مع المغرب وصلو لألمانيا وبالتحديد برلين ...
لجين والاء يستنو في صالة المطار وعلاء يكمل في باقي اجراءاتهم...
لجين بغضب: نبي نفهم بس...كيف طلعني من الحوش ودخلني الطائرة بدون مانحس لا ومعاها من غير اعتراض من حد...
الاء تضحك وساكته....
لجين: للوش تكلمي 😣
الاء:هههههه والله مانعرف حاجة لوجي🙊..
لجين: خوك هاذا حالة 😒
الاء: بس يحبك...طول الرحلة يساويلك في راسك علي كتفه عشان ماتضايقيش في النومة 😉
لجين: 😶
علاء: هيا كملنا...خلي نشوفو تاكسي..
لجين لوت بوزها......
علاء: هيا عاد ...منو قدك حصلتي سفرة لالمانيا 😂 علاش النكد بس....
الاء: 😂😂
علاء قعد يأشر بإيده لتاكسي...
السواق قعد يتكلم بالالماني: أين تريدون الذهاب " تخيلوه زعميتك ألماني 😂"
علاء سكت لانه مايفهمش فيه....
السواق: اني أسألك اين تريد الذهاب
لجين: قالك وين بتمشي؟
علاء طلع ورقة من جيبه هاذا عنوان الفندق اللي حجزولنا فيه السفارة....
لجين: هاذا هوتيل داس ستو... لحظة نفهمه
مسكها علاء من ذراعها: وين وين يامدام...شن تفهميه هاذي 😒
لجين: باه كيف بيعرف العنوان 😕
علاء: تو نعطيه الورقة كان بيفهم باهي كان هاذا اجعنه مافهم 😏
مدله علاء الورقة اللي فيها العنوان وركبو معاه....ربع ساعة وكانو قدام الفندق....نزلو وتأكد علاء من اجراءات الحجز...كانت لجين تساعد فيه في التفاهم مع الريسبشن بحكم عندها لغة ألمانية جيدة نوعا ما....
خدو مفاتيح الديار وركبو.....كانت غرفة زوجية والثانية فردية..
علاء: هاذي غرفتك للوش...وهاذا غرفتنا
لجين: لا نبي نقعد مع الاء
علاء: نعم 😕
لجين: اي زي ماسمعت😒
علاء بخبث: اوكي زي ماتحبي معناها انتم خودو الزوجية وأني الفردية
تفاجأت لجين برده توقعت يعترض واضايقت: اي أصلا عادي مايهمنيش 😏 خدت منه مفتاح الدار ومشت طايرلتها....
علاء والاء شافو لبعضهم: 😂😂
~~~~~~~~~~~~~~~~~~~~~~
من التعب الاء رقدت علي طول أما لجين كانت تتقلب في فراشها بملل.....سمعت دقات خفيفة ع الباب....
لجين: منو؟
جاها الرد: أني علاء افتحي...
ابتسمت لجين بفرحة...فتحت الباب: نعم 😒
علاء: كسدت بروحي شن رقدتو؟
لجين: الاء رقدت...
علاء: وإنتي؟
لجين: وانت شن شايف؟
علاء جبدها من إيدها: تعالي كسدي معايا 😉
لجين الوجه اتحمرط: لا علاء بنرقد
علاء: تي غير تعالي بس....دخلها للدار وسكر الباب...وقعد يشوفلها ويبتسم....
لجين: احم احم...علاء بلا حركات بايخة؟!😣
علاء بخبث: حركات شنو؟ انتي عقلك وين امشي 😉..
لجين ارتبكت: وين بيمشي يعني ...عادي
علاء: باه تعالي في تقرير بالالماني نبيك تقريهولي😂
لجين: وينه؟!
علاء: باه غير قعمزي شنو بناكلك يعني 😒
قعمزت لجين ع السرير....شويا وجاب علاء التقرير: اهو شوفيه....
لجين: اممممم هاذا علي حالة الاء...
علاء: نعرف امالا علي حالة خالتي 😏
لجين: 😒...باهي فهمنا...وقعدت تقرا واترجمله فيه وهو مقعمز في جنبها يشوفلها بتركيز...وبعدين في حركة جريئة قرب وطبع بوسة علي رقبتها....
انتفضت لجين من مكانها ورمت الورق: علاء😡
علاء: عاد خلاص لجين لامتي بتعاقبيني
لجين بلعت ريقها بخوف: قتلك لما نتأكد من حبك نسامحك
علاء: وباه شن المطلوب مني عشان تتأكدي😏
لجين: مانعرفش انت تعرف....وكيف بتطلع
جبدها علاء بقوة لصدره وإيده يمرر فيها علي ظهرها بحب: عندك علم ان المرأة اللي تمنع نفسها عن زوجها يلعنوها الملائكة
لجين بخوف برئ : حقا😓
علاء بخبث: اي حقا شن بنكذب عليك يعني...وحتي تموت يقولو مطرودة من الجنة😌
لجين: جد 😓
علاء: حي عليك حي...شفتي كيف
لجين: باه لو هي مش طايقته مش حرام تنجبر عليه....😣
توسعو عيون علاء بصدمة وبعد إيده علي لجين ويشوفلها...
لجين حست بفظاعة اللي قالاته: قصدي إنه....يعني.....😓
مازادهاش علاء ولا كلمة طبس خدي مفاتيح الدار وطلع منها.....
~~~~~~~~~~~~~~~~~~~~
طول الليل لجين ماجاها نوم.....مع الفجر توضت وصلت..غمضت عيونها بتعب وغفت....
علاء نزل هو والاء يفطرو ......
الاء: كان خليتني نفيق لجين مش خير...
علاء يرشف في القهوة بجدية: لا خليها ترقد براحتها...بعدين نطلبولها الفطور..
الاء: باه بنمشو ونخلوها بروحها....
علاء: مش حنتأخرو عندنا موعد في السفارة ضروري عشان نتمو موضوعنا ....
الاء: باه كيف بنتفاهمو معاهم مانعرفوش نتكلمو لغتهم...
علاء: بعد شويا حيجينا واحد من السفارة ونمشو معاه...
الاء: اها.. فهمت عليك
علاء يقلب في تليفونه بملل وعقله مش معاه نهائي
شويا ووصل مندوب السفارة....وامشو معاه علاء واخته....
فاقت لجين بالرغم من أنها مازال نعسانة...شافت لسرير الاء بااستغراب لما لقاته فاضي...
لجين تنادي فيها : الاء...الاء... حي وين امشت😕
غيرت حوايجها وامشت لدار علاء توقعت ان الاء ممكن تكون عنده....
دقت ع الباب اكثر من مرة ومافيش رد...لجين حست بخوف: حي وين امشو وخلوني 😨😢
رجعت للدار طلعت الاب متاعها وحاولت تفتح النت يمكن تلقي ربا فاتحة.....بس بدون فايدة لقتها امسكرة....
لجين: اووووووف ....مليت 😣....خدت مفتاح الدار وشنطتها ونزلت ....
رجع علاء للفندق بعد مااتفقو مع السفارة ووضحولهم شن هيا المصحة اللي حتتكفل بحالة الاء....
الاء: خلي نمشي نشوف لجين أكيدة انشغلت علينا...
علاء ماردش عليها وقعمز في صالة الفندق.....
ركبت الاء دورت علي لجين مالقتهاش....نزلت تجري: علاء لجين مهناش...
علاء بخوف: كيف مهناش !!!
الاء: قلبت عليها الدنيا مش قاعدة
علاء: وين مشت؟! المشكلة حتي شفرة مازال ماخديناش.....كيف بنوصلو فيها توا....
الاء: يمكن تتمشي في الحديقة لتحت....
علاء: تعالي ندورو عليها...يمكن علي قولتك في الحديقة...
قلبو عليها الحديقة والمطعم وكل الفندق ومافيش فايدة مش موجودة....
علاء توتر:وين مشت وين؟!!
الاء: يمكن تعرف حد مشتله😓
علاء: مستحيل...كانت قالتلي...تعالي نحاولو نسألو عليها الريسبشن يمكن نقدرو نفهمو منهم حاجة....
فاتو ساعتين ولجين مازال غايبة عن الانظار علاء قريب ينجن مش عارف كيف يتصرف....
واقف قدام باب الفندق يحاول يسأل الحارس يمكن شافها....
فجأة قرب شرطي منهم ووراه لجين كانت عيونها محمرة من البكي....
علاء شهق: لجين😨...جبدها لحضنه بخوف...حس روحه حيغمي عليه من الخوف وصوت أنفاسه المضطربة كان عالي: وين مشيتي...وين كنتي؟
لجين بصوت باكي: علاء اني خايفة 😢
علاء مسك وجها بكفوفه الاثنين: لجين فيك شي؟! شن صار احكيلي
لجين: طلعت بنتمشي معاش عرفت نرجع 😭....
تنهد علاء وضمها لصدره من جديد: حرام عليك موتيني من الخوف...
لجين بعبرتها: أسفة 😪
علاء هدي شويا لما تأكد إنها بخير.....جبدها من إيدها بغضب وخش للفندق....
~~~~~~~~~~~~~~~~~~~~~~~~~
لجين تشوفله بخوف....ركب الدروج بسرعة وغضب وضاغط علي إيدها....
لجين تشوفله بخوف.....
طق علي غرفة الاء...وفتحت....
الاء شهقت : لوجي وين كنتي؟!😱
خش علاء وسكر الباب: نبي نفهم لو ضعتي يامدام...او حد من فروخ الحرام دار فيك شي....شن حيصير فيا بعدها
لجين: 😢
علاء: أصلا انتي علاش طالعة من غير إذن وبروحك فهميني😡..امتي بتكبري وتحطي عقلك في راسك
لجين غطت وجها بكفوفها وزادت في البكي...
الاء: خلاص علاء...المهم هيا بخير
علاء: لا مش خلاص 😡...أخر مرة تتصرفي من راسك يالجين....فاهمة أخر مرة.....طلع وقربع الباب
لجين طاحت ع السرير وانفلقت بالعياط.....
الاء قعمزت تمسح علي ظهرها: خلاص لوجي....هوا بس كان خايف عليك صدقيني...
لجين ماردتش واستمرت في البكي 😭😭
خش علاء لغرفته بيطربق يخبط في الكرسي برجليه....قعمز ع السرير وحط راسه بين إيديه:الحمد لله يارب إنها بخير...الحمد لله 😪
قام التليفون واتصل بغرفتهم...ردت الاء :'ايوه...
علاء: قاعدة تبكي والا سكتت؟!
الاء: خشت للحمام...شكلها بتاخد دوش...
علاء تنهد : باه لما تطلع كلميني عشان نطلبلكم الغدي...تغدو
الاء: باه...ان شاء الله
طلعت لجين من الدوش نشفت شعرها تكمكمت في الغطاء ورقدت...
طلب علاء الغدي وقعد يستني فيهم تحت.....
نزلت الاء....بدون لجين...
علاء: لجين وين؟!
الاء: قالت ماتبيش...
علاء:شن كيف ماتبي حضرتها يعني😒 قعمزي انتي وتو نمشي نشوفها.....
خدي مفتاح الدار وامشي....فتح الباب...قرب من السرير....
كانت لجين راقدة بعمق.... نزل علي ركبته وقابلها....شافلها بحنية ومسح قطرات العرق المتجمعة علي جبينها وهمس: قداش ماتعفلقي فيا...بس مانقدرش نزعل منك مش عارف ليش.... شن اللي غيرني وغير مشاعري تجاهك مانعرفش...قرب باس جبينها وطلع....
~~~~~~~~~~~~~~~~~~~~~~
بعد المغرب فاقت لجين مضايقة من مغص في معدتها....نحت الغطا..كانت الاء تتفرج ع التلفزيون .
الاء: صح النوم لوجي ☺
لجين عقدت حواجبها بألم: سلمك....
الاء:أكيدة جيعانة....نكلم علاء يطلبلك حاجة تاكليها
لجين: لا لا ماخاطريش...طلعت شنطتها وقعدت تقلب فيها بتوتر: اوووووف....حقا نسيت إن الشنطة مش اني اللي جهزتها 😣
الاء: خير لجين تبي حاجة....
لجين: أه...لا لا صحيتي حبيبتي...رجعت للسرير وتغطت.....
فات الوقت...ورقدت الاء من التعب....اما لجين كانت تتقلب من المغص اللي بيقطعها...معاش قدرت تتحمل....لبست عبايتها حطت وشاحها علي راسها....وامشت لغرفة علاء
فتح علاء الباب واستغرب من وجودها...
علاء: لجين!!!!! خيره وجهك أحمر 😨
لجين مرتبكة: أه....نبي نقولك....يعني......قربت من وذنه وهمستله:*********
علاء: أه....اوكي....وقعد يمسح علي شعره بارتباك: شفت صيدلية قريبة من الفندق ....اكتبيلي اللي تبيه في ورقة بلغتهم عشان يفهموني...
لجين: باه....
علاء: تعالي خشي ارتاحي اهني....لين نمشي ونجي
لجين هزت راسها بموافقة وخشت....
خدي علاء جاكيته ونزل للصيدلية....جاب المطلوب...وفي طريقه مر علي مقهي الفندق وطلب طاسة بابونج دافية...
مسكت لجين بطنها تتوجع وقعمزت ع الكنبة تستني في علاء بفارغ الصبر.....
علاء قعمز جنبها ع الكنبة: هوا خودي حاجة دافية....وهاذي حبة مسكنة..
لجين منحرجة: اوكي.....
علاء : شويا وحتكوني كويسة....وقف خدي الغطاء من ع السرير حطه علي كتوفها...وقعمز في جنبها...
لجين ابتسمت علي حنيته عليها..
لجين ترشف في البابونج: علاء نسألك سؤال....
علاء: شنو؟!
لجين: بالله عليك كيف ركبتوني الطايرة من غير مانحس...
علاء: 😂سر
لجين: باالله عليك علاء قولي 😒
علاء: عطيناك اكتوفيد قوي شويا 😂
لجين: معقولة....😱
علاء: اي....وكل شي بمساعدة ربا طبعا....جهزتلك شنطتك وغيرلتك حوايجك....وخصوصا لانك رقدتي عندها الليلة اللي قبل الرحلة فسهلتي علينا المهمة....الصبح نوضاتك وعطاتك طاسة امية فيها المنوم ....ورحتي فيها..😂.
ضياء جابلنا كرسي مقعدين...حطيناك عليه ودخلناك للمطار عأساس مقعدة وراقدة تعبانة 😂 ومع شوية ترشريش فلوس تم الموضوع 😈
لجين: شريرين 😣😒
علاء: باه نسألك حتي أني سؤال
لجين: شنو؟!
علاء: انتي فعلا مش طايقتيني
لجين ارتبكت: لا مش قصدي....نقصد.....وتلعثمت في الكلام
علاء: ههههههه باه غير كملي اشربي ..بنمشي ناخد دوش ونجيك
لجين: اممممباه ....كملت لجين البابونج حست بالوجع خف عليها شويا....امتدت ع الكنبة وتغطت....
.طلع علاء من الحمام وشافها راقدة: لجين...لجين...فيقي....ماردتش عليه....
قامها حطها ع السرير وغطاها كويس....
كان عنده شوي اوراق خاصة بأمور علاج الاء عباهم...وكملهم..
فرش ع الكنبة بس ماقدرش يرقد عليها...ناض امشي للسرير امتد بشويا وخدي لجين في حضنه....بالرغم من صغر السرير الا أنه ضمهم بحب الاثنين...
لجين تخترف وعاقدة جبينها: بابا.....
علاء زاد حضنها......ويمرر في إيده علي ظهرها بحنية يحاول يطمنها ويخفف عليها الوجع.....
~~~~~~~~~~~~~~~~~~~~~~~
صباح اليوم التالي...
فتحت لجين عيونها بعد ماحست بريحة عطره محاصرتها....ابتسمت لما لقت روحها في حضنه وقربت منه اكثر فرحانة.....
علاء: أخيرا نضتي ياكسولة
لجين شهقت: انت فايق؟!
علاء: اي وكنت نستني فيك تفيقي ياكسولة ....مكبشة فيا مش قادر نتحرك منك 😁
بعدت لجين عليه: ها بعدت 😒
علاء: 😂😂... بري غيري حوايجك بسرعة....عندنا موعد في المصحة علي خاطر الاء....
لجين: باه.....امشت للدار عند الاء...لقتها تغير في حوايجها ساعدتها ومشطتلها شعرها....بعدها بدلت حتي هيا ونزلو....
طلبو الفطور....وبعدين امشو للمصحة....
الاء متوترة وخايفة....لجين جنبها: ماتخافيش للوش...اليوم كله فحوصات واختبارات بس
الاء: زعما مايوجعش...
علاء: خيرنا عاد للوش نعرفك ديما قوية....
الاء تنهدت براحة: اوكي...مش حنخاف....وكل شي من ربي كويس...
طلعت الممرضة ونادت علي الاء وخشو للدكتور....اما علاء ولجين قعمزو يستنو علي كراسي الانتظار....
علاء:علاش لابسة خفيف شن ناسية انك مريضة 😒
لجين: مش صقعانة....
نحا علاء جاكته ولبسهولها....: انتي بتعرفي مصلحتك اكثر مني يعني .....
ابتسمت لجين ولفت وجها للجيهة الثانية ماتبيش تبين...
علاء بتوتر: تصدقي خايف اكثر منها ....
لجين: علاش علاء...صدقني حتكون كويسة...المانيا من أحسن الدول في زراعة الاعضاء....
علاء: ربي يستر....والله مانتحمل فيها حاجة...
لجين:ربي يسلمها وتكون كويسة....بعدين مازال بدري ع الخوف...قاعدة في المراحل الاولي
علاء مسك إيدها وباسها: يارب....
لجين انحرجت ووقفت: اني جعت...نبي ناكل
علاء ابتسم: قبل شويا فطرنا 😁
لجين: نبي ناكل...
علاء: اوكي استني...لفها ليه وقعد يسكرلها في سوستة الجاكيت قام عيونه وتلاقت بعيونها: عشان تدفي...
لجين : شكرا....
علاء بحنية: لجين...ن..... وتوسعو عيونه بصدمة وهو يشوف لنقطة معينة ورا لجين .....
لجين استغربت من صدمته.....ولفت بسرعة....مافيش حد بس كأنها لمحت حد خطم بسرعة.....
علاء جمد في مكانه بدون ولا كلمة.....اما لجين تشوفله بااستغراب مختلط بخوف...شن اللي جمد ملامحه للدرجة هاذي ومنو وشنو اللي شافه.....:
يتبع
~~~~~~~~~~~~~~~~~~~~~~
أنت تقرأ
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
