قلوب متحجره

بعنوان#للنصيب_كلمه_آخيره 3

#للنصيب كلمه اخيره
🎀الحلقه الثالثه🎀
غريبة هذه الحياة...
قد تملك فيها كل شيء إلا الشيء الذي تريده
..........
طبعا تقرر وتحدد يوم زفت العروسه يكون بعده يوم الفاتحه ب 4ايام من الفاتحه لان جمال بيسافر عنده شغل وخاصه ان مده اقامته اللي حددها كانت بس 10ايام
حمد يبكي....يام انا دمرت لبنتي حياتها
فتحيه تهدي في ولدها.....مرات لخيره في زواجها
سالمه.....ياعمتي لكن حرام هكي بنتي تنظلم ومن غير سبب
سليمه ام جمال ترد وهي خاشه عليهم....نصيبها وقسمتها
محمد ...يام هو جمال غلط وايده ولدك منصور
الجده فتحيه...من فتره قتلي ياريت ايات تكون كنتي
حمد....انا قتله وانتي عندك علم يام قتله بنعطي بنتي بالك تبيها وقالي صلاح مش واتي وجمال متزوج
محمد....انا الاول مستغرب
حمد يشوف لمحمد ...باهي علاش أيدتوه علاش وقفتو معاه هذا اللي نبي نفهمه انت
راني انا بنموت يام حاس بقلبي بيوقف مقدرتش نحمي بنتي من العرف والعادات اللي نفرضت علينا واللي كسرتنا ودمرت بناتنا
سليمه وهي مستقويه.... ياما منهم نحجروا وماشالله عايشين
( مافيش حد يعطيها كف يسكتها هذي فرحانه بولدها 😒)
سالمه....وانتي ترضيها لبناتك ولا غير جت عليا مقاسكم انا ولدي وقفوله فيها خواله لانهم يعرفو هالعادات حرام في حرام بالله خليني ساكته يا سليمه ترا
الجده فتحيه ... تعاركو اي اي تي تحشمي انتي وياها مش مالي حد عينكم ولا شنو
سليمه ... ياعمتب شنو قلت بالله عليك انا ولدي ويبي بنت عمه وخداها وبنت طرابلس مش عاجبها
سالمه وصوتها تحاول مايعلاش....وانتي عاحبك عيلتي قطعوني وبنتي الله اعلم بنفسيتها بالله خليني ترا
(وناضت من بحداهم لانها وصلت حدها خلاص)
حمد ...يام انا نكسر ظهري ليوم لما طلعوا انسابتي مني منهانين ...
ونزلت دمعه منا وكمل بغصه في صوته واضحه....
حمد....والله يام لما روحوا عرب طرابلس وانا تراجعت في كلمتي تمنيت الموت ولا موقف زي هدا وحط وجه علي ايدين امه وبكي وكمل....
حمد.....بنتي اللي وعدتها نعطيها بقدر جهدي سعاده اللي عشتها مع امها بنتي اللي ليوم وقفت عاجز قدم عادات عقيمه ومقدرتش نرد عليها الظلم
خشت آيات بعد سمعت كلام بوها ووجعها
ايات بحزن وهيا تجري وتحضن فيه....بعيد السؤ عليا يابوي انا زوجي من جمال زي معتصم شن الفرق مدورش وانا راضيه بنصيبي
شافلها ودمعته في عيونه باساته علي راسه وتقول
آيات.....ادعيلي بس نقدر نخش في حياة فيها زوجة وصغار وادعيلي ربي يهنيني
لكن عندي شروط وتتكلم وراسها لوطه من الحشمه...
ايات.... معليشي يابوي صح قري فاتحتي لكن وراي تريس صح ولا لا
وعلي خشت خوتها الولاد
قالولها
آشرف بحزم....وانتي عندك شك ولا كيف اكيد وراك تريس
عبسي ...شنو هي شروطتك ياوخيتي
ايات....حوش بروحي مانسكنش لا مع ضرتي لا مع اماليه ولاغير حجر عليا وخداني هكي
سليمه معجبهاش وكيف بتتكلم خبطتها عزوزتها بالزقيه متع (صكري فمك🤭🤭)
ايات.....انا هدا حقي وهو زي ماتقولوا مقتدر وماتنسوش راهوا فرق السن بينا 18لعام مش شويا
تتكلم وخوتها يشوفو كيف فكرت اختهم هكي وكيف جتها القوة
حمد بصوت قوي....وزيديهم المقدم 20 الف ومؤخر الصداق علي سبر امها وخوالها 200 ليره ذهب وينكتب هذا في عقد المحكمه قبل لايمشو يصدقو عقد الشيح
وكل كوم ومرت عمهم كيف مصدومه وبتتكلم لكن مقدرتش كوم ثاني )
محمد ... يابنتي هذا كلام رجاله يقرروه وتلفت لحمد وقاله....وانت كيف تآيدها من بيرضى بي كلامكم وماحد سمعنه دار هكي خلاص لو نقرت الفاتحه تم كل شي
حمد يقيم راسه وتلفت لمحمد .... وهذا كلامي يامحمد وشرطي بش يتم تجهيز العرس كنهذا بنتي عندي ومش لازمها تتزوج عادي تقعد في حوش بوها معزز مكرمه
الجده فتحيه....حقك ياولدي وحقك يابنتي حقك وتستاهلي اكثر بنت الغالي انتي
خشت مبروكه ومتعرفش شنو صاير وتقول ومتحشمه ....سامحوني بنقول حاجه مجبوره عليها
محمد ....تكلمي يابنت
مبروكه ....اتصل بيا جمال ويبي غضوه العصر يجي يهدرز شويا مع ايات وتتعرف عليه وتشوفه
حمد وقف وولع....شن تقولي وهو عنده عين....
قاطعه ولده اشرف.....سامحني يابوي انا فاهم جمال هو يبي يفتح مجال ليه مع ايات قبل يوم العرس منبوش نزودوها علي ايات خالي نعطوها مجال تتعرف ومن يعرف شروطنا
حناهم شافت لاشرف.....ولد جدك ياصقري ربي يكملك بعقلك
حمد شاف لاايات...
ايات متحشمه من بوها وراسها لوطه....خلوه يتفضل بعد ادنكم
محمد ......
الجده ... سامحينا يابنتي
ايات تجري تحضن حناها.....مسامحتكم انا راضيه بنصيبي ياحنينا
طلع حمد ومحمد مثآثرين وخشوا لكريم في المربوعه
كريم.....خلاص يابونسيب تو ما لينا الا الصلاه علي الني
محمد وحمد....عليه الصلاه والسلام
كريم البنت بنتكم وماتنسوا حتى الولد ليكم ودمكم وماطلعت لغريب وجمال راجل الكل يحلف براسه
حمد....خايف علي بنتي ياكريم نكون ظلمتها
كريم....استهدى بالله شن بتحاف عليها من ولد عمها راهوا عرضه اولا دمه ولحمه راهو يضربها ويضرب عليها
حمد بآلم واضح في صوته وشبحت عينه....راهو كبير ومتزوج
كريم ....كلنا نعرفوه جمال عاقل وهو صح غلط بتهجير وكسرت كلمتك قدام طرابلسيه وهم في ديارنا لكن .....
قاطعه محمد....حشمنا قدام الناس اللي جايه من طرابلس
كريم....اي في هدي غلط وانا نعيب عليه لكن خلاص تو اللي صار
حمد....مخنوق ياجماعه
كريم....استعود من الشيطان وحد الله
حمد ومحمد.....لا اله الا الله
اشرف لماخش سمع بوه يهدرز....يابوي انا اكثر واحد عاشرت جمال هو اي زي ماقال راجل عمتي غلط في تحجير لكن ماننسوش ان يعتمد عليه وحل ثقه يعني ايات مالوحناهاش وان شالله ربي يهنيها
حمد مع نفسه واثق في ولد خوه لكن........
اشرف تقدم من بوه....بوي انا اللي خلاني سكت مش لاني سمعت كلام خوالي علي ان التحجير مكروه بس لا يابوي انا شفت جمال في المصحه كيف خايف علي ايات وحازر عليها مع ان اول مره يشوفها تي والله مخلا الدكتور يحط ايده عليها وقريب ضرب
حمد.....
محمد يشوف....
كريم.....
اشرف.....استغربت مانكدبش عليك وشكيت بس وقت قال حجرت عرفت ان حط عينه عليها من اول ماشفها واللي صار في المصحه كانت غيره واضحه
كريم....متخافش ياحمد ان شالله تتنهنى
...............
هناء....ابتسمي خلاص شن بتخشي قالبه وجهك
ايات مغصوصه.....معتصم دارلي 78مكالمه40رساله
هناء تشوفلها.......
ايات بآلم وكسره واضحه....لارديت علي رسائل ولا مكلمات
هناء.....هاتي شفره
ايات خلاص حست انها نهايه لحبها
هناء....لوحي كل شي وراء ظهرك وتقدمي بآيمانك القوي وتسلحي بالدين وخلي ثقتك في ربي ....هو اللي ختارلك والخيره فيما اختارها الله
ايات وهيا تم في نقال لعمتها.....ونعم بالله ياعميمه
هناء....اول ما تعفسي الصالون وتمدي ايدك لجمال انسي كل اللي فات بما فيه معتصم وتفكري ان خالد زوجك واجبك ليه تصوني عرضه
ايات دموعها ينزلوا.....( تحسابه ساهل بالله .. ياااا رب)
هناء...لالالا لاياعمتي امسحي دموعك هيا قريب يجي
وفعلا تجهزت ايات باش تستقبل
#زوجها_جمال
بعد العصر بساعه كان جمال في المربوعه طبعا استقبله حمد بوجه حاول يكون طبيعي وبشوش باش ماينكدش علي بنته وتقدم اشرف وخدو بعض بالاحضان لانهم صغار عم وصحاب
اشرف بصوت واطي في ودن جمال وهو يحضن فيه....
اشرف.....تحسابني بنفوتهالك
جمال في ودن اشرف وبنفس صوت......
جمال.....يوم تجي تشكيلك مني نعطيك سلاحي تضربني بيه
اشرف علي نفس الوضعيه.....انا وثق فيك
جمال.....وانا قدام ربي نكون ليها سند والحامي
وتباعدوا من احضان بعض وتلفت جمال لي عمامه اللي استقبلوه برحابة صدر معاهم وكريم وحناه اللي طلعتله مخصوص باش توصيه علي ايات وتحضر شرطرها هيا وبوها
جمال طبس باس ايد حناه وسلم...
جمال....كيف خالك ياحني وسامحني امس ماسلمتش
شدت فتحيه بلطف علي راسه....كيف حالك ياولدي يا آول فرحتي.((جمال اول حفيد في العيله))
حضن جمال حناه.. سامحيني ياحني
فتحيه ب لطف....علي تحجيرك ولا علي قلة نشدتك عليا
جمال بثقه.....التحجير بنت عمي وانا اولا بيها ومش نادم وعلق شاف لعمه حمد وقال
جمال....ان شالله ماتحمل عليا ياعمي
حمد بهدوء....قعمز واسمعني شن بنقولك
جمال حس برهبه بس تكلم بالغه الواتق
جمال....اتفضل ياعمي
حمد......اسمع انت حجرت علي بنتي بلا شيرت بوك ولا شيرتي وهدا عرف متعرف بيه بس ....وسكت
جمال بهدوء ....اللي بتقوله انا حاضر ليه
حمد....قدام الناس واهل زوجتي هنتني انت وبوك وسكت ومن صدماي مشرطتش عليك وعارف تو تقدر تقولي تم وتامدها بشرطها اللي في العقد لكن......وسكت
محمد عمه.....اسمع ياولدي في شروط حطهم تمك باش يرضى عليك وتكون ولده فيل ما تكون نسيبه
جمال.....علي رقبتي اشرط ياعمي والاه ماتاخد الا التريس
حمد بفرحه وماتوقعش جمال يوافق بسرعه ومن غير ما يعرف الشرط
حمد.....عادتنا البنت ترفع كل شي صح
جمال بثقه....وانا نببها بحوايجها وما نبي معاها شي
حمد وهو يشوفله.....موآخرها بتعدله غضوه الصبح قبل كل شي 200ليره دهب
(شرط النسيب الكاره)
جمال.....ومش خساره فيها اصلا انا شاريها وعمري ما ح..نبيعها
حمد ومحمد وكريم واشرف وعبسي وحناهم عجبهم جمال وكلامه....
حمد....حوش بروحها
جمال ...موقت بس لاني ديما نسافر واول ما نستقر وعد حوشها بروحها
وناضوا حضنوه
حمد....حافظ علي بنتي وصونه وماتزعلهاش وسادها دموع امس وانا مسامحك دنيا واخره
جمال بفرحه وتقدم لعمه.....نوعدك بشرفي وشرفكم ياحاضرين موتي قبل محد يمس شعره منها
ونوعدك ماتحتاج ولا تنكسر طول ما انا فيا نفس
ونوعدك ياعمي ماتنزل منها دمعه نكون انا سببها الإ لو غلطت
حمد طبطب علي كتفه.....من يومك راجل
اشرف ابتسم....
سالمه خشت مكسوره وقابمه خشمها.....
تقدم منها جمال....كيف حال يامرت عمي..
سالمه بكره واضح....كنت بخير لين شفتك
حمد بحده.... سالمه
سالمه بحقد....طالعه وخاليتهالك ياولد منصور
جمال تقدم بسرعه بيطيب خاطرها
جمال....علاش يامرت عمي انا....
قاطعته بصوت مكسور.....خوتي عادوني بسببك وبنتي كسرت خاطرها و....سكتت وشافتله لكره وكملت انت واحد م.....
حمد بقوه وصوت عالي... سالمه خلاص لحد اهني وتم
تلفت ساالمه لحمد.....ايوه حسيتها في ولد خوك الاهانه وفي خوتي لا
حمد بصوت زاد تعلا......سالمه بره
سالمه بصدمه.....حمد
حمد بين سنونه.....سالمه قلت بره
اشرف تقدم بسرعه لامه.....تعالي يام تعالي
تقدم جمال لسالمه وشد ايدها.....سآلتك بالله عطيني فرصه ونوعدك تكون بنتك برنسيسة زمانها وانتي تعرفيني كلمتي علي قطع رقبتي
شافتله بكره وطلعت ومع نفسه تكلم جمال*نوعدك ح حنخليك تحترمني لما تشوفي بنتك معاي مرتاحه*
ربع ساعه طلع اشرف جمال من المربوعه ودخله الصالون في الحوش باش تخش آيات تسلم من غير وجود بوها وعمامها ونادى اشرف علي ايات اللي خشت ومتعمده تلبس قفطان اسود للركبه يعكس حزنها زايدها حلاوة وفيه حزام عريض لونه بيج وشعرها موجاته وقاصه قصتها حِفاري ومكياج خفيف عالاخر
طلع اشرف وعلق جمال عينه فيها وكانت ايه من الجمال والاسود مع بيوضتها مازادها الا زين علي زينها
جمال وهو يوقف قال لنفسه* سبحان من خلق وصور*
علقت فيه اياات عيونها ودمعه حأاأره نزلت بروحه تقدم منا وهو يشوفلها ومد ايده وبيسلم
شافت لايده المدوده وتفكرت كلام عمتها هناء وحزن بوها وخوف امها عليها تشجعت ومدت ايدها ليه شد علي ايدها وقلها بدون مقدمات....
جمال.....اسف
ايات.....علي شني.؟!
جمال.....اني كسرتك يوم فاتحتك
ايات....عادي هو انت كسرت ايدي ولا رجلي يعني
( طالعه لخوالها فوق تلقيح)
وابتسمت بسخريه وكملت...
ايات.....انت يادوب كسرتي قلبي وخلتيه مايعرفش يوثق في حد تاني؟؟
جمال حاول مايبينش انه مثآثر وقلها بعد ماسحبت ايدها منا
جمال بهدوء....نقعمزوا نتفاهموا
ايات تتهزاء.....مش نتعرفوا قبل !!!
جمال حاول يكون هادي.....اكيد وليا الشرف
ايات شافتله بكسره.....ليك الشرف هه انت ياواثق من نفسك لدرجه الجنون يامجنون في الاصل
جمال بتحدي وهدووووء بعد ما لاحظ انها بتحاول تنرفزه
جمال....واثق من حبي ليك ومجنون بيك
ايات تبسمت بهزواء وهيا كيف قعمزت عالكرسي ....هه حب بجنون وانا منحبكش كيف اصير ( معادله صعبه صراحه )..
جمال يشوفلها بثقه.....حبي يسد لينا الزوز
ايات بنفور.... وسندس شن موقعها من الاعراب
جمال هادي.....زوجتي وام بناتي
ايات....علاش!!!
جمال بستغراب ....علاش شني !!!
ايات ....علاش انا!!!!
جمال.....حبيتك من اول ماطحت عيني عليك
ايات....مش انانيه منك تاخد بدون آدن اللي مش ليك
جمال بثقه....منشوفش فيها انانيه
ايات بتعجب.....شن تشوف فيها!!؟؟
جمال بجد....حق ليا فيك
ايات تشوف لعيونه تبي تفهم.....حق وانا مخطوبه لغيرك وفاتحتي كا.....
قاطعها بسرعه....انا ماكنتش نعرفك ماشفتكش وتقرب منها وقعمز جنبها وقالها
جمال....فكري فيها شويا علاش انا امس روحت باالذات علما والله عندي صفقه مهمه غضوه وعلاش تغيبي عن الوعي وتمري من قدامي وعلاش تسكر سيارتي كل سيارات وتركبي فيها...!!!
ايات....صدفه!!
جمال بثقه.....لا نصيب ( تبو الحق عجبني كلامه وفعلا نصيب 😅)
ايات تشوف لجمال وهو يشوفلها فتره وفجاه...
ايات.....اللي مدي التانيه ياخد الثالثه والرابعه
جمال بحب واضح.....نوعدك العين التي بتتملا بشوفتك مستحيل تشوف لغيرك حاضره كٌنتي ولاء غائبه ولا دار تتسكر بعدك الي مرآ
ايات تشوف لعيونه........وارتبكت
جمال بيحاول يتقرب قالها....ربي لما يباعد شيء اكيد لحكمه ويارب ان شالله تكون حكمته معاك باش يقربلك الافضل
ايات ناضت وسخريه قتله.....اها وانت الافضل
جمال بثقه ....ان شالله
ايات بصوت واطي.....مغرور
جمال ابتسم....سمعتك ( هههههه اس شكلي حبيت جمال حتى انا )
تلفت وشافتله وقتله....نبي نطلب منك اول طلب واخر طلب وياريت تقبله مني
جمال....انتي تؤمري ماتتطلبيش
ايات....اوعدني توفي طلبي
جمال....قتلك آمريني
ايات بعند....اوعدني
جمال ابتسم وعجبه عنادها.....وعد ياستي
ايات....قول وعد الحر دين عليه
جمال زاد اعجابه بيها وببرئتها....وعد الحر دين عليه
ايات وعيونها لوطه ومتحشمه....
جمال مستغرب من حشمها ومعجب بيه ليه فتره ماشفش هكي
ايات بتردد وكلام وراء بعضه....اسمع زوجنا يكون علي ورق لين تعود عليك
نصدم جمال ......
ايات عاطيته بظهرها متحشمه من طلبها.......
جمال استجمع هدوئه.....مش واعر طلبك شويا
ايات ومتحشمه وجها زي طماطم وهيا بيضه والحموريا زادتها حلاوه
ايات....انت وعدتني وقلت وعد الحر دين
جمال بحب واضح في صوته.....وعد لين تتعودي عليا مش ح نغصبك علي حاجه
ايات طلعت تجري وخلته وراها يشوفلها وهو هااايم ومع نفسه
* ياربي عطني الصبر مع هالبنت اللي شكلها بتهبلني*
كيف بيكون اول لقاء بين سندس وايات؟؟؟؟
وكيف بيعدل جمال بينهم؟؟؟
معتصم خلاص سلم في ايات؟؟
وخوت سالمه بيسامحوها؟؟؟
#استوني والحلقه الاخيره
#الكاتبه ابتسام علي