| أمانة حيدر | ' باللهجة العراقية '

البارت السادس و الثلاثون

#أمانة حيدر
#بقلم الراويه
#البارت "٣٦"

بسم الله 💙

.

يُسر..

الصبح چنت بالمطبخ و رواء تكنس بالبيت
اندگ الباب و طلعت عمتي فتحته..چان جمال و اسمهان
هو اشر الي بيده و ناداني و اني مسحت ايدي من المي لأن چنت اغسل بالمواعين
رجت سلمت عليه و اني اباوع لاسمهان الي وجهها مزعوج و عبالك مغثوثه
سحبني على جهة و گلت بس لا يفتح موضوع بقائي هنا
فاتت عمتي و اسمهان جوا و اني گلت

- ها جمال

- شوفي يُسر..انتي تعرفين موضوع ايلاف مو صح

- اي..بعدين هاي شجابها هسا ؟

تنهد و گال

- البارحه العصر ورا ما اجينا من عدكم
اندگ الباب و چانت هي

- عزا العزاها شجابها

- سمعت بيه متزوج و جتي تبچي و تحچي
و هاي اسمهان تخبلت و من البارحه ما تقبل احاچيها بكلمه

كتفت ايديه و اني ازفر و هو كمل

- ف اريدچ تحچين وياها و تقنعينها انو والله ما بيني و بين ايلاف شي
و هي شافت بعينها شلون ما انطيتها وجه و طردتها

- انته حاچيلها عنها ؟

- مره توهمت بالاسم وياها بايام الخطوبه
و هي ما حچت..و هسا عرفت انو هاي ايلاف نفسيتها الي توهمت باسمها

- و ايلاف شسويلتها

- داگلچ طردتها !

- يعني صدگ ما بينكم شي ؟

گام يستغفر ربه و فرك على وجهه و گال

- بربچ يُسر، اني ارجعلها ورا كل الي صار ؟
شو عندي مراة و طفل على الطريق، شنو الجابرني ارجعلها

- و الله مصدگتك  بس ردت اقطع الشك

- لا خيتي اقطعيه
اني نسيتها لايلاف من فاتت اسمهان لبيتي

ابتسمت و هو تقدم و باسني من راسي و گال

- احچي وياها زين

- خوش

سلم و طلع سديت الباب وراه
و كملت شغلي و فتت للغرفة الگعده لگيتها هي و عمتي گاعدات
گعدت بصفها و گلت

- اي اسمهان شخبارچ ؟

- الحمدلله ماشي الحال

گتمت تتنهد و شكلها صدگ ضايجه و مقهوره
والله حقها تزعل..اتذكر شلون چنت اغار على سلام من جنه..و من لمياء و من كل وحده تباوعله
و اني ادري بي ما يحب غيري..و اني حبه الاول و الاخير
ف حقها تغار و هي تشوف حب زوجها السابقه
عمتي گامت و اني لگيتها فرصه انو احچي وياها
باوعتلي من گلت بدون مقدمات لان اثنينه نعرف بالوضع