمد لله...ربي رزقني حبها....
ابتسمت ربيعة ابتسامة ريحت علاء من إحساسه بالذنب تجاهها: ربي يهنيكم.....انت إنسان تستاهل كل خير...
علاء: وانتي بنت ناس...ومافيش شاب في هالدنيا  مايتمناش تكوني مرته...بس النصيب والقدر كان أقوي منا...
ربيعة: ونعم بالله😊.... نستأذن مانعطلكش...مع السلامة 
لجين كانت تستمع لحديثهم ودموعها في عيونها بالرغم من فرحتها بكلام علاء بس وجعتها ربيعة مافيش اوعر من الفراق ...ركبت بسرعة للشقة عشان علاء ماينتبهش لوجودها وتحرجه....
علاء حط إيده في جيبه: ايييه نسيت النقال....سكر باب السيارة ورجع للشقة....
لجين ع أساس كيف طالعة من الدار: علوش نسيت نقالك
علاء: اي كنت ندور عليه ..خداه وانتبه لعيون لجين: خيرهم عيونك؟ كنتي تبكي والا شنو؟!
لجين: أه... لا لا غير حلمت ببابا 😩
علاء مسك إيدها  بحب: الله يرحمه حبيبتي...ادعيله بالرحمة
لجين: الله يرحمه ويغفرله😢....
  علاء: تعالي اهني... وخداها في حضنه: دموعك هاذم معاش نبي نشوفهم فاهمة
لجين هزت راسها: علاء نحبك 😢
بعد عليها شويا وقعد يشوفلها ومبتسم: نعرف 😁
ضرباته علي صدره : شرير 😒
علاء: 😁هيا بنمشي تأخرت علي هيثم.... مااطيبوش اغدي باهي تو نجيب من برا...
لجين: لا لا اليوم بالذات خاطري بنطيب😌
علاء اذكر المرة الماضية اللي قررت لجين اطيب فيها : أه😓.. لا لا حبيبتي مانتعبكش... تو نجيب جاهز وخلاص 😅
لجين بأصرار: لا يعني لا😡... اني بنطيب اليوم...تو نكتبلك شن ناقصني في ورقة وجيبهولي
علاء: باه أمري لله 😪
لجين بشك: خيرك علاء؟! ماعجبكش طبخي هاذيكا مرة 😒
علاء: منو 😓... أني..  لا بالعكس ماشاء الله الحق 😅
لجين فرحت: تمام.... استني نكتبلك الورقة...
علاء: ربي يعينا علي هاليوم 😪
لجين: هيا علوش الورقة....
خداها علاء منها وباس جبينها وطلع: بالسلامة توا
لجين: في أمان الله....وبهمس: يادنيتي كلها ☺
~~~~~~~~~~~~~~~~~~~~~~~~~
في مطعم هيثم....
علاء: ماشاء الله...ربي يزيد ويبارك
هيثم: شن عجبك الديكور والمطعم؟!
علاء: حاجة صح الحق...ربي يباركلك في رزقك ...والمطفوش ضياء شن داير معاك ؟! 😒
هيثم: تي اسكت ياراجل ماشاء الله عليه..شاد ادارة المطعم كامل وملتزم الحق...يطلع لمحاضراته ويرجع وطول الوقت معايا يد بيد...سلمته سيارة المطعم وكل شي تحت إشرافه...
علاء: باهي ربي هداه...
هيثم: خوك من يوم قري فاتحته علي ربا تغير 180 درجة وحط عقله في راسه...اتاري النساوين يغيرو 😉
علاء تنهد:  مش غير يغيرو.. يسحرو سحر أسألني أني😁
.
" لانسحر لاندير كتيبة...سلم العين السودة تجيبه😂 صح ولا يابنات 😉"

هيثم: 😁..  شن داير انت ولجين بالله؟!
علاء: مليون في المية...هالبنت هاذي قلبتني قلب...طلعت فيا حاجات ماكنتش نعرف انهم فيا اصلا 😂 هالمجنونة 
هيثم: هاذا الكلام اللي يفرح...ربي يهنيكم
علاء: يااارب... ربي يباركلي فيها☺...اي حقا سمعت باللي صار لربيعة
هيثم بااستغراب: وانت من قالك 😕.. اسمع علاء انت توا كنت تقول نحب لجين.ماليكش علاقة بطلاق ربيعة
علاء: اطلقت 😳
هيثم: 😓 ايه...
علاء: لاحول ولاقوة الا بالله..امتي؟!
هيثم: من قبل ماتسافرو...بس شن كنت تقصد باللي صار لربيعة.. كنت نحسابك تتكلم ع الطلاق
علاء: تي لا ياراجل...نقصد ع الحادث اللي توفي فيه خوها وبوها فقد رجله
هيثم: لا إله الا الله... امتي هالكلام
علاء: مانعرفش بس اكيد من فترة... لاني شفتها في مركز زراعة الاطراف الصناعية واحني في المانيا بس قلت يمكن نتخايل
هيثم: غريبة ماسمعتش بالموضوع...مسكينة تلقطت عليها من كل جيهة...
علاء: اي والله... ضروري نساعدوها ونوقفو معاها ياهيثم
هيثم بشك: شن تقصد؟!
علاء: نقصد كجيران وولاد شارع 😒
هيثم ابتسم: اها...كان هكي اني معاك اكيد...
ضياء: اووووو الاستاذ علاء عندنا... نقول علاش المطعم امنور 😁
علاء: هلا.. وين كنت تنسرف😒
ضياء: حرام عليك...والله كنت في المحاضرة 😒
علاء: باه ربي يهديك..ضرب تليفونه وكانت لجين...ناض علاء من جنبهم....
ضياء يهمس لهيثم: أكيدة الكبيدة 😁
علاء فنص فيه: 😡
ضياء: احم احم... خلي نمشي نشوف هالبنقلا شن صار فيهم... كومار...عبادول 😡..وين انت؟ نوم هاذا مايمشيش معايا
علاء: يالوجي علاش نعزم فيه هيثم فكينا منه..في خاطره" فكينا من الفضايح قدامه" 
لجين: علاء حلوة اللمة... توا كلمت عمتو وقلتلها تعالو كلكم تغدو
علاء: واااو منك ....ضروري يشهدو علينا  العيلة كلها 😒
لجين: علاش امولي بخيل علاء 😡
علاء في خاطره" مش بخل ياهمي بس هيثم كلب يشدها عليا طول عمري مرتك ماتعرفش اطيب 😪" : باه خلاص تو نكلمه وامري لله...
لجين بفرحة:: اوكي ياقلبي... هي سلام توا ونستني في الحاجات اللي قتلك عليهم
علاء: باه ساعة ثانية ونجيبهولك...
~~~~~~~~~~~~~~~~~~~~~~~~
لجين اتصلت بعمتها وخدت منها بالتفصيل خطوات الكسكسي بالبصلة... وقررت ادير امبطن وعصبان وشوية سلايط....وكان كل شي بمساعدة الاء طبعا...
سمعت لجين باب الشقة  غسلت إيديها: اكيدة هاذا علاء....طلعت بسرعة وسكرت المطبخ...
لجين: اهلين علوش...جبت اللي قتلك عليه
علاء: اي كل اللي كتبتيه... وجبت فواكه
لجين: جبت فراولة؟!
علاء: لا والله..قصدك تبي؟!
لجين: جاي خاطري فيها...
علاء: من عيوني...خلي نرتاح شويا وبعدين ننزل نجيبهولك
لجين: وين بترتاح ؟!
علاء: بنرقد في دارنا علي ماجهز الغدي
لجين؛ لا لا علاء....دور وين تقعد لين يجهز الغدي
علاء: نعم 😕.. حلوة حتي هاذي
لجين:علاء عاد خلينا براحتنا😣
علاء: واني في شنو بنضايقكم...بنرقد علي حالي 😕
لجين:لا لا..علاء ماتفسدش علينا بالله عليك
علاء طارتله وعصب: لجين فكينا من الدلع 😡
لجين عيونها تعبو دموع وسكتت
ابوعلاء اللي كان يسمع في الحوار طلع من المربوعة: وعلاش تصرخ ع البنت...شن فيها يعني البنات يبو ياخدو راحتهم
علاء: يابوي بالله عليك وين بناخد وجهي في هالقوالي 😣
ابوعلاء: برا لهيثم
علاء: هيثم روح بيرتاح في حوشه 😒
ابوعلاء: خلاص برا لحوش المرحوم عبدالله وبعدين يتصلو بيك
علاء تنهد: باه تحركي جيبيلي مفتاح حوشكم خلي ندرق وجهي 😣الدلع الزايد متاع النساوين 😒
بفرحة خشت لجين للدار وجابتله المفتاح وهمستله بدون ماينتبه بوه: نحبك😙
علاء متعصب: مانعرفش ومانبيش نعرف 😡
لجين : 😒😁
ابوعلاء: استنا خودني معاك خلي ندرق وجهي  حتي اني...😁
لجين انحرجت : لا ياعمي انت عادي
علاء فنص فيها قريب قسمها نصين متاع صار هوا عادي واني تهججي فيا...
لجين خافت ومشت بسرعة للمطبخ
~~~~~~~~~~~~~~~~~~~~~~~
دار علاء دورة ع المزرعة واطمن عليها...
طبعا علاء كان مهتم بيها ومشغل فيها عمال يهتمو بيها وبالحوش... لجين ماحبتش تبيعه لانه من ريحة بوها....وكانو مرة مرة يمشوله كتوسيعة خاطر في المزرعة.....
    ابوعلاء: والله القعدة اهني ترد الروح...
علاء: صدقت يابوي... خير من الشقق وهمهم
ابوعلاء: باه علاش ماتعيشو اهني انت ولجين؟!
علاء: مش حلوة يابوي نعيش في رزق مرتي....ساد حياة بوها كتبلي مبلغ لاباس بيه كمرتب شهري...بالرغم من انه ماكانش يعرف اني حنتزوج لجين ويصير اللي صار . 
ابوعلاء: الله يرحمه....كان راجل
علاء: الله يرحمه. كان كريم لابعد الحدود.. اني المبلغ هاذا فتحت بيه حساب ادخار وحندسهم فيه ونفتح بيهم مشروع زي هيثم هكي...يعني حنعتبره بمثابة قرض ويرجع  لاصحابه.
ابوعلاء: دير اللي يريحك ياولدي...عارفك عاقل وتعرف تتصرف
علاء: زعما مازال ماجهزوش الغدي...جعت 😣
ابوعلاء: اتصل بيهم وشوف... وقبل مايكمل كلامه شاف سيارتين خشو من بوابة المزرعة....
كانو ضياء وهيثم ومعاهم الباقي....
هيثم نزل من السيارة: قلنا نعتبروها زردة وخلاص
علاء: خير مادرتو...هيا متنا بالجوع....
دخلو البنات الحاجات للمطبخ عشان يجهزو الغدي...ويحطو اللمسات الاخيرة.
فرشو تحت الشجر وقعمزو يتغدو....وسط عراكات ردينة وخوها أيهم... ومناكشات الاء وضياء....
علاء مقعمز جنب لجين : كولي وانتي تنبشي تنبيش زي العصفور
لجين:ماخاطريش
علاء: انتي مش عاجبتيني خيرك مريضة؟!
لجين: لا...بس هكي شهيتي مسدودة
علاء: ذكريني بعدين نجيبلك فاتح شهية من الصيدلية
لجين مع ابتسامة: باه
علاء بشك : بالله عليك انتي اللي طيبتيه الكسكسي؟!
لجين بنرفزة : والله العظيم أني😡...حتي العصبان شاركت فيه مع الاء
علاء: نجيلي المتنرفز ياربي 😙...
لجين: 😏
علاء: عطيك الصحة والله البصلة بنة وصنة...خلاص غدوة نبي بازين معناها😉
لجين: بازين 😓
علاء: اي مادام طلعتي تعرفي اطيبي وتي روحك 😁
لجين بتردد: اي وعادي نطيب بازين شن فيها يعني 😓
~~~~~~~~~~~~~~~~~~~~~~
بعد الغدي....لمو البنات الصواني والحاجات ورفعوهم للمطبخ....
هيثم  قرر يتمشي هو ونجاح في المزرعة...وضياء خداته نومة تحت الشجر...
لجين والاء يغسلو في الصواني بمساعدة علاء اللي أصر علي مساعدتهم....
الاء: عطاك ربي يالوجي... ان شاء الله نطيح في واحد زي علاء احنين و يضم معايا 😁 
علاء: ان شاء الله يامشفشفة....اصلا تحسابيني بنوافق علي اي حد يتقدملك ...كان مش حد نسخة مني ويحافظ عليك ماتعبيش
لجين: اصلا علوش مافيش زيه فأظني مش حتتزوجي طول عمرك ياللوش
علاء: 😌 أكيد...مفروض تحمدي ربك ليل نهار انك تزوجتي طرف زيني 
الاء:احم احم
لجين: 😁
الاء: خلاص كملنا...خلي بنمشي نرتاح شويا
لجين: حتي أني...
علاء مسكها من إيدها: لا لا انتي تعالي نبيك في موضوع مهم...
لجين:موضوع شنو؟!
علاء: تعالي نتمشو شويا ونقولك
لجين: اوكي...
طلعو علاء ولجين وامشو جيهة البط....قعمزو يتفرجو عليهم... علاء لف إيده علي خصر لجين وبإيده الثانيه مسك إيدها ويداعب في صوابعها بحب....
علاء: تذكري لما البطات كان يجرو وراك وبعدين طحتي 😁
لجين: رد بالك تنسا باهي 😏.. اصلا كنت تكرهني واكيد استحليتها فيا
علاء: حق الله يقال...كنت نشوف العمي ولا نشوفك😁... من قال نحبك وتخشي قلبي سبحان الله قادر علي كل شي... 
لجين: بالحق علاء تحبني 
باس إيدها وضمها بقوة: بالحق ياقلب علاء...سكت شويا...: لجين بنحكيلك علي حاجة بس نبي عقلك يكون كبير وتفهميني
لجين: ان شاء الله خير 😕
علاء:  نبي ناخد منك مبلغ كبير شويا
لجين: علاء فلوسي هي فلوسك خود اللي تبيه بدون حتي ماتسألني
علاء: باه نبي نقولك لمنو بنعطيهم....الفلوس بنعطيهم لربيعة
لجين: اوكي
استغرب علاء من ردة فعلها: سمعتيني شن قلت
لجين: اي سمعتك حبيبي...والفلوس نبيهم صدقة علي حياة بابا...اعطيهولها وساعدها
علاء: لجين انتي تتكلمي بجد 😕
لجين: علاء بصراحة...اني سمعت كلامك مع ربيعة الصبح
علاء: ايوه قوليلي...حتي اني استغربت قلت منين هالعقل هاذا كله 😒
لجين: أسفة ماكانش قصدي نسمع...بس هكي صار
علاء: باهي ريحتيني كنت نخمم كيف بنقولك
لجين: علاء نحبك
علاء: نعرف 😁
لجين: علاء 😣
علاء: هههههههه... شاف لجيهة هيثم ونجاح كانو واقفين وردينة مقعمزة تبكي وتتمرغد في التراب...
علاء: خيرها هاذي 😂... تعالي خلي نشوفوهم
  وقفت لجين بمساعدة علاء وامشو جيهتهم.....
نجاح: حلها توا هي...ضروري تقوللها يعني 😒
علاء: تي خيركم الدنيا امعججة عندكم 😂
نجاح: هاذا صاحبك قاللها ان البيبي الجاي ولد 😓
لجين: حي قصدك عرفتو ☺ ولد والا بنوتة
نجاح: اي اليوم درنا صورة السونار وطلع ولد... ودودي تبي بنت
ردينة: مانبيس اوليد مانبيس😢😢
وقفها علاء ونفضلها حوايجها: خلاص يادودي خلاص...تو خالتو لجين تجيبلك بنوتة باهي هكي
ردينة بعبرتها: باهي امتي ؟
علاء: أه... عن قريب...تو نوصو عليها من السوق وامتي ماتجهز يبعتهولنا 😁
شافتله ردينة بنص عين: تحسابني اصغيرة تكذب عليا...😒..نعرف ان البيبي مش من السوق يجيبو فيه 😏
علاء: 😨
هيثم: مسكين كلا انت تي هاذي ترفعك للبحر وتجيبك عطشان 😂
ردينة امشت وخلتهم....
علاء؛ معاش في صغار فعلا 😒
~~~~~~~~~~~~~~~~~~~~~~
مع المغرب....طلع علاء مع هيثم بيمشو لربيعة...لجين بالرغم من أنها تأكدت من حب علاء ليها بس حست بنوع من الغيرة إنه حيتقابل معاها...وطول الوقت كانت متوترة ومش علي بعضها....
ضياء: شن يابوي نروح بيكم للشقة والا بتباتو اهني ؟!
ابوعلاء: لا لا روح بينا..بس لجين مانعرفش ممكن خاطرها تقعد...
لجين: لا ياعمي وين ماراجلي وين ماأني....
ضياء::خلاص وتو روحكم معناها...نوصل نجاح والصغار ونرجعلكم.... هيا للوش تعالي معايا سايريني في الطريق
الاء: باه...هيا...
  بعد ماوصل نجاح والصغار....روح ضياء بلجين واهله للشقة....
لجين حاسة بنعاس مش عادي...امتدت ع السرير وخداها النوم بدون ماتغير حوايجها
فاتت تقريبا ساعة وروح علاء...كان الحوش هادي فتح الدار وخش...
علاء قعمز ع السرير.. ومسح علي شعرها: لوجي...حبي...علاش راقدة بحوايجك؟!
فتح لجين عيونها: علاء!!! الساعة كم توا؟!
علاء: الوقت تأخر قريب الساعة 1
لجين: هاذا كله كنتو عندها 😒
ابتسم علاء:  أكيد لا ...بس مرينا ع القهوة اني وهيثم وخدانا الوقت
لجين: ماهو كنتو مع بعض ضروري منها القهوة..
علاء: بصراحة ادهورنا في شارعنا القديم بالسيارة استاحشت الزناقي والمحلات وبعدين كسدنا في قهوة الشارع... هيا نوضي غيري حوايجك
لجين: ماخاطريش بنرقد😴😴
علاء: شن هالكسل اللي انتي فيه يابنت...بصراحة مش عاجبتني زعما اللي في بالي صح 😕
لجين : شنو اللي في بالك؟!
علاء مبتسم: يعني قلة هالماكلة والكسل والدوخة...قلت يمكن في حاجة في الطريق 😉
فنصت لجين عيونها وقعمزت علي حيلها: مافهمتش حاجة كيف شنو ترا😨 
علاء: يعني...حاجة اصغيرة وديما تعيط وتسهرنا في الليل 😁
لجين: أه 😓..لا لا مااعتقدش
علاء: متأكدة؟!
قلبت لجين عيونها يمين ويسار فوق وتحت وهي تفكر:لا لا متأكدة 😓
علاء: باه 😁
نزلت لجين راسها بتفكير بعدين نحت الغطا وناضت : 😢😢 كله منك ياعلاء كله منك 😭
علاء: تي خيرك 😂
قعمزت لجين ع الكنبة وتبكي: مانبيش نحمل مانبيش 😢
علاء: باهي مش توا قلتي متأكدة انه لا
لجين: لا مش متأكدة 😭
علاء: وباهي علاش زعلانة شن ماتبيش نجيبو بيبي 😒
لجين: نخاف منهم😢 كيف بنتعامل معاه وكيف بنشده وكيف بنغيرله 😳 لا لا مانقدرش 😭
علاء: انت غير جيبيه واني نتكفل بيه باهي 😁
لجين: لا لا 😭..اني مازال اصغيرة مانبيش بيبيات توا
علاء: في هاذي عندك حق...انتي بيبي كيف بنجيبو بيبي ثاني 😒
لجين: علاء 😣😣
علاء: باه ها سكتنا 🙊... نوضي ارقدي خلاص
لجين: طار النوم من عيوني 😢
علاء اضايق: لجين !! نزعل منك راه اللي يسمعك يقول في جريمة صارت واذا حامل يعني شن فيها؟! مش ع أساس تحبيني
لجين تحاول تهدي الوضع لصقت فيه وتمرر في صوابعها علي ذراعه وبدلع: حبيبي مش قصدي هكي...بس علوش نبي نكمل قرايتي قبل وبعدين نحمل ونجيب...العمر طويل قدامنا
علاء: الواحد مايندريش علي ساعته يالجين...مافيش حاجة اسمها العمر قدامنا
لجين: ياعمري نعرف والله نعرف..
علاء: باه ولو طلعتي حامل
لجين: أه 😓...باه كيف بنتأكدو
علاء: خلي نمشي الصيدلية نجيب تست حمل ونجي
لجين: بنمشي معاك
علاء: وين في هالليل
لجين: علوشي خلي نسايرك...عشان خاطري😙
علاء: باه هيا تعالي....
~~~~~~~~~~~~~~~~~~~~~~~
قبل مايطلع من الحوش اطمن علاء علي خوه وبوه في المربوعة....بعدين خش لدار الاء غطاها كويس وباس جبينها وطلع....
مسك إيد لجين ونزل: هيا يامجنونة....
ركبو في السيارة وقعدو ايدورو علي صيدلية فاتحة بس ماحصلوش في جيهتهم....
لجين: عليك حظ 😪
علاء: في عيادة فاتحة شن رايك اديري تحليل نتأكدو
لجين: توا ؟!
علاء: اي ليش لا .....لف السيارة وامشو للعيادة نزلو...خدو العينات من لجين وقالولهم النتيجة بعد ساعة...
لجين: هههههه علي فكرة هاذا اسمه هبال اللي نديرو فيه 😁
علاء: العمر واحد لو ماعشنا الهبال توا امتي بنعيشوه😁...شن رايك نمشو نكسدو ع البحر علي ماطلعت النتيجة
لجين: اوكي 😁
قعمزو ع الشط...ورجليهم في المية...لجين كانت حاطة راسها علي كتف علاء...اللي كان حاضنها ليه...
علاء: اول مرة نشوف البحر حلو هكي
لجين: أكيد لاني معاك 😌
علاء: هههههه اي صح
لجين:علاء نسألك سؤال وتجاوبني بصراحة
علاء: أكيد
لجين: مازال تحبها ربيعة ؟
علاء: مانقدرش نقولك الا النصيب فرقنا
لجين: يعني تحبها 😨
علاء: حبيتك انتي اكثر
لجين: يعني تحبها 😢
علاء:.........
لجين سكتت واكتفت بالنظر للبحر وكأنها ندمت علي سؤالها الغبي...لانها تعرف ان حب ربيعة في قلب علاء مستحيل يمتحي بين يوم وليلة لانها تظل الحب الاول في حياته...
علاء بحماس: هيا فاتت الساعة خلي نمشو نجيبو التحليل
لجين: اوكي حبي 
   وصلو للعيادة نزلت لجين اما علاء قعد يستنا فيها في السيارة....
طلعت لجين شادة ورقة التحليل في ايدها وتبكي....ركبت السيارة 😢😢
علاء بفرحة: معناها حامل صح 😀
لجين هزت راسها بإيجاب...😢
علاء بصوت عالي: ووووووووه وووووه احلي خبر نسمعه...اللهم لك الحمد...وحضن لجين: نحبك يالوجي نحبك وووووووه
لجين تفاجأت من ردة فعله اللي ماتوقعتهاش وممكن هالشي خفف زعلها شوي....
علاء: خلاص حبي علاش الدموع...والله العظيم نوعدك نساعدك في كل شي ووعد تكملي قرايتك
لجين مسحت دموعها: باه
علاء: ياعمري خلاص... والله مايهونو عليا دموعك..خلي نروحو ارتاحي شويا وغدوة نتكلمو باهي....
شغل علاء السيارة فرحان.... مسك إيد لجين وضامها لصدره وكل شويا يشوفلها ...قرب يبوسلها خدها.... وفي لحظة....
لجين: علاااااااء انتبه 😱.........وطاااااااااااااااف
~~~~~~~~~~~~~~~~~~~~~~~~
الدنيا هدوء.... مافيش صوت الا صوت العجلات اللي كانو يدورو بسرعة نتيجة الاصطدام القوي.....
فتحت لجين عيونها وهي حاسة بألم في راسها....ماقدرتش تذكر اللي صار ولاتستوعب شي....
سكرت عيونها وفتحتهم من جديد تبي تتأكد...حست بوضعها غريب وكأنه كل شي بالعكس...الشجر والسمي والسيارة و........
اي توا استوعبت الموضوع دارو حادث والسيارة انقلبت بيهم..وفي الجيهة المقابلة كان في سيارة الباين فيها شخص حتي هوا مضرر ومايتحركش...
لجين بصوت تعبان: علاء علاء.... لفت راسها شويا وشافت علاء في جنبها...راسه كله دم ....علاااء رد عليا علاااااء
فتح علاء عيونه ببطء ويتكلم بصعوبة: لجين انتي كويسة؟!
لجين: اي حبيبي كويسة.... علاااء فيك شي رد عليا
علاء: بتألم: أه...ماتخافيش حيجي حد يسعفنا....آآآه....البيبي شن صار فيه لجين
لجين : مانعرفش... علاء شن تحس رد عليا
علاء: آه.... وقعد يرجع في الدم
لجين مش قادرة تتحرك ولاتوصل فيه: علاء حبيبي شن فيك علاء 😢
علاء بصوت كل مرة يضعف: اني كويس ماتخافيش...آه..آه... لجين حاولي تطلعي من السيارة
لجين: مانقدرش رجليا حاصلات مانقدرش 😢
علاء غمض عيونه....ولجين صرخت : علاء علاء...
فتحهم من جديد بتعب: اني معاك..ماتخافيش...
فاتو 10 دقايق وهما علي نفس الوضع وعلاء كل مرة كانت حالته تسوء اكثر....
علاء: لوجي...كان جي ولد سميه عبدالله..وكان بنت ع المرحومة أمي...
لجين: لا لا اسكت😢....انت بتسميه انت بتسميه علاء....انت وعدتني...وعدتني تكون معايا وتعوضني عن كل شي ....وعدتني ان ايامنا تكون كلها فرح...علاء حرام عليك ماتخلينيش 😢😭
علاء ابتسم رغم الالم : اني معاك..آه..وديما حنكون معاك...ياريتني عرفتك من زمان يالجين
لجين: العمر قدامنا وحنكونو مع بعض علاء 😢
علاء: لجين كوني قوية ردي بالك تضعفي في يوم...حنزعل منك راه...
لجين: اسكت بالله عليك اسكت 😢
علاء: نحبك
لجين: واني نموت فيك علاء... وحياتي عندك ماتخليني... مانقدرش نعيش بعدك مانقدرش 😢
علاء قرن حواجبه لما شم ريحة غريبة...ريحة بنزين يتسرب: لجين حاولي تطلعي 
لجين: لا خلينا بنطلعو مع بعض...مانبيش نطلع بروحي 😢
علاء: لجين اسمعيني كويس وبلا هبال..اطلعي بسرعة..اطلعي 😡
هما قاعدين يتكلمو وقفت سيارة فيها زوز رجالة...
واحد من الرجالة: لاحول ولاقوة الا بالله اتصل بالاسعاف بسرعة..
جو الرجالة من جيهة علاء...حاولو يساعدوه بس كان حاصل....
علاء: ساعدو مرتي قبل...بالله عليكم ساعدوها
خدو الرجالة طرف حديدة وقعدو يحاولو يطلعو لجين....وبعد جهد نجحو يطلعوها ...
علاء ابتسم براحة لما شافهم حطوها بعيد ع السيارة.... 
لجين: علاء طلعو علاء....
وقبل مايرجعو للسيارة من جديد سمعو صوت انفجار قووووووووووووي....
لجين: لا لا لا......علااااااااااء......لاااااااااااااالا.....شقت صرختها هدوء الليل وكانت اقوي من صوت الانفجار.....كانت صرخة ألم وفرااااااق....