قلوب متحجره

بعنوان#التمرد_بين_الظلم_والموروث 3

الروايه المشتركه #قلوب_متحجرة

تحت عنوان ↘↘

#التمرد_بين_الظلم_والموروث

بقلم زهور جمال الدين 🌷
🌱الحلقه الثالثه 🌱

-

فى بيت فتحية

الصبايا يضمو فى الحوش.. ويحوسو فى المطبخ ...
-حوريه / فطرتى يا عمتى
-فتحية/ تو يكملو الضمان ونفطرو كلنا مع بعض
-حوريه / ماهو انتى تاخدى فى دوا الضغط لازم تفطرى
-فتحية / جابتلى هناء تفاحة كليت عليها الدوا ..
-حوريه / باهى صحتين ...

سالمه مقعمزة تبكى ...
-نجاة/ تو معقولة تبكى انك هنيتى على بنتك وعطيتيها لى راجل
-سالمه / انا بناتى عمرهم ما فارقونى ..ماباتوش برة منغيري ولا مرة
-فتحيه / تو هضا هبال ولا شن يقولوله ...نسون اخر زمان .. بدل ماتحمد ربها سترت بنتها ودارت حوش مقعمزة تبمى وتنوح على بناتها وعمرهم مافاقنى
-سالمه / انا مش قصدى ...
-فتحية/ فاهمه قصدك ..نوضى سلم بنيتى طيبي الخبزة للتربس انتى ومبروكه .. تو راهى خمرت العجينه
-سالمه تمسح فدموعها / معاكى حق معش وقت ع الفطور
-نجاة / حتى انا ماشيه معاك هى ...
-فتحية/ وانتى يا صالحه سقدى ابعتى لى ولدك فطوره
-صالحه/ نادية بنتى ادير فى فطور خوها

نزلت جنات من الدروج ...

-جنات / ماما قلتى لى صلاح على حاجاتى
-صالحه / تو صلاح تعرفيه بيخش داركم ويفتش ..ماهو البسى من بنت عمك انتو الزوز نفس المقاس
-جنات / اصلا البيجامه هادى من دبشها
-صالحه / عدى ضمى مع بنات عمامك ...
-جنات / حاضر

_______________________________________

-
فى حوش منصور ...

ايات شرين تليفونها وردت ... سمع جمال صوت التشريين
خش للغرفه يسمع فيها ردت
-ايات مقعمزة عالسرير ومتلفته للدولاب / اهلين مروة كيف الحال
-مروة/ نبيش نعطل عليك عارفتك مشغوله 😍.. بس امك مشغولة تبى تعرف تهنيتى ولا لا
-ايات / اهاا .. قولى لامى ايات تهنت ...
وشافت ضل ع الارض ...

تلفتت لقت جمال واقف ويشبحلها وعيونه حمر
-ايات / باى توة

قرب منها جمال وقام يده فيها مسواك حطه فى فمه ....
وقف وراها وقرب من ودنها وهيا مقعمزة/ انتى تهنيتى
-ايات / قصدى... انا قصدىىىى
-جمال حول المسواك / قصدك تكدبي .. واطلعى روحك بطله وكويسه وطيبه ومسالمه على حسابى
وقفت تلفتتله ...لقت عيونه حمر .. خافت ..وخرت ..لصقت فى الدولاب ....
-جمال / تعرفى هادى بنعديها لكى.. لكن قسما بالله من اليوم
تقولى كلمه تخص بيتى واسرتى سواء حق ولا كدب ماتلومى الا نفسك
-ايات / اسرتك !!!!
-قرب منها وحط مسواك فى فمه وعضه/ نتكلم عليكى انتى
اهو حسبوك عليا مراة واسرة وخلاص

وطلع للباب ....
تلفتلها / العيلة بيروحو اليوم .. بعتت صلاح لى امى قلتلها روحى
-ايات / يتفضلو هدا حوشهم
-جمال / انا ماقتلكش بيش تقوليلى يتفضلو ...
-ايات / امالا شنو
-جمال / شن امالا شنو ..طيبي الغدا
-ايات انصدمت / غدا شنو
-جمال / غدا هلى .. اطلعى يلا
-ايات تتسخف / شن بتقول عليا الناس وانا من اول يوم نطيب غدا لى عربي
-جمال/ بيقولو عليك بنت اصل ومفصل ..هيا سقدى روحك
-ايات بدت تزرط /احنا حتى الفطور مافطرناش
-جمال / معش تجمعينى معاك ..خشى للمطبخ حطى الغدا وديرى فطورك وقعمزى افطرى
-عيونها تعبو دموع / باهى ..