قلوب متحجره

بعنوان#قـيـود_وتـقـالـيد الـحـلـقـة (1)

#قـيـود_وتـقـالـيد
الـحـلـقـة (1)
گـتـابـتـي #Koka_Saleh

::::::::::::::::::::::::::::::::::::::::::::::::::::

سمعت صوت باتها اينادي في امها طلعت بسرعة وشافتهم مصبيين عند دارهن وخرت اشوي وقعدت من ورا الباب تصنت فيهم
سالمة:شن فيه احمودة خير
حمد:والله ماني عارف انقولك خير ولا لا
سالمة بخوف;ان شاءلله خير شن صاير
حمد تنهد تنهيدة وكأنه شايل هم الدنيا كلها علي قلبه
حمد:والله يااسلومة من امس ونا حاس بحاجة ثقيلة علي صدري مش مخليتني حتى انتنفس ابراحة
سالمة بخوف:يانا عليا يااحمد كنك خلي العيال ايشيلوك للمستشفى
حمد:قصتي مش مستشفى قلبي مش مطمن حاس فيه حاجة بتصير
سالمة:ماعنده ماايصير رجالة جايين يتفقو امعاكم وكان اتفقتو بيطلعو الفرح امغير انت شكلك ماتبيش اتجوز آيات عشان غالية عليك ومش مصدق بتمشي واتسيبنا

حمد تنهد:ان شاءلله خير
سالمة:ان شاءلله بس انت مناديني تبي حاجة
حمد:بنقوللكم ديرو المستورة اليوم الرجالة اللي بيجو برانية
سالمة:ماعليك كل شيئ واتي وان شاءلله مستور وطول عمرك مستور
حمد:الله ايربحك ديما ساترتني لكن نبي انقولك حاجة
سالمة:شنووو
حمد:شوفي هناء راه تقعد واخذه علي خاطرها آيات بتجوز وهي مازال ماجاها نصيبها
سالمة:لا مستحيل هناء اتحب البنات اكثر حتى مني وحاسبتهن بناتها وفرحانة واجد بخطبة آيات
حمد:انتي شوفيها واحكي امعاها وكان حسيتيها متضايقة ولا حاجة بلا منها هالخطبة بكككل
سالمة:حاظر والله حنحكي امعاها
حمد:ربي يحفظك يابنت الاصول
سالمة:ويحفظك وايخليك لنا
حمد:نا بنمشي شور خوتي في المربوعة اشوي والعرب ايجو
سالمة:باهي وراه قاعدين ايوتولكم في قهوة وحلوة
حمد:باهي ومشى ونزل وطلع شور المربوعة وسالمة نزلت للمطبخ

آيات بعد سمعت الكلام هذا كله زاد خوفها لان نفس الاحساس اللي باتها وصفه في البداية هي حاسة بيه واتفكر في الحلم وخايفة ايصير شيئ الباتها اللي كان دنيتها كلها 💛
آيات:اللهم استودعتك بابا يامن لا تضيع عنده الودائع
وبعدها تعوذت مالشيطان وصبت طلعت بلوزة حلوة وسروال حلو لبستهن ومشطت شعرها ونزلت تحت
(تعالو مع بعضنا انتعرفو علي آيات ومعتصم وكيف بدت قصتهم......

مواصفات آيات:-
كانت بشرتها حنطية لا بيضة ولا سمرة وعيونها كبار وعسليات وشعرها طويل واصل النص ظهرها ولونه أسود فيه لمعة كستنائية حلوة وباقي ملامحها حلوة وهادية طبعا بطلتنا عمرها 26 سنة متخرجة من التمريض وتشتغل في المستشفى عندها 3 أيام في الأسبوع بس بطلتنا عندها صديقة وحدة مقربة اسمها مروة تعرفن في الجامعة وقعدن مقربات بككل من بعضهن بعد التخرج قعدن يشتغلن مع بعضهن في نفس المستشفى
آيات زي ماعرفنا عندها اخين اكبر منها واللي هما أشرف شاب عصبي وواعر بكل عمره توا 32 سنة ومازال مااجوز خطب مرة وفسخ واللي بعده عبدالسلام ومعروف بعبسي هذا عمره 30 سنة وايحب بنت عمته ولعند توا لا قدر يخطبها ولا يجوزها لان مش قادر يسبق خوه وبعدهم آيات وبعد آيات ليلى عمرها 24 سنة وتقرا رابعة طب بشري وفرق السن اللي بين الشباب والبنات كان بسبب ظروف صحية عند سالمة
آيات عندها حب واحد في حياتها واللي هو عصومي الشاب الخلوق الهادي المثقف اللي حباته من أول ماسكن جنبهم ونفس الشيئ هو
قصة حبهم من احلى قصص الحب اللي ممكن اتمر علينا الاثنين فوق الحب فيه غلا كبير يربطهم
الاثنين اللي مهما كانت حجم المشكلة بينهم مايقدروش يرقدو قبل ماايحلوها لان الاثنين ماايحبوش يرقدو زاعلين من بعضهم استمرت قصة حبهم 6 اسنين بدايتها كانت في اول يوم في الجامعة عند آيات وهو نفسه اليوم اللي هل عصومي كانو ايجيبو في دبشهم الحوشهم الجديد واللي هو ساس عالساس الحوش عمي حمد
شن رايكم انرد بيكم 6 سنين لاورة عشان تعرفو اللي صار ????