في السيارة ....
لجين تبكي: بالله عليك قولي عمتو ماتت 😢
علاء: تي خيركم تفاولو ع المراة مافيها شي 😣
لجين: باه شن فيها بالزبط وعلاش هي في المستشفي
علاء: هيثم قال خش عليها في الحمام لقاها مغمي عليها..وراسها دم
لجين بخوف: ياروحي ياعمتو 😢
علاء: حاجة بسيطة ان شاء الله أني متأكد...
لجين: والله لو يصير فيها شي ننجن ...عارف شن معناها ننجن 😭
علاء: اووووف ساد لجين من الصراخ وجعتيلي راسي 😣
لجين: أكيد أصلا من امتي نهمك أني...ننجن والا نطير 😢
علاء: 😒
وصلو للمستشفي ونزلت لجين بسرعة بدون حتي ماتسكر الباب...
علاء: تي استني وين ماشية 😳... هاذا الهبال اللي مانحباش 😒😣... سكر السيارة ولحقها....
لجين لقت هيثم في الممر ...امشتله بسرعة: خيرها عمتو شن فيها 😢
هيثم متوتر: مانعرفش مازال ماطلعلي حد...
علاء: السلام عليكم... ها...شن قالو ؟!
هيثم: نستني في الدكتور يطلع يطمني
علاء: ان شاء الله خير
لجين: راسها مفتوح هلبا
هيثم: والله مانعرف ولا انتبهت وقت شفتها قريب انجنيت قمتها وجبتها لاهني طيران
لجين : ياربي.. ياربي....
علاء: لجين قعمزي ع الكرسي واسكتي ساد من العياط
طلع الدكتور: وين زوجها؟؟
هيثم بخوف: أني يادكتور 😓
الدكتور: اطمن ماتخافش جرح بسيط في راسها.. بس لان الدم كان ساخن نزفت بغزارة .خيطناه وحالتها كويسة
هيثم: الحمد لله
لجين: الحمد لله ياربي 😢...ممكن نشوفوها
الدكتور: مازال ماكملتش باقي التشخيص اصبرو 😁
هيثم: شن مازال في 😨
الدكتور: الف مبروك المدام حامل..وممكن هاذا سبب الدوخة
هيثم: 😳 حامل
الدكتور: اي الف مبروك 😁
علاء: هههههه مبروك 😁
لجين :😂.. مبروك هيثم
هيثم: الله يبارك فيكم...العقبالكم 😁
لجين شافت لعلاء ونزلت عيونها: تسلم
علاء شاف لهيثم بنظرة متاع الخبث متاعك فكنا منه...😒
هيثم: احم احم...خلي بنمشي نطمن عليها...نستأذن
لجين: استناني نمشي معاك
علاء: أني بنمشي نجيب قهوة من الكافتيريا
~~~~~~~~~~~~~~~~~~~~~~
علاء قعمز ع الكراسي في الانتظار يشرب في قهوته....خدي بنادول الانفلونزا من الصيدلية وحاطه في جنبه...
طلعت لجين من عند عمتها فرحانة: علاء تسأل عليك عمتو
علاء: شن حالتها كويسة
لجين: اي تمام...بس قالو بيخلوها تحت الملاحظة اليوم خايفين من الضربة اللي علي راسها.. وغدوة الصبح تطلع
علاء: باه كويس...ماتبيش تروحي انتي؟!
لجين: لا بنروح...قال هيثم بيقعد معاها....كان تشوفهم قداش فرحانين 😁
علاء: ان شاء الله يكون من قسمهم
لجين: يارب...تعرف متحمسة امتي نشوفه البيبي 😁 اخيرا بيقعد عندي ولد او بنت عمة 💃
علاء: باه هيا.. راسي امصدع
لجين مست جبينه: ترا مازال حرارتك مرتفعة؟؟
علاء ابتسم: لا لا تمام..دخلي شعرك من ورا طالع 😒
لجين شهقت و قعدت تساوي في الوشاح .....
هيثم: علاء...الصغار عند أمي بالله عليك طل عليهم قبل ماتروح بالك يبو شي
علاء: ناخدهم معاي للشقة
هيثم: لا لا مافيش داعي...مر عليهم بس
علاء: حاضر من عيوني...هيا لجين
لجين: مع السلامة ....بعدين تو نكلمها عمتو ونطمن عليها
علاء: تصبح علي خير
هيثم: تلاقي الخير....
وقف علاء قدام حوش عبدالله ومعاه لجين...
علاء: انزلي جيبي حوايجك وتعالي
لجين:علاش؟!
علاء: شن اللي علاش؟! شن بتباتي اهني بروحك...
لجين: بس غدوة عندي محاضرة وعندي البحث بنشتغل عليه
علاء: خلاص جيبي قشيشك كله وكملي غاديكا في الشقة...هيا لجين مش قادر نقيم راسي راه 😣
لجين: سلامتك 😨... حاضر استناني شويا بس
لجين ع السريع خدت كل اللي تبيه... وجابت الاب توب متاعها ونزلت بسرعة....
علاء كان حاط راسه ع الدومان ....
لجين: علاء انت كويس؟!
علاء: نحس في روحي امهسهس شكله من الحرارة...هيا كملتي
لجين: اي
علاء: تمام...خلي نفوتو ع صغار هيثم...ونروحو
لجين في خاطرها" الله محلاها نروحو 😍...طالعة تهبل منه"
~~~~~~~~~~~~~~~~~~~~
وصلو للشقة...علاء حذف المفاتيح وخش طول للمربوعة ارتمي علي طوله....
ابوعلاء: طمنيني يابنتي...كيف حالها عمتك توا؟!
لجين: كويسة الحمد لله ...طاحت وجرحت راسها لكن توا كويسة
ابوعلاء: باهي الحمد لله...خشي ارتاحي لداخل يابنتي....
الاء: تعالي لداري لوجي
ابوعلاء: نشفلي ريقي هالولد وأني نقوله خود دار نوم....كان هاذا ارتحتي فيها توا
لجين: معليش ياعمي ...كل شي في وقته 😶
الاء: تعالي لوجي
لجين قعمزت ع السرير: علاء شكله تعبان هلبا 😓
الاء: اي ديما اتعب فيه البردة...مسكين يقعد حتي باليومين راقد في الفراش
لجين: سلامته 😪... عندك فكس الاء
الاء: في جنبه واحد..طلبه مني الصبح وعطيتهوله
لجين: وزعما دار منه؟!
الاء: والله مانعرف.... بنمشي نشوف بابا..وانتي خودي راحتك كان تبي حاجة ناديني
لجين: ماشي....
غيرت لجين حوايجها وقعمزت تشتغل ع اللاب لفترة متأخرة من الليل...
الاء رقدت مع بوها عشان لجين تاخد راحتها في الدار..
لجين قالقة و خاطرها مش امهنيها....طلعت وامشت لعلاء في المربوعة..
كان راقد بحذائه...ويرجف تحت البطانية
لجين: علاء 😨
فتح عيونه بتعب: لجين بري ارقدي
لجين بخوف: نكلم هيثم يجيبلك دكتور او يرفعك للمستشفي
علاء: أني كويس مافيا شي...بري ارقدي
لجين نحتله كندرته... وقعمزت في جنبه....تشوفله وقلبها واجعها عليه....
حطت إيديها علي راسه وتمسحله علي شعره بحنان ...فتح علاء عيونه ورجع غمضهم من جديد بتعب...
شافت حكة الفكس في جنبه...لمعت في راسها فكرة ...
نحت من عليه البطانية...قعمزاته بشويا وتكاته ع الحيط...نحتله قميصه ذهناته بالفكس من رقبته لخصره...غلفاته تغليف بيه....وهوا من التعب كان مستسلم....
رجعت قميصه...مدادته بشويا ع الفراش.... وغطاته كويس بالبطانية...حتي من راسه غطاته
اتكت ع الحيط جنبه....وتشوفله بحب وفي خاطرها" سلامتك ياريته فيا ولافيك " ...لين خداها النوم
~~~~~~~~~~~~~~~~~~~~
أنت تقرأ
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
