قلوب متحجره

بعنوان#للنصيب_كلمه_آخيره4

#للنصيب_كلمه_آخيره
#الحلقه_الاخيره
🎀وهكدا دوما تمضي آمانينا...
نطوي الحياه وليالي العمر تطوينا....
وتمضي بنا سفينة الاعمار ساخره عبر البحار ولا نلقى مراسينا🎀
...........
في طرابلس حوش معتصم
معتصم صارله تبلد من الصدمه وردة فعله عكس المتوقع كان هادىء جدا
الحاج جلال ...ياولدي البنت مشت لنصيبها وربي مش كاتبهالك
شعبان.....ياولدي الاعراف عندهم تتحدي في الشريعه الاسلاميه
عمه طارق....وبعدين الناس اللي باعوك ورخو بيك في اخر لحظه وضموا صوتهم لولدهم معناها طول عمرك بينهم حتكون براني ياعمي الناس اللي ماتشد بيهم ظهرك لوحهم وراءه
معتصم ووهو ينتف في ظوافره : انتو سامحوني عالموقف اللي حطيتكم فيه لو كنت نعرف انه شي زي هذا حيصير ماكنت قدمت خطوه
تقدم منا شعبان.....الله غالب جهل وتصكير دماغ في التشبت بالاعراف
معتصم......نحبها صح ومانتوقعش حياتي بلاها لكن اللي صار اكبر من الحب هذي اهانه ليكم وانا كنت سببها هذا اللي واجعني وربي
( وحرك شعره بإيده وجبده كله وراه)
علي خشت بوه للصالون وشاف لولده وحس بيه مثأتر لكن يكابر وتقدم وقاله..
جلال.....خالك ناصر تملك في السفره وان شالله علي نهايه الاسبوع تكوز في البرازيل تكمل قرايتك وتحضر وترجعنا ونفتخروا بيك
طارق ...ومتعرفش وين نصيبك ووين تلقاه ياولدي
معتصم وفي قلبه*الحب وضاع ويستحيل القلب يعشق غيرها...النصيب امتى مايكتبه ربي يجي عادي اهم شي انتو تكونو راضين عليا
كلهم بصوت متفاوت ... راضين عليك ياولدي
.......
ولحد هني تنتهي قصه معتصم لانه مش ح..نتعمق فيها بحكم قصر الروايه وسرعة احداتها
( لكن حتكون ليه قصه في روايه تانيه)
.........
يوم العرس كانت ايااات ايه من الجمال بهرت كل الحظور بطلتها وطبعا حوشها فيلا خاصه بيها كان كبير جدا وكان رااااقي جدا وجمال تعمد يجيب مهندس ديكور في خلال4 ايام حتى يكمل الاثات والتفريش كان ملكي وشرالها حوايج من ارقى الماركات ولكل المناسبات وحدد سفرته وسفرتها بعد العرس بي4ايام للبرازيل منها شهر عسل ومنها عمل... وسندس قررت تقعد مع شيابينها وماتسافرش وفي جناحها هيا وبناتها في حوش عزوزتها...
هناء....هيا ياعميمه جمال بره يراجي
ايات بخوف...نرعش ياعميمه
طلعت ايات وفتحلها جمال باب السياره وركبت
ايات طول الطريق ساكته وهو مباش يظايقها
جمال ....وصلنا ايات
فتحلها الباب ونزلت وكانوا العيله كلها لوطه ....
جنات....اهلين بنت عمي و مرت خوي شرفتينا
بصوت مخنوق ايات.. .اهلين
طبعا اغلب العيله غادي لانهم صغار عم
شويا وركبتها عمتها هناء لي حوشها وهيا ترعش
هناء....خيرك ترعشي
ايات....خفت نشوف سندس
هناء....بصراحه الموقف واعر عليك وعليها مسكينه لو حد قلها مروحتك لبلاد تجيبلك ضره ماروحتش وانا الحق تو كنة خوي مانوبطهاش كويس ديما بره
ايات.....خايفه ياعميمه
هناء...خلاص تو
وشويا وركب جمال وسلم علي عمته اللي نادر مايتلاقا معها بحكم شغله بره
هناء.. رد بالك عليها راك خديت زهره عيلة ال.....
جمال وهو يسلم علي عمته....في عيوني ولو لا انها زهره كنت...وسكت
هناء بعتاب.....تحجر عليها
جمال شاف لعمته بحن.....سمعت بعلاقتك بيها لكن والله ياعمتي لما شفتها استخسرتها في اي حد غيري
ايات بصوت واطي وهيا تسمع.....مغرور
جمال اتبسم وشافلها.....سمعتك
هناء تضحك.....رد بالك كلمتها علي راس لسانها
جمال.....تعجبني
ايات بصوت واطي....وزياده بليد
ضخك جمال وعمته عليها.. طلعت هناء وهيا توصي في جمال
ايات بسرعه سكرت الدار عليها...
جمال بهدوووء وراء الباب.....اسمع ايات نحي فيلوك وديري عليك الوضوء والبسي توب صلاتك وتعالي نبدوا حياتنا بركعتين ....وسكت شويا وكمل بثقه
جمال.....انا وعدتك ايات مش خ نقرب منك الا برضاك وانا عمري ماخلفت وعد لاحد لابال انتي ...
ايات وراء الباب بعد ماسمعته حست بشي غريب احساس فيه نوع من الامان
ايات بصوت واطي....شويا بس
حاولت تنحي الفيلوا مقدرتش بروحها وفكرت بجمال وعده ليها فتحت الباب وطلعت شافها استغرب
جمال....ان شالله خير
ايات متحشمه.....الفيلوا خيوط من معرفتش كيف.....وسكتت
ناض جمال وفك خيوط القفطان وشداته ايات باش مايطيخش وبسرعه رجعت لدارها ...
ابتسم جمال علي طفولتها وحس ان حياته بدت تحلوا....تفكر سندس لكن مع نفسه...
*سندس زواج تقليدي وانا ياربي سامحني ان شالله مانقصر في حقها وحق بناتي لكن اول مره نجرب احساس الحب*
......
صلوا وخشت ايات رقدت وتاني يوم ناضوا علي صوت خبط الباب....وكانت جنات جايبه لفطور....
وناضت ايات وصلت هيا وجمال اللي اصر تكون صلاتهم جماعه طول ما هو معاها....
جمال بجديات....اسمع انا طاوعتك في شرطتك لكن الاصول لزم تمشي عليها..
ايات تشوفله........
جمال تقدم منها .....صلاتنا ماكلتنا طلوعنا كله يكون كآي زوجين
وقلها بتهديد حنون .....وايك اياك حد يعرف بشرطك عليا وآالا...
ايات بخوف حاولت درقه.....والا شنو!!
جمال وهو متوجه لدار وعاطي بظهره ليها باش متشوفش تعبير وجه
جمال....والا يبطل الوعد متاعك و.....سكت وتلفتلها وغمزها وقال...
جمال....يكون يوم المنى
ايات تحشمت وجها ولاء الوان ودارت ظهرها للحوض متع المطبخ بتغسل حاجات الفطور
بعد العصر جتها امها واختها وعمتها مبروكه وهناء يزغرطوا....
هناء بصوت واطي....شن صار.
ايات وطت راسه متحشمه.....ماصار شي
هناء بصدمه.....نهار اسود كيف
تفكرت ايات كلام جمال لو حد عرف ينقلب وعده ضدها فبسرعه استدركت الموقف وقالت
ايات....ياعميمه لبارح صلينا وهدرزنا وقالي .....
هناء بشك....شن قالك ياهمي
ايات تفكر في كدبه.....قالي قالي ارتاحي و.....و....ورقدت علي صدره لصبح
هناء مش مصدقه ....بس
ايات بخوف....بس والله
هناء بتحدير....ردي بالك وانسي كل اللي فات وتفكري بس بوك وخوتك اللي تاج علي راسك
ايات بدمعه نزلت بروحها.....ولا يهمك انا نسيت كل شي
مبروكه.....شن توشوشوا