| أمانة حيدر | ' باللهجة العراقية '

البارت الرابع و الثلاثون

#أمانة حيدر
#بقلم:الراويه
#البارت"٣٤"

بسم الله الرحمن الرحيم 🔔

.

يُسر..

گاعده بغرفة الگعده على التخت
عمتي گاعده بالگاع تقرا قرآن
اباوع للساعة راح تصير بال١٢ و نص و سلام لحد هسا ما اجا
من العشره و نص طلع للسوگ اتصلت بي مرتين و گال بعد ما لگيت محلات مفتحه

اغلبهن مغلقات بسبب الاوضاع..الاوضاع الي استنزفت كل طاقتي
وضع يخوف منا صار علينا مثل الحصار
و منا قصف الطائرات، اغلب سكان المنطقه طلعوا
و احنا تمنينا نكون منهم بس عمتي رافضه هالشي
ما تقبل تترك البيت، حچينا و ملينا من الكلام و راسها الف سيف
تگول اخذوا نسوانكم و جهالكم و عوفوني هنا

للمرة الثالثه ارفع التلفون و اتصل على سلام، يفصل الخط و محد يجاوب
گلبي يوجعني احس اكو شي صاير مو من عوايده ما يجاوب على اتصال و خصوصاً اذا من اهل بيته

فات عثمان و گال باستغراب

- شنو سلام ما جه ؟

- تؤ ما اجا و اتصل بي و ما يرد

تنهد و هو يسحب تلفونه من جيب بجامته

- گلتلو اجي وياك بس ما قبل

شكله دگ عليه و هو يحلب الموبايل على اذنه و عمتي سدت القران و باسته و خلته على ميز التلفزيون و گالت

- ما يجاوب ؟

- لا يمه

حچاها و اني گوه كتمت خوفي و افكار تجي براسي بس لا احد تعرض اله من الدواعش

- لا يا ربي

حچاها عثمان و اني الدم وگف بشرايني من اردف

- الخط انغلق

- يا لا يربي ، يمه ابني شبيه

حچتها عمتي و اني رجعت ادگ عليه و يطلعي الرقم مغلق
مثل الي دخلنا حالة انذار عثمان صعد فوگ و دقايق نزل هو و مغير ملابسه طلع و عمتي صاحت عليه وين و هو ما جاوبها

فاتت رواء و دلال و وگفن عند الباب و هنّ يستألن شكو
سؤالهن ما اعرف شنو جوابه و اني ابلع ريگي بخوف و رعب
و معدتي بدت تمغصني من الخوف
يا رب احفظه و ان شاء الله ما بي شي
عمتي حچت للبنات الي صار و دموعها تنزل

و اني بس خايفه دمعه من عيني ما نزلت، بقينا گاعدين و احنا ننتظر خبر و بين كل خمس دقايق ارفع تلفوني و ادگ على سلام و اني اتمتم رد الله يخليك

خابرت رواء على عثمان و گال الها طلعت ادور اله
بقيما لل٣ و نص و ماكو اي خبر، عثمان ما رجع و عمتي زاد بچيها و اني ساكته و بس اباوع
و اني اگول هسا يفوت من الباب هسا..
ما گدرت اگوم من مكاني شي مثبتني بالگاع، گلبي احسه راح يطلع من صدري و وشي واگف بحنجرتي