| أمانة حيدر | ' باللهجة العراقية '

الفصل الثاني عشر

#أمانة حيدر
#بقلم:الراويه
#الفصل"١٢"

بسم الله❤

.

يُسر..

من بعد اعتذاري الي اجا فجاة و بدون تفكير مرتين مني سكتت
و ما حچيت و اني اسمع كلامه، ضجت منه و اخذت موقف
مرت ايام بهدوء و تجنب من كلا الطرفين
چان يوم جمعة بوقتها
سلام البارحه چان بغداد راح زيارة ل جمال الي ما گدرت اروح بسبب حيدر الي اصابه زكام
و رواء عند اهلها و راح عثمان يجيبها بسيارة سلام، و سميه و بنتها لمياء راحن لبيت عمهم بالقادسيه معزومات على العشا و يمكن يباتون هناك

گاعدين بالمطبخ وقت العصر اني و رشا و عمتي الي يلفن كبة موصليه، مچنت اعرف اسويها
ف اباوع لعمتي الي تشتغل بيها على كيفها حتى اتعلم
و ورا محاولات فاشله گدرت اسوي وحده، و چانت تشبه كلشي الا الكبه
بس المهم تبقى محاوله زينه

رفعتها و اني ابتسم و احس بانجاز عظيم، باوعتلها عمتي وگامت تضحك
گلتلها و اني اتحفص الكبايه

- عمه ليش تضحكين ؟

- يا يمه شنو هاي ؟

- عمه غير كبه ؟

- هاي مو كبه هاي قنبلة مزنجره

حچتها رشا الي رجعت تلف و هي تبستم
هسا اذا اضربها بيها احد يگلي ليش ؟ بس لا حرمات اول تجربه الي ميصير اتلفها

رفعت راسي لباب المطبخ الي انفتح و فاتوا عثمان و رواء الي دفعها عثمان من ايدها و هو يحچي بصوت مصرور

- فووتي

مشت گدامه باوعتلهم حسيتهم مو على بعض، هي صنمت يم عمتي و سلمت عليها
باوعلها عثمان و گال

- امشي اصعدي فوگ يلا

- شبيكم ؟

حچتها عمتي الي تركت الي بيدها و التفتت عليهم

- ماكو شي يمه، يلا رواء اصعدي فوگ

خلت رواء ايدها على كتف عمتي و شكلها خايفه من عثمان الي عيونه تجدح نار

- عوفها للبنيه شبيك لحيت فوگ فوگ

- يمه خلي تصعد فوگ لا اكسر راسها

گامت عمتي من مكانها على اثر صوت عثمان العالي

- و انته شبيك تجوعر و شنو تكسر راسها بله

و قبل لا يرد سحب رواء من ايدها و مشى و هاي بقت ساكته و ما حچت
لحگتهم عمتي، و اني بقيت بمكاني وحدي بعد ما گامت رشا هماتين
بلعت ريگي من سمعت صياحهم صار واضح
عفت الي بيدي و طلعت من المطبخ چانوا واگفين بالصاله المفتوحه و رواء واگفه يم عمتي و تبچي، و عثمان يصيح بعصبيه

- يمه وخري عنها خلي اعرف اتصرف وياها
لأن يراد الها فركت اذن

- لا تصير عنتر زمانك فوگ راسي هسا
اهدأ و احچي شبيها مرتك ؟