قلوب متحجره

بعنوان~ #زواج_تحت_الخطر ! ~3

~زواج تحت الخطر~

الحلقة الثالثة
بقلم كاتبة رواية المستشفي
#Aya 🔮

.
.
.
خش علاء جوا بعدين فطن انه الدكان
قريب ومعتصم ليش خذا سيارته

علاء>> الله يلعن شيطانك يا معتصمممم ازح

وولع سيارتة ولحقه
.
.
.

معتصم كان عقلة مش مريييييحة يبي يدير اي حاجه عشان يوصل في ايات ، مشا عند حوش ايات اللي هوه نفسه حوش عيت جدها قعد مدرس في نهاية الشارع بعيد شويه بس الحوش باين عليه

طلع عبد السلام بسيارته ولع معتصم ضوايا السيارة فطنله عبدالسلام درس ونزل فتح باب السيارة وقعمز
كانت علاقة عبسي بمعتصم سمحة وعبسي جوه سمح وكان فاهم انهم يبو بعضهم ، بس بعد اللي صار معش حكو

عبدالسلام >> خير ان شاء الله
المعتصم >> جاي بنحكي معاك كلام رجالة تبي اتعارك معناها نعدي
عبدالسلام >> احكي شن فيه
المعتصم>> نبي حل قولي حل نديرله شن الحاجه يلي تبوها عشان تعطوني بنتكم
عبدالسلام>> قلنالك مافيش نصيب توكل الله يربحك طبيت فيا انا ساهل انا متفهم و شاب وفاهم عليك واللي صايرلك صايرلي بس عدي وشوف حياتك را يشوفك اشرف والله ما يصير خير

مسح معتصم علي وجه >> شهادة من دينك مش ظلم ؟؟ وراس امك ظلممم راه الظلم ربي ما يرضش بيه

عبدالسلام سكت ومعش عرف يرد نزل من السيارة وسكر الباب وطبسلة من الروشن>>توكل الله يربحك كان بجد تبي راحتها ماديرلهش مشاكل وتوكل

ركب عبد السلام في سيارته و مشا

درس علاء سيارته ونزل >> تي بتكلب امي انت بتكلب امي روح قدامي روح

معتصم ما ردش عليه سكر قزاز السيارة و طلع

في الوقت هضا شافهم جمال شاف لما عبد السلام كان يحكي مع معتصم كان يبي يمشي ويتهجم علي معتصم بس لعبها صح وسكت

راجا عبد السلام لعند روح ف الليل وتلقاه قدام الحوش وهو نازل من السيارة

عبدالسلام كان مش طايق جمال وحاس انه هو اللي خرب عليه كل شي صار

جمال >> تو معقولة تبيع ولد عمك علي واحدعيل
عبد السلام بحت فيه وهو مش فاهم شي >> كيف

جمال >> شفتك مع معتصم مبدري ؟
جاي يلسن فيك بكلمتين ؟ ما توقعتهش منك !

عبدالسلام حاول يمسك روحه >> جمال هنيلي روحك وفكني من دوت الصبايا احسنلك

حمال >> كلام الحق قعد كلام صبايا يا عبسي يا ولد سيدي ؟
عبدالسلام "اتكي علسيارة">> الشن بتوصل ؟
جمال >> شن كان يحكيلك كيف له وجه اصلا يحي ويحكي معاك
عبدالسلام >> والله غير انه كان ح يكون نسيبنا فيه بينا عيش وملح
جمال تعقد من كلام عبدالسلام >>اه زي ما قلت يعني جاي يلسن فيك بقرونك يعني