#التمرد_بين_الظلم_والموروث
بقلم زهور جمال الدين🌷
🌱الحلقه الثانيه🌱
جمال حجر بنت عمه .. والعيلة لداخل سمعت وصار الهرج والمرج ...
-صالحه تلقى فى ايديها/كيف صار الكلام وامتى ..والله مانعرف ...
اما ايات فاتحه عيونها فلاشات ومنصدمه وخلاص ..مش قادرة تعيط خايفه من خوها اشرف
مروة صاحبتها واسمهان يتهامسو
-مروة/ الغبابير السود .. مش هدا اللى داير لاوادجو ويقولو 24 وهو صكران
-اسمهان تهمس/ هوا يا مروة هوا ..امغير اسكتى توة
وحناهم فتحيه تعارك / قلتى نبوها لولدنا خير من هالعملة والتحجيرة يا صالحه
-ناديه/ ياحناي والله هالموضوع مايخطر علينا ولا امى تعرف بيه اصلا ..
-صالحه / والله ياعمتى مانعلم عليه ولا تخطر عليا البنيه
وتلفتت لى مبروكه / مش من بكرى وانا نحكيلك انى بناخدله بنت اختى
-مبروكه/ صدقتى يا صالحه... ونشهد بالله هالكلام ماهو شورك وانا متاكدة ماعندك علم بيه
-حوريه/ غير صلو ع النبى يا جماعه وخلونا نفهمو
وايات ساكته ومصموته وتشبحلهم وخلاص من الصدمه
ويسمعو فى اشرف ينادى من الممر/ يمى...نادى ايات وتعالى
-سالمه / جيبيها يا هناء وتعالى معانا
-مبروكه/ حتى انا بنمشى معاكم
مشت هناء لى ايات مسكتها من يدها ورفععتها للى الممر متع السقيفه..طبعا ايات متقدرش تتكلم وتقول منبيش نمشى لانها ماتتنفسش مع خوها اشرف بكل
_______________________________________
-
فى المربوعه ....
وقف جمال طلع من المربوعه للجنان ولع سبسى ...
اما باقى الجماعه ...
وقف صالح عم المعتصم والجماعه اللى جايه تخطب
-حمد / والله ماهى صايرة يا حاج صالح غداكم طايب
-صالح / لااا صحتين عليكم
-سالم/ الغدا تسمى عليكم تغدو وروحو
-ميلاد متعصب/ تى هيا عاد يا جماعه الخير سقدو
والشيابين واقفين يلبسو فى جرودهم الخارجيه
-منصور/ انشالله مافى زعل يا حاج صالح ..
-ساسى جار المعتصم/ وليش الزعل .. بس ياريتك يا حمد رديت الشيرة على عمامها وضنوتهم .. وبعتالى تصرفت
-حمد/ الحق مش عليا نا ..المفروض باته تصرف وعقله
-محمود / وباته ليش يعقله ..الولد ماطلب الا حقه ..واحنا فل عاداتنا البنت كان حجرت خلاص ماحد يتكلم عليها
-منصور/ ياحمد شفت الموقف واللى صار.. الولد تكلم ومقدرتش انسكته..هو كل شى صار قدامكم وتفاجئت بيه حتى نا
-صالح / ياراجل هيا كلها نصيبات ..وولد العم ماحد يقدر يلوم عليك بيه يا حمد .. مبروك عليكم
-محمود/ زين الكلام
طلع ميلاد للجنان ..لقى جمال واقف ايدخن
-ميلاد/ والله ماتحشم على وجهك ..وكان نشدك لما نكصرلك كرومتك
-جمال حول الدخان من فمه وبحركه استفزازيه/ اطلع برة من بيتنا العب يالاا شارعكم يلا .. البنيه ماهى مقطوعه عندها ولادم عم اولى بيها من خوك
-ميلاد / والله كان مش بتعيب عليا الناس راهو عطيتك اللى تستاهله
-جمال/ عدى يراا عدى خير مانجى نتصرف معاك تصرف ثانى
طلع عمك صالح وباقى الشيابين .. ومشوللسيارات ركبو بيروحو
أنت تقرأ
قلوب متحجره
قصص عامةالموسم الثانى للروايه المشتركه احبابنا وجمهورنا عندنا ليكم عرض حلو ع الصفحة .. واللى هوا روايه تجمع بين عدة كتاب ..فكرتها ان تكون المقدمه مشتركه وكل كاتب بيكتب فى نفس الموضوع اربع حلقات ليه هوا بس ..اسماءالابطال والشخصيات موحدة ... بالتاكيد كلنا...
