| أمانة حيدر | ' باللهجة العراقية '

الفصل السادس

#أمانة حيدر
#بقلم:الراويه
#الفصل"٦"

بسم الله ❤🌹

.

جمال..

چنت اباوعلها بصدمه و اني اسحب الكرسي و گعدت عليه
بلعت ريگي و هي نزلت دموعها، اريد احچي كلمه حسيت الساني انعقد
اكثر من سبعة اشهر ما شايفها، شگد چنت احس بشوق و حنين الها
بس هسا ذكرت نفسي انها هي شنو

- جمال

حچتها و هي تسحب ايدي و تضغط عليها، سحبت ايدي بقوة و گلت و اني اعگد حواجبي

- شعندچ هنا ؟ و انتي شمدريچ اني مسجون

- اعرف ، اعرف كُلشي

حچتها و اخذت نفس نزلت راسها و تمسح بدموعها
الي چانت تهزني اما هسا مادري، فتور و برود اتجاهها و اتجاه مشاعر چنت شايلها الها

زفرت و شبكت ايديه گدامي و برود و تساؤل گلت

- ليش جيتي ؟ شتريدين ؟

- اشتاقيتلك

عگدت حواجبي و بديت اباوعلها و شلون رجعت سحبت ايدي و هي تظمها بين ايديها البارده

- البارحه عرفت انو انته انسجنت، ما تحملت الخبر و سألت عادل و گال باچر تگدرين تشوفينه

ما چنت اسمع شنو تگول، چنت اباوع لايديها الخاليه من اي اكسسوار، چنت ابحث عن الخاتم الي مطوق اصبعها البنصر
و چنت احس ببرودة ايديها البيضا
الي بگد ما بيضه حتى شرايين ايديها تبيين

رفعت راسي الها و اجت تحچي بس اني گلت بهدوء

- ايدچ بارده

تعلثمت من كلامي، و سحبت ايديها و خلتهن بحظنها

- خطيبچ ما يدري بيچ طالعه ؟ و بالتحديد جيتي تزورين حبيبچ السابق و وين ؟ بالسجن

- اني فسخت الخطوبة

حچتها و هي تنزل راسه و تشايك ايديها على الطاوله، رجعت تحچي و اني اباوعلها بصدمه و استغراب

- فسخت صار ٣ اشهر، ما گدرت احبه

سكتت لحظات و ضحكت بسخرية، هي الي چانت تخلي ايدها بأيده گدامي
حب سنه نسته بمجرد ما ان تقدم الها واحد، سنه كامله اني وياها بالشغل و بنفس المكتب نسته هيچ بدون ما تتردد

- و ضحكاتكم و سوالفك و غزلكم ابعض
و گلبي الي چان يحترگ، كل هذا و طلعتي ما تحبينه ؟

- جمال !

- لا تنكرين أيلاف، مو فرحتي من خطبچ ؟ مو انتي نفسچ اجيتي و انطيتيني كرت دعوه للخطوبه ؟
مو انتي الي گلتي الله يوفقك وي غيري

نزلت راسها و گامت تبچي، قهرني بچيها بس ذكرت نفسي انو هي الي تركتني
هي الي افلتت ايدها بنصف الطريق، چنت استعد بتكوين نفسي و اروح اخطبها
صح رب العالمين رازقني بس چنت احس نفسي محتاج بعد وقت قبل لا اروح و اطلب ايدها
باليل خابرتها حچيت وياها دقائق معدوده قبل لا تفصل الخط
باليوم الثاني اجت و هي تفاجئني انها انخطبت، تمنيت تگول غصباً عني..رفضته.. احبك انته و ما اعوفك
بس خابت ظنوني و هي تحچيلي اني انخطبت
و الله يوفقك وي غيري