| أمانة حيدر | ' باللهجة العراقية '

الفصل السابع

#امانة حيدر
#بقلم:الراويه
#الفصل"٧"

بسم الله

.

سلام..

- منو ؟

- احنا

انداريت ل يُسر و رجعت انداريت للباب
ترددت انو افتحو خفت لا يكونون اهل الميت
بس بالاخير عزمت الامر و فتحتو

شفتهم اربع زلم عگدت حواجبي لمن گال واحد

- السلام عليكم

- و عليكم السلام

- احنا أسفين على الازعاج بس..

حسيت نظراتو اتجهت ل يُسر انداريت عليها و رفعتلها تك حاجب و هي فهمت قصدي و فاتت جوه
رجعت انداريت للزلم و گلت

- لا عادي تفضلوا

- احنا مو گاعدين
بس احنا جينا نستفسر منك على شغله

- شغلة ايش ؟

- صراحه شفنا السيارة گدام الباب و خفنا اكو شي، و خصوصاً انو ابنا جمال وصانا على بيته

كتفت ايديه گدام صدري، و دحگلتو برود
ثواني سكتت قبل لا اگول

- اني مقدر خوفكم على البيت، بس اني رفيچه ل جمال و مثل اخوه، و اجينا هين لأن باچر عدنا زياره اله

التفت الزلمه للي واگف بصفه و رجع دحگلي و گال

- لا تفهمنا غلط اخويه، بس احنا استغربنا من شفناك نزلت و وياك اخته ل جمال

- و تقصد مرتي

حچيتها و ابتسمتلمهم شفتهم استغربوا و واحد گام يدحگ على الثاني

تحممت و گلت بسمه خفيفه

- اني عقدت عليها قبل لا ينسجن جمال، بس صارت الشغله على سكيته

- اذا هيچ ف الف مبروك
و نكرر اعتذارنا الك و جيتنا هنا و سؤالنا لأن جمال وصانا على البيت

- الله يبارك بيك خويه
لا معذورين

استأذنوا و راحوا
فتت و سديت الباب ورايه، حسيت انو جيتنا هين راح تثير الريبه و بالاخص اذا شافونا الجوارين

اجيت نروح لشقتي بس يُسر رفضت بحجة انها تريد تنظف بيت اهلها سكتت و ما حچيت شي

من فتت للصاله لگيتها گاعده و بحظنها ابنها و الايت على الطبله بالنص

- شبيهم ؟ شنو يريدون ؟

استقبلتني بسؤالها و اني بعدني ما گاعد بمكاني
گعدت و بضحكه گلت

- يريدون راس بصل

ما ضحكت و لا ابتسمت و اني سندت ظهري على ظهر القنفه و گلت

- يسألون شنو القصه و مستغربين من وگفت السيارة برا

ما چنت اشوف ملامحها زين بسبب الضو الي بدا يخفت
سمعتها تتنهد و هي تگوم من مكانها خلت حيدر على القنفه و طلعت
و هذا بس عبرت عتبة الباب شغل الصفاره، گمت عليه و اخذتو بحظني و هي دحگتلي من الباب بعد ما اخذت الايت و گالت