عبدالله: مادام فيا نفس مستحيل تكون ليك 😠
لجين: بابا 😱
لؤي: 😳....أأ ياعمي انت فهمت غلط 😨
عبدالله: بالعكس فهمت صح وصح الصح معاها....هاذا جزائي إني وثقت فيك وفنحتلك حوشي 😡
لجين: بابا أني 😓
عبدالله بعصبية: ضمي فمك 😡واسبقيني للسيارة
لجين ؛ حاضر....ونزلت بسرعة
عبدالله: وانت وجهك معاش نشوفه لا في الشركة ولا في الحوش...مستحقاتك حتوصلك كاملة بس من اهني وجاي أنسا واحد اسمه عبدالله...وإحمد ربي إن الحكايو وصلت بس لاهني والا والله كنت قتلتك بإيديا.
لؤي بأرتباك: الحيوان هاذا يكذب ياعمي ويبي يفرق بيني وبينك 😨
عبدالله: سمعتك بوذاني مافيش داعي حد يقولي...ياخسارة يالؤي ياخسارة ....وطلع
علاء طلع وراه...لؤي بصوت عالي: والله لما نوريك ياعلاء الكلب والله.....والايام بينا 😡
ركب عبدالله في سيارته معاه البنات وعلاء وراه بالسيارة الثانية....
وصلو للحوش...عبدالله جبد لجين من إيدها ونزلها.....علاء نزل وراه خاف يضربها ....
علاء: ياعمي مش هكي 😨
عبدالله كان واصل حده: هاذي أخرة تربيتي ليك يالجين 😡
نجاح طلعت من المطبخ : شن في خيركم؟؟ 😕
عبدالله: هاذي الهانم...بتكمل باقي مشوار الضياعة وقلة التربية اللي كانت عايشته.أخر مرة قصة السكير وفوتناها بس الباين مافيش فايدة 😡
لجين شافت لعلاء اللي كان مستغرب من اللي يسمع فيه...حست بالاحراج وكأنها ماتبيش يعرف عليها هالكوارث.....
نجاح: شن دارت هالمرة؟!
عبدالله: تبي توطي راسي....وتفرط في شرفها وسمعتها 😡
نجاح: انت شن تقول 😱
عبدالله: نبي نعرف بس في شنو قصرت معاك وشنو نقصت عليك...اللي تبيه عندك وقبل حتي ماتكملي طلبك....مية بنت تحلم تعيش عيشتك 😡 علاش مصرة تجلطيني بعمايلك علاش؟؟
لجين بصوت عالي: هاذا مش كل شي يابابا...مش كل شي فلوس وفيلات وخدم 😢.....في حاجات هلبا ناقصيني...ناقصني حد يحس بيا😢 ناقصني حد يكون جنبي ونحس بحنيته وخوفه عليا....أني ماانحرمتش من ماما ومن حنانها بس انحرمت حتي منك انت😢...التهيت عليا بأشغالك ومشاغلك وكنت تعتقد ان الهدايا والفلوس حتعوض وتسد الفراغ اللي مخليه ...ممكن تقولي قداش ليك مااحضرتش حفلة عيد ميلادي؟! كل عيد ميلاد توعدني وماتحضرش نرقد ودموعي علي خدي لين كرهت أعياد الميلاد 😢...أني يتيمة الام والاب...وكل هالعز اللي عايشة فيه علي قولتك ماقدرش ينحي إحساس اليتم من داخلي.. عشان هكي كنت ندور علي حد يعوضني يمكن نلقي عنده اللي ناقصني ومالقيتش قدامي الا لؤي....
عبدالله الصدمة من كلام بنته سكتاته.......
ربا ونجاح: 😢
لجين ركبت لدارها ودموعها مطر علي خدودها أخيرا قدرت تطلع كل اللي في قلبها....
علاء لأول مرة يحس بالشفقة فعلا علي لجين ماكانش متوقع كمية الوجع والالم اللي داخلها......
~~~~~~~~~~~~~~~~~~~~~
رجع علاء للحوش راسه امشوش من كل اللي صار....
فتح الباب: السلام عليكم
ابوعلاء: وعليكم السلام...
ضياء: جيت وربي جابك...تعالا إقلي البطاطا
علاء: 😏 ترا فوتني مش رايقلك
ضياء: منو بيقليها...أني إيدي مانقدرش....ساد قشرتها 😡
الاء: هات تو نقليها أني
ضياء: تو مش ليا ساعة نتحايل عليك يامشفشفة وتقولي عندي واجب 😳
الاء: هات أحسن مانغير راي 😌
ضياء: هاك 😒
خش علاء يدوش....طلع صلي العشي وامتد في فراشه يفكر...
الاء: خيرك علوش؟!
علاء اتكي علي جنبه: مافيا شي...شوية صداع...كملتي واجباتك ؟!
الاء: مازال شويا...نكمل البطاطا ونرجعلهم
علاء وقف: بري شوفي واجباتك....تو نكملها
كمل علاء وجهز العشي كالعادة....حطلهم الصفرة وبيمشي يرقد...
ابوعلاء: تعالا اتعشا
علاء: صحة ماخاطريش...تصبحو علي خير
ابوعلاء: علاء مش عاجبني اليوم....زعما شن في؟!
الاء: اي صح حتي أني لاحظت..
ابوعلاء: ان شاء الله خير....
تكمكم بالغطا ...يحاول يرقد بس مش جايه نوم....ضرب علي ربيعة ماردتش عليه زاد اتنكد....
ضياء: خيرك يازعيم اليوم مش علي بعضك ؟!
علاء؛ مشاكل في الشغل....
ضياء: احكيلي
علاء: ماخاطريش مرة ثانية نحكيلك😪
ضياء: باه براحتك....اي حقا نبي نقولك علي حاجة عشان بعدين ماتقولش ماعنديش علم
علاء: خير...
ضياء: احم احم...اني قررت بنتزوج
علاء انفلق بالضحك ،😂😂
ضياء: ههههه 😏 حلوة النكتة صح
علاء: تهبل 😂
ضياء: نتكلم بجد 😡
علاء: باش بتتزوج ان شاء الله ووين بتسكنها...ومنين بتصرف عليها وحضرتك عايش ع التمشيط مني ومن الاء 😒
ضياء: مش توا توا بنتزوجها 😣...المهم نبي نتزوجها وخلاص
علاء: ومن هيا طايحة السعد 😏
ضياء: ربا 😌
علاء: هههههه😳 دمك شربات اليوم
ضياء: نتكلم بجد
علاء: أنسا الموضوع ونحيه من راسك
ضياء: وعلاش؟!
علاء: ماتجرحش البنت...انت في حاجات ماتعرفهمش
ضياء: نعرف كل شي...ربا حكتلي كل شي
علاء:............
ضياء: وعادي راضي بيها ....ربي يغفر ويسامح...والبنت تابت ونادمة
علاء: باه نسألك سؤال؟!.وتجاوبني بصراحة
ضياء: تفضل
علاء: لو كانت ربا ليبية كنت حتتزوجها لو عرفت عليها اللي عرفته ...
ضياء: مانعرفش 😨
علاء: معناها مش قصة ربي يغفر....قصة انها مش ليبية فعادي نتقبلو أغلاطها اما بنت بلادك لا ....مع أنها الاولي انك تستر عليها لو تابت
ضياء: تي لا مش هكي...بس ....بس ....مانعرفش أني لو نحبها وعارف انها ندمت فعلا عادي
علاء: اي صدقتك 😏
ضياء: انت حر😏...المهم حبيت نقولك وخلاص
علاء: عقلك في راسك وانت تعرف مايصلح بيك
ضياء: يعني انت موافق؟!
علاء: هاذي حياتك انت...اني يوم تغلط في البنت او تجرحها حتلقاني قدامي ونحاسبك ...لأن بغض النظر البنت صح او خطأ مايحقلكش تلعب بيها او تجرحها...اي شخص في هالعالم يغلط...المهم مايستمرش في غلطه...
ضياء: تي انت شن تقول😳....والله نحبها ومستحيل نلعب بيها او حاجة...ولو حالتي تسمح كنت تزوجتها اليوم قبل غدوة...
علاء: غريب والله 😁 ضياء يحب ويبي يتزوج
أنت تقرأ
ياريتني
Roman d'amourالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
