_________
كل زول فينا بمر بتجارب في حياتو سوى التجارب دي كانت في علاقاتو العامة أو الخاصة او في الحياة عموما ، دائما مانترك أثار خلفنا سوى كانت جميلة أو شينة ..
التجربه المعانا دي حقيقية مية المية من حبيبة جعفر ، ما تستغربوا بالجد هي حبيبة جعفر ما حنقول إسمها الحقيقي حنسميها (ريان) كإسم مستعار
وحنحكي الرواية بلسانها هي لان هى بطلتنا ، وعشان الصورة تكتمل عندنا ونقدر نعيش مع أحداثها ..
يلا نبدا ونقول بسم الله وننطلق مع ريونة بطلتنا ...
_انا ريان حبيبة جعفر بس لسه مابقيت حبيبتو هههه، معليش علي الدخله التوووش دي ، بس دي الحقيقه انا عشت واتربيت في بيت كلو مشاكل ابوي متزوج غير امي مرتين ومشاء الله اخواني ما بتحسبوا ، في الكبير و في الصغير وعايشين بقانون الغابه القوي ياكل الضعيف ، المهم كلنا عايشين مع بعض البيت كبييير و مقسم علي تلاته أجزاء وكل اسرة ماسكه جزء وتعالو شوفو الجحيم العايشين فيهو الاربعه وعشرين ساعه مشاكل ، من ده قال وده فعل و ده ترك وده عمل، غايتو كبرنا كده بالبركه بس في النهاية اخواني بقو يطفشوا واحد ورا التاني البسافر السعوديه و البهاجر امريكا و البطفش في المانيا ، ووحاتكم تاااااني زول فيهم بجي ماف خلونا نحن للمشاكل ووجع القلب
ابوي مريح دماغو من الحاجات دي عامل ليو غرفه ومعاها برنده في البيت زي غرفة التحكم ، ماف زول فينا بتجرأ يجيهو هناك نحن ما بنخش الغرفه الا لمن نكون علينا نضافتها غير كده تبقي جريمه لو خشيناها
انا كبرتا ولمن عمري وصل 13سنه إمتحنت تامنه وكنت ماشه بالبركه فى السبع فصول القبل تامنه كنت بجيب مجاميع ما كبيرة ، بس ما حصل سقطت الحمدلله...
في المدرسه كانو ضاغطننا شديد ، نظام ممتحنين وكدا ، شي دروس بالعصر ، وشي حصص صباحيه و راسنا ما قادرين نحكو من كترة القرايه و المقالات بتاعت التاريخ و الخريطه الزمنيه غايتو عذبونا جنس عذاب
في الفتره دي عمتي جات من السعوديه وقعدت معانا وهي ام جعفر طبعا ، وااااي من جعفر اقول ليكم شنو ولا شنو جمال و ادب واخلاق و تهذيب والتقله دي بس خلوها ليو و مقععععد جنس قعيد في الدنيا دي بس والله والله و ما طالبني حليفه انا الوكت داك ما كنت فايقه ليو ولا حتي اعرتو اهتمام سلمت عليهم لمن جو من السفر و الغطسه الياها قاعده في غرفتتنا نحنا البنات ، وشعري ده ما بسرحو نهائي بغسلو وبخليو بس لمن بقى زي عش الطيرة حاجه كده زاتها ما مفهومه مشربك ومنكوش بس بلمو بالطرحة لما أجى ماشة المدرسة ..
أها عدت فترة الامتحانات الحمدلله وبقينا منتظرين النتيجه وانا الخوف كل مره بتملكني اكتر وخائفة أرسب وأعيد تاني ..
ووسط همى دا كنت كل مره بسمع اخواتي شغالين جعفر مشي جعفر جاء جعفر نام جعفر صحي وانا كنت بستغرب فيهم مسكت واحده من اخواتي وسالتها ..
إنت يا اختى قصة جعفر دي شنو؟
قالت لي إنتي عايزه تقنعيني انك ما انبرشتي فيو؟
قلت ليها والله انا ما شفتو الا لمن جو من السفر وحتي ما متذكرة ملامح وشو ضحكت فيني و مشت ..
انا زاتي ما اشتغلت بالموضوع لأنو مامدياه إهتمام بس حرقنى الشمار وحب الإستطلاع كنت دايرة أعرف شعور اخواتي ديل لما يجيبن سيرة جعفر ..
بس في يوم كدا طلعت مشيت الدكان الجمبنا اجيب رصيد ولمن رجعت لقيت ولد واقف جمب باب بيتنا عاين لي قال لي :
ريااان كيف ؟
قلت ليهو تمام الحمدلله انت منو؟
قال لي معقوله ياخ ما بتعرفي ود عمتك انا عبدالعزيز ود رقيه عمتك قلت ليو ايوااا كيفك تمام ؟
قال لي تمام الحمدلله أها خلصتي امتحانات؟!
قلت ليو اي الحمدلله خلصت وانا حاولت ابادلو بسؤال ، قلت ليهو اها انتو لقيتو البلد كيف؟
قال لي والله ما بطال انا شخصيا ما خاالص كده بس جعفر وحمد اخواني البلد عاجبهم شديد ..
قلت ليهو امكن انت عشان ما متعود علي قطعت االكهرباء و الحر و الجو ده ..
ضحك كده وقال لي لا ابدا بس هناك الحياة اسهل من هنا اي شي متوفر و غير كده البلد نضيفه ياخ مش زي هنا حتي الواحد يلبس الهدوم خمسه دقايق بس يلقاها اتملت تراب وحتي المويه المفروض نغسل بيها الهدوم عكرانه و بتوسخ بدل ما تغسل ..
إنا جوابو ضايقني شديد وكلامو كان شين فى حق بلدو قلت ليهو بزعل :
دي بلدك في النهايه واي زول مصيرو يرجع بلدو ..
يتبع.....
