فاقت لجين مخلوعة.....
ألاء طلعت بسرعة وسكرت الباب.....
لجين غمضت عيونها توقعت حيكسرلها رقبتها علي عملتها....
علاء وقف: ممكن نفهم شن إسمه اللي اديري فيه 😡
لجين تتكلم بشويا علي خاطر سنها: أسفة 😓 سني وجعتني هلبا..قعدت نفيق فيك وانت ماتردش شكلي نعست رقدت😴 بدون مانحس
علاء: ياعيني بدون ماتحسي مكبشة فيا ولافة روحك بالبطانية معاها 😒
لجين باارتباك: اممممم خلاص...هاذا اللي صار توا...سوري 😪
علاء: توا ألاء شن بتقول علينا 😡 ..وكيف بيطلع
لجين: باه وين بتمشي؟!
علاء: بنمشي نصلي الفجر عندك مانع😑
لجين: لحظة حتي أني بنصلي 😶
طلع علاء بدون مايرد عليها
لجين: 😜😁 وحطت إيدها علي قلبها الحمد لله مشت علي خير
توضأ علاء وطلع للصالة بيصلي بيهم ..كانو يستنو فيه ومعاهم لجين..لما شافها اذكر عملتها وقرن حواجبه...
كملو صلاتهم....علاء خدي فراشه وبطانيته وامشي للمربوعة بيرقد فيها...
لجين: يحسابني ميتة عليه 😏😢....ورجعت رقدت
مع الساعة 8تقريبا...
علاء يمشط في شعر ألاء بيرفعها لمدرستها...
الاء: علاء مقشوط ارخيه شويا 😣
علاء: ها....هكي باهي
الاء: تمام 👍
ابوعلاء: علاء شفت مرتك بالك تبي شي ع الفطور
علاء: ماتبي شي يابوي 😏
ابوعلاء: سألتها؟؟
علاء: اي سألتها 😒... هيا ألاء تأخرنا
ابو علاء: استني افتحلي تلفزيون المربوعة خلي نمشي غاديكا عشان مرتك تاخد راحتها
علاء لما يسمع كلمة مرتك يركبه ستين عفريت 😂: باهي يابوي 😣
في الطريق يتصل علاء بهيثم ويلقي في تليفونه مقفل...
علاء: نهارك الاحرف يااستاذ هيثم 😡
الاء: علاء..لجين بتقعد معانا ديما
علاء: لا اليوم بس
الاء بااستغراب: كيف مرتك هاذي
علاء: اوووووف معاش تقوليلي مرتك 😡
الاء: ،😕
علاء: هيا انزلي وصلنا 😒
~~~~~~~~~~~~~~~~~~~~
لجين تتكسل في السرير...وكل ماتذكر اللي صار تبتسم..
فتحت الباب وطلعت تبي تكلم علاء يرفعها للحوش بتاخد دوش وتغير حوايجها....
استغربت من الهدوء في الشقة وتوقعت إنه مشي يوصل في ألاء....
لجين: اوووف علاش مافيقني كنت روحت للحوش...
فتحت الدار اللي جنب دار ألاء ...كانت فاضية فيها شنطة الباين إن فيها حوايج علاء...
فتحت الشنطة وقعدت تقلب خدت منها قميص طويل وطلعت......
مر علاء ع الكوشة خدي خبزة سخونة وروح للحوش...
فتح الباب وامشي للمطبخ بيجهز الفطور وهنا كانت الصدمة
علاء: هاذا شنو 😳
لجين: صباح الخير 😓.. أسفة مالقيت شي نلبسه
كانت لجين لابسة قميص علاء واصل لفوق ركبتها بشويا ولامة شعرها لفوق وتشلفك بشبشبه 😂
علاء قعد يشوفلها مستغرب وقرب منها: هاذا قميصي صح ؟!
لجين بارتباك: أه... اي...😪
علاء بهمس ومعصب: انتي أكيد إنجنيتي ...هاذا منظر تقعدي بيه...بعدين توقعي عمك يشوفك بالمنظر هاذا شن حيكون موقفك 😡
لجين ابتسمت بفرحة من كلمة عمك...حست إنها زوجته فعلا
علاء انتبه وقعد يلكلك: قصدي بري نحيه قميصي 😡
لجين: باهي روح بيا ماعنديش مانلبس 😣
علاء: باهي...بري البسي حاجة زي الخلق كيف بنروح بيك😡
لجين : باهي علاش العياط
ابوعلاء جاي من المربوعة لما سمع صوت علاء: علاء ؟! وينك انت؟!
علاء: 😱 بوي ...
لجين تنقز علي روس صوابعها: حي وين بنمشي 😱
علاء:مسكها من إيدها وايدور في مكان يدسها فيه...تعالي اهني ورا الباب تتحركي نهارك اسسس
لجين: باه 🙊
خش ابوعلاء: إنادي فيك علاش ماتردش
علاء: أه 😨.. سامحني ماسمعتكش يابوي
كان علاء متكي ع الحوض باارتباك ولجين مقابلته ورا الباب أما ابوعلاء عاطيها بالظهر..
ابوعلاء: جهز الفطور بسرعة...مرتك قريب تفيق...مسكينة أكيدة أمس سهرتها سنها
علاء: حاضر يابوي 😨. وقعد يأشر للجين براسه معناها اطلعي
وهي زي العبيطة تأشرله بإيدها بمعني شنو مافهمتش...
علاء مسح وجه بنرفزة من غبائها: ارتاح انت يابوي في المربوعة تو نجهزه.... ويشوف للجين 😒
ابو علاء: باه سلم ولدي ....وطلع
علاء: تحركي قدامي 😡
لجين: باهي 😶
ابوعلاء مازال ماوصلش المربوعة: اي حقا علاء نسيت نقولك جبد علاء لجين بسرعة وخباها ورا باب الصاله...بين الباب والحيط...
علاء متوتر: نعم يابوي
ابو علاء: جبت خبزة؟!
علاء: اي جبت يابوي جبت 😣
ابوعلاء: باه سلم ولدي.... وامشي
علاء: اوووف....فتح الباب: هيا امشي فضحتينا
لجين شادة خدها ومغمضة عيونها والدموع ينزلو ..
علاء قعد بشوفلها بخوف: خيرك؟!
لجين تضغط علي خدها وتأشرله بأشارات مش مفهومة..
علاء: تي شنو في؟! 😳
فتح دار الاء وخشو فيها....
لجين قعمزت ع السرير وتبكي.....
علاء: افتحي فمك ترا
فتحت لجين فمها وكان امعبي دم....الباين انها خبطت ع الحيط وقت علاء يدس فيها علي بوه...
علاء: 😨 شكله الخياطة انفتحت....راجي...امشي بسرعة للمطبخ جاب مناديل فيهم ثلج وحطهولها علي خدها...
لجين تأشرله من جديد وتبكي....
علاء: تي شنو؟!
لجين تأشرله من جديد بنرفزة 😡
علاء: تي شنو مافهمتش
ضرباته لجين علي صدره...وطاحت ع الفراش تبكي
علاء: تي خيرها هاذي 😕😣... ألبسي حاجة نرفعك للعيادة وخلاص
~~~~~~~~~~~~~~~~~~~~~~
نجاح ممتدة ع السرير جنب هيثم...اللي يلاعب في شعيراتها بحب وحاط راسه علي كتفها..
نجاح: زعما لجين شن صار فيها؟!
هيثم: مانعرفش...بس اللي متأكد منه حاليا...علاء كان يشوفني بيقتلني 😂
نجاح: ههههههه بالرسمي..... زعما ربي يهديه ويقدر حتي يحبها
هيثم: مانعرفش...علاء طول عمره شاب يخدم علي راسه ولاعنده في قصص البنات ولاحبهم...ولما تعرف علي ربيعة حبها بجد ومن قلبه وكانت هي الحب الأول ليه...عشان هكي مانلوماش لما يقولي مانقدرش نسعد لجين..لأنه عارف مش حيقدر يحبها بنفس قوة حبه الاول...وبعدين هو أصلا مازال جراحه مفتوحة صعب يفكر في الحب حاليا
نجاح تنهدت: يعني حب من طرف واحد😩...أصعب منه مافيش ربي يعينها لجين...
هيثم باس كتفها بحب: ماتندريش ع الوقت شن داس...ممكن لجين تقدر اضمدله جروحه وعلي إيدها يتعالج حتي لو مش بشكل نهائي ع الاقل ينسي ....
نجاح: ان شاء الله
هيثم: أسمعي ...جهزي حوايج لينا وللصغار بنمشو ندهورو في لبدة ونباتو غاديكا
نجاح: وعلاش؟!
هيثم: 😂 خلي حتي اليوم علاء يدبس...
نجاح: لا لا حرام عليك
هيثم: لا حرام لاشي...نوضي بسرعة
نجاح: باه نبي نطمن علي لجين كيف الحل 😓
هيثم: بعد نوصلو غاديكا نتصلو بيها...توا تليفونك ردي بالك تفتحيه..
نجاح: يستر الله من أفكارك....
وسمعو صوت طق خفيف ع الباب
هيثم: هاذي دودي 😒... لبس قميصه وفتح: نعم ؟!
ردينة: وين عمتو نجاح 😌
هيثم: شن تبي فيها؟! 😒
ردينة: دوة ابنيات عيب يابابا تخس فيها 😱 وخشت تطنقش
هيثم: 😳
~~~~~~~~~~~~~~~~~~~~~~~
أنت تقرأ
ياريتني
Romanceالقصة منقولة من صفحة عالفيس اسمها 'قصص من عالمي' القصة رومنسية وفيها مشاعر مختلطة. طبعا القصة جزئين . الأول اسمها ياريتني . الثاني إسمها نسيت أنساك. إن شاء الله حنبدا انزل الجزء الأول ولو ف تفاعل حنزل الجزء للثاني
