نزل علاء بوه بشويا بمساعدة هيثم..
ابوعلاء: كان خليتوني في الحوش مش خير..غير بنتعبكم 😩
علاء: تعبك راحة يابوي انت شن تقول ....
الاء: بنمشي للجين وربا باهي😊
علاء: ماتقلقي حد للوش يمكن يبو يكونو براحتهم
الاء: باه 😩
عبدالله جاهم من بعيد: هاشنو جاهزين خلي ندهورو مع بعض
علاء: معليش ياعمي ادهورو براحتكم
عبدالله: تي شن هالكلام احني جايين مع بعض واعتبرها رحلة عائلية....
علاء: حاضر ياعمي كيف ماتحب😪
الاء خدت ردينة بنت هيثم وبتمشي للبنات
..صغار هيثم أيهم عمره 5 سنوات وردينة 3سنوات....
نجاح كانت مضايقة من مرض خوها وزادت اضايقت لما شافت صغار هيثم لأنها مش فاهمة الموضوع.
ربا: اوووف لوجي خلص روئي 😣
نجاح: خيرك لجين شن فيك؟!
لجين: آه...مريضة شويا 😓..وغمزت لربا بمعني اسكتي
الاء: السلام عليكم 😊
البنات: وعليكم السلام
ربا: اهلين للوش...مين الحلوة اللي معك؟!
الاء: هاذي بنت عمو هيثم صاحب علاء
البنوتة مدت إيدها تسلم عليهم بكل براءة...وصلت لنجاح وابتسمتلها😊
لجين: علاش ماجاب مرته معاه؟؟
الاء: مسكين مرته متوفية 😩
نجاح: 😳..وقعدت تشوف للبنت بشفقة
ربا: ياحرام 😩
نجاح نزلت لمستواها: شن إسمك ياحلوة
ردينة: اسمي دودي هيثم 😊
نجاح: ،😁 حلو إسمك
ردينة: انتي من إسمك 😕
نجاح: هههههه اسمي نجاح....هاك شكلاطة يادودي....
ردينة: شكرا
لجين؛ محلاها كيف مؤدبة 😍
ربا: اي كتير عسل تؤبر ألبي 😙
الاء: علاء يموت فيها....وديما يقول لربيعة نبي زيها مادخلنيش فيك 😁
لجين: 😏
ربا: انا كمان بدي مثلها مو بس علاء 😂
لجين حطت نظارتها علي عيونها عشان ماتبينش إنها بتنفجر....ومضايقة
~~~~~~~~~~~~~~~~~~~~
قعدو يدهورو ويتفرجو ع الاثار بمساعدة مرشد سياحي معاهم...وصلو للمسرح وقررو يرتاحو شويا....
الرجالة كانو مع بعض الا ضياء اللي وين ماربا وين ماهو 😂 رغم تهديدات بوه اللي يتحلف فيه من بعيد ....
نجاح كانت مع الاء وردينة .....قعمزو ويدردشو
نجاح: للوش من امتي متوفية مرت هيثم؟!
الاء: ليها سنتين
نجاح: وصغاره كيف داير فيهم؟!
الاء: قاعدين مع أمه مراة كبيرة وهو اللي مهتم بيهم...كل مايخطب مايصيرش ممكن علي خاطر الصغار...
نجاح: اها...ربي يوفقه
الاء: خلي ردينة جنبك شويا بنمشي نشوف بابا ونجي
نجاح: اوكي ...تعالي دودي ....كانت ردينة لابسة jumpsuit جينز مع بدي وردي ومدايرة قرنين بتوكات وردية حلوة....
هيثم؛ شكلها دودي انسجمت مع نجاح
علاء: بنتك عسل اصلا...بسرعة تخش الخاطر
هيثم: زعما توافق عليا ؟!
علاء: أسمع هاذي فرصتك برا أسألها...قاعدة بروحها..
هيثم؛ خايف ترفضني 😩
علاء: انت شوفها قبل وبعدين ساهل...وكان رفضت زيها زيها غيرها
هيثم: لا هالمرة غير...نحس في روحي حبيتها ونبيها بجد...ممكن قبل نخطب علي خاطر نبي وحدة ترفع معايا حمل الصغار...لكن نجاح نبيها جنبي قبل ماتكون جنب الصغار
علاء: ههههههههه وقعت في الفخ ياصاحبي
هيثم: اي والله وقعت...
علاء: باهي برا بسرعة
هيثم: اوكي..خلي أيهومة جنبك تو نجي....ادعيلي 😓
قرب هيثم منها...أول ماشافاته ردينة مشتله تجري : بابا 😀
هيثم قامها: أهلين حبيبة بابا.....احم احم...كيف حالك أنسة نجاح
نجاح: الحمد لله تسلم...ربي يحفظهولك السنفورة 😊
هيثم: بارك الله فيك.....احم احم....وقعمز في جنبها ....ان شاء الله عجباتك لبدة ؟!
نجاح: اي ماشاء الله...تعرف عمري مازرتها
هيثم: بجد؟! غريبة
نجاح: قتلك امشينا صغار للبنان
هيثم: اها....مازال في مناطق أحلي وأحلي خصوصا في الجنوب روووعة
نجاح: اي نقرا عليهم...خاطري نشوف واو الناموس
هيثم؛ خلاص تو نكلم علاء وإنسقو لرحلة غاديكا مرة ثانية
نجاح: ان شاء الله....نزلت راسها بحزن؛ نتمني حتي عبدالله يكون معانا 😩
هيثم: ربي يشفيه...كل شي مكتوب من عند ربي
نجاح: الحمد لله ع كل حال...مش عارفة كيف بنديرو بعده...لجين اصغيرة وأني عشت طول حياتي مدلعه عند بوي وهوا زاد دللني مانعرفش شي في هالدنيا ولا نعرف حتي كيف نتصرف 😩
هيثم: ربي كريم.....ممكن نسألك سؤال وانتي حرة طبعا تجاوبي او لا ؟!
نجاح: تفضل: علاش ماتزوجتيش!
نجاح ابتسمت بمرارة: مانعرفش....بجد ماعنديش سبب حقيقي ومقنع...في شبابي تكبرت علي كل شاب يتقدملي ..ونطلع فيه علة نشرط في شروط تعجيزية.. كنت شايفة روحي بفلوسي وجمالي...تنهدت.... لين فاتو الايام ومعاش حد طق بابنا فعرفت إني ضيعت شبابي ع الفاضي...
هيثم: وياتري قاعدة شروطك هي نفسها؟!
نجاح : ههههههه حتي لو غيرتهم خلاص فاتني القطار
هيثم وشوش لردينة بنته في وذنها....
نجاح: 😕
ردينة امشت لنجاح ...قربت من وذنها: قالك بابا...أأأ....اممممم.....راجي شويا....شنو بابا 😕
هيثم: 😪
ردينة : اي اي اذكرت ...قالك بابا زوزيني 😆
نجاح ارتبكت: شنو!
هيثم بجدية: تقبلي براجل أرمل عنده زوز صغار وأم كبيرة مريضة..يشتغل عامل نظافة في مطعم وبمرتب متواضع
نجاح تفاجأت من طلبه: ............
هيثم: نفهم سكوتك معناه الرفض 😪
نجاح ابتسمت: نقبل بس بشرط
هيثم بخوف: شنو؟!
نجاح: يحبني ويحطني في عيونه ويعوضني علي كل اللي فات
هيثم تنهد براحة : خوفتيني....حاضر😊 ... باه مدام موافقة ممكن نفاتح عبدالله بالموضوع
نجاح عيونها دمعو: اوكي
~~~~~~~~~~~~~~~~~~~~
أنت تقرأ
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
