ياريتني

الحلقة11

جابت لجين الاب توب وإيديها يرجفو ...حطت ال CD وخايفة من اللي ممكن يكون فيه ...
شوي شوي بدت الصورة توضح وانصدمت لجين من اللي شفاته...
لجين بشهقة: مستحيل مستحيل 😳..هاذا إنسان مجنون
طق الباب....سكرت لجين الاب توب بسرعة: ايوه تفضل
عبدالله: صباح الخير علي بنوتي الحلوة 😍
لجين: اهلين بابا صباح النور 😓
عبدالله: علاش قاعدة بروحك وامسيبة صاحباتك
لجين بأرتباك: آه....اي شويا وبننزل 😓
عبدالله: كارلوس وميشيل وطوني في الفندق ....قلت لعمتك تجهزلنا اغدي حلو اليوم تعويض لحفلة أمس اللي ماحضرتهاش....وتعويض لاصحابك علي تفركيشة الحفلة
لجين: زي ماتشوف بابا
عبدالله: وقرايتك شن صار فيها؟!
لجين عقلها مش معاها وتحاول تجاوب علي أسئلة بوها: ماشية أمورها تمام...عندي 3ايام في الاسبوع والباقي عطلة
عبدالله: باهي تمام...وشن دايرة مع علاء؟!
لجين: آه 😓
عبدالله: شوفي يابنتي هالولد هاذا لو ندور الدنيا كلها مش حنلقي سواق مخلص ووفي زيه...ونأمنه علي حوشي وعليك انتي وعمتك...سبحان الله قداش عنده نخوة وشهامة لو واحد غيره كان يقولك في النهاية عمل وشن دخلني فيهم...لكن هوا محافظ عليكم تقول حد من عيلته...عشان هكي معاش نبيك تزعليه من اهني وجاي هوا يبي مصلحتك.وبلا تصرفات طفولية انتي 19 سنة توا....مازالك سنة وتقدري تستلمي أملاكي وتقعدي حرة في التصرف يعني كبرتي  ولازم تنتبهي لتصرفاتك....
" نعتبرو إن سن الرشد في ليبيا 20 مش 18 لغاية في نفسي"
لجين: حاضر 😪
~~~~~~~~~~~~~~~~~~~~

علاء: الحقير..😡
ربا: شفت كيف إنك ظلمت لجين
علاء: هي اللي عطاته الفرصة عشان يتجرأ عليها ياربا،😏....البنت لما تحافظ علي نفسها وعلي سمعتها مايقدرش كلب يتجرأ ويحط عينه في عينها بس....لكن لما هي ترخص روحها الكل حيطمع فيها
ربا نزلت راسها بأحراج من وضعها: لؤي حقير...ونحنا بنات صغار كلمة بتاخدنا وكلمة بتودينا
علاء : نسألك سؤال وتجاوبيني بصراحة...
ربا: أكيد
علاء: انتي تصلي؟! 
ربا بإرتباك: أأأ .....الصراحة لا 😓
علاء: شفتي....هاذا سبب ضعفك انتي ولجين بعدكم عن ربي... ومن نسي الله نسيه...
ربا بإحراج: يمكن
علاء: أكيد مش ممكن....حاولي تقربي من ربي ياربا وحتلاقي الراحة صدقيني...وبالنسبة للي صار معاك ربي غفور رحيم المهم تكون النية صادقة في التوبة
سرحت ربا في كلام علاء وسكتت
علاء: هيا نوضي نوصلك للحوش وبنمشي نكر السيارة اللي دقدقها السيد ضياء للرابش 😪
مر علاء علي حوش عبدالله...نزلت ربا وهوا خدي سيارة ثانية أصغر بيقضي بيها المشاوير اليومية ويوفر الطلبات كالعادة
لجين كانت مع صديقاتها مكسدين في الحديقة بس عقلها مش معاها
ربا: هاي بنات 😙
البنات: هاي ربا
لجين: وين كنتي 😒 أكيدة مع علاء
قربت منها ربا وبصوت واطي: شو غيرانه 😉
لجين: عينك😒...تعالي معاي...نستأذن صبايا هلا بنرجع
البنات: اوكي...
ربا: شوبيكي؟! 😕
لجين: تعالي شوفي الكارثة .....
ركبو للدار وفتحت لجين الدسكة وشافتها لجين...
ربا: شو هاذ 😱...هيدا علاء 😓... كيف هيك ؟!
لجين: شفتي الحقير...فبرك الفيديو وخلاه كأني في وضع بايخ أني وعلاء 😓
ربا: طيب من وين جاب الصور؟!
لجين: أكيدة صورني فيديو وأني غايبة عن الوعي الحقير....وممكن صورني وأني نحاول نتخلص منه
ربا: طيب ليش عمل هيك وشو بدو؟؟😨
لجين: مانعرفش...والله بننجن...ليش دار هكي ليش 😣
ربا: ضروري نخبر علاء
لجين : لا ردي بالك....هوا يكرهني 😢 وحيكرهني اكثر لوشاف هالفيديو
ربا: طيب كيف رح نتصرف😕
لجين: خلي نشوفو الحيوان لؤي شن يبي قبل
~~~~~~~~~~~~~~~~~~