إنتقام القدر
هولا_ هوشكالدن_ هلاو_ ناماستي _ أوهايو _ نيهاو _ سالوت _ وبكل اللغات مرحبا
اليوم جبتلكم كرونيك جديد عندي شحال مكتبتش الحكاية أصلية (لا للسرقة ههه) و تفاعلو معانا باه نستبنوها كامل هيا أتلمو و جيبو صحباتكم
الحلقة 1 :
آآآه لوكان نحكيلكم حكايتي حكاية اليامات كيفاه دور حكاية الزمان يلعب لعبتو و يضحك عليك .....منين نبدا و منين نخلص ... راح نبدالكم بالبطل تاعنا
أمجد صديق طفولتي و جاري في نفس الوقت يماه و يما معارف قدم و ديما عند باعضانا في المناسبات و حتى بلا مناسبات يعني تقدرو تقولو عايلة وحدة ... هذا أمجد عندو كاريزما و جاذبية كبيرة منعرف علاه البنات ديما يدورو بيه مام كي كان صغير و هو مايراطيش خلاص و كي كبار زاد زيان ولات ماتصحليش زوج كلمات معاه ... اييه المهم هو جاي طويل عندو لحية خفيفة شعرو نوار بالماغون عينيه خوضر بالماغون شابين بزاف
و ذرك جات دالتي علابالي بلي حابين تعرفو كيفاه عاملة أنا ....أنا قصيرة شوي ( أسمعو ماتقولوش عليا بينازا ...قلت شوييي برك ) و جايا خمرية وعينيا ماغون و شعري نوار طويل و مانيش محجبة أنا عادية مانيش زينة لهاذيك الدرجة بصح كامل يقولولي مسرارة و مهتمة بروحي
كي كنا صغار كنت نقرا مع أمجد في نفس القسم و كنت نغير بزاف كي تحكي كاش وحدة معاه ..اييه وكنت نموت بزاف على يمات الإمتحانات ( علابالي ... علابالي راكم تقولو كيفاه كاينة وحدة تحب يامات تاع الإمتحان ايي سقسوني علاه سع) باسكو كنت نروح لدار أمجد نقراو كيف كيف و نراجعو ههه ... و في الصيف كنا نلعبو و نتهارشو مع بعضانا جوزنا طفولة حلوة .... بصح في سويام و الليسي تبدل و بعد ولا يهتم ببنات أخرين و أنا حاملة و ساكتة و نشوف غير من بعيد
و عامنا تاع الباك أنا ديت و هو ماداش خسارة كنت حابة نكملو الجامعة كيف كيف بصح هو ماكانش حاط القراية في راسو كان حاب يتاجر و أنا مهتمة بزاف بقرايتي و حابة نتخصص في إدارة الأعمال
درت حفلة صغيرة للبنات و حفلة تاع العايلة كامل فرحولي وباركولي بصح أنا كانت فرحتي ناقصة
العشية خلاص كي راحو كامل الضياف طبطب الباب حليت لقيتو
أمجد: مبروك عليك تستاهلي العقوبة للدكتورا انشاء الله
روان: إن شاء الله تعيش
أمجد: هاكي هاذ الكادو مني صغير بصحي فكرك بيا
روان (قاتلتني الحشمة حلووف يعرف كيفاه يطيحك غير من هدرتو ): وعلاه شقيت روحك والله مارسي
أمجد : وشمن شقا راكي كي ختي كي مانشريلكش كادو ليك ليمن نشري
روان: آآه (مشوكية ماي فاهمة والو) مارسي مرة أخرى أنا ندخل ذرك (مع إبتسامة شايحة)
دخلت للدار و أنا دايخة مانيش عارفة إذا لي سمعاتو وذني صحيحة ولا كيفااه .... نغسل في الماعن و نخمم و ماما رايحة و جاية و أنا ماكملتهمش
سعاد :يا طفلة وش راكي ديري قريب ساعة و نتي تغسلي و ماكملتييييش ..
روان : آآه ماما وشنو (وشافت في الماعن و مبعد في ماما) والو ماما والو
سعاد :كيفاه والو راني نشوف فيك غايسة ...ويين راكي آه ؟؟
روان : كنت نخمم في التخصصات لي يمدوهالي و إذا راح يمدولي وش حابة ... هذا ماكان
سعاد : يمدولك وش تحبي ماتخميش ... ونتي أتكلي على ربي و لي فيه الخير هاذاك هو
روان: نتكل على ربيي ....ايه صح غير ربي لي يفهمني و يعرف وش فيه خاطري
سعاد في قلبها (وش بيها هادي ) : أيا صحا كملي الماعن نسحق الكوزينة تشعل باه نجي نطيب العشا
خلصت الماعن و رحت صليت باه ندعي ربي يفتحلو قلبو و يشوف قدامو مايشوفش بعيد على الأقل مايشوفني كي ختو تجرح زاف هاذي ......( و بقيت ندعي ونعاود)
أنت تقرأ
إنتقام القدر
Fanfictionكرونيك جزائري من تأليفي يحكي قصة طفلة حبت صديق الطفولة نتاعها بصح هو ماكانش مهتم بيها و تدخل في حياتو طفلة واحد اخرى و يولي مهبول بيها و هي تحاول دير مشاكل وشنو هي هاذ المشاكل ؟و كيفاه تطور هاذ العلاقة ؟ وين توصل ؟ راح تعرفو هذا و كثر مع الأح...
