جعفر اتنهد تنهيده طويييله كده و قال لي والله انا ما عارف ابدا ليك الكلام من وين بس والله يا ريان في حاجه بتجذبني انجذاب غريب خلاص وانا زاتي ما قادر افسره اللحظه دي حسيت بي جسمي كلو برد لانو ما كنت مهيأه لي حاجه زي دي ولا كنت بعرف مفترض اعمل شنو في اللحظه او اتصرف كيف راسي لفه عديييل كده والحروف ابت تتعدل معاي عشان انطقه وبقيت اتلعثم في الكلام و بقيت شغاله اقول ليو ااانا لكن هناي والله ما بقدر .. وهو حسي بي ارتكبت بقي يضحك فيني طوالي ثبتني و قال لي ما عايزك تخافي او ترتبكي يا ريان بالجد ده احساسي اتجاهك
في الاول فسرتو انو اعجاب بس لمن شفت عمار كاتم ليك نفسك وبحاول يضرب فيك انا جاتني طاقه كده زاتو ما عارفه من وين قدرت ازح اخوك منك و اضرب فيو ضرب بكل عنف وكان في بركان غضب جواي لانو حسيتو بضرب في انسانه بتخصني انا و حقتي انا وبقيت بضرب فيو بكل قوتي واصلا ما تعبت وانا بضرب فيو وحاسي اني لسه ما عملت ليو الشي المفروض يتعمل ليو لو كان في يدي سكين وكتها والله كنت طعنتو
واسي انا ما منتظر منك رد عارفك لسه صغيرا علي الحاجات دي بس كمان عايزك تعرفي اني بحبك يا ريان والله بحبك و من جوااااي كمان
انا تاني ما حاجيب ليك سيرت الموضوع ده الا انتي تجي براك وتقولي لي انا كمان بحبك غير كده حاعتبرو رفض منك بس ما بحرجك ولا برحرج نفسي واتاكدي انو تعاملي نهائي ما حايتغير اتجاهك
واللحظه دي كنا وصلنا البيت طبعا انابقيت زي الصابه فيني مطره واقفه و مقهمه فيو زي العويره ضحك كده و وقف و قال لي يلا خشي البيت و اعملي حسابك تاني بالليل ما تطلعي ما امر بس طلب
ما رديت عليو طوالي دخلت البيت وجيت داخله علي ناس امي و مرام وانا مقهمه و ما مصدقه الكلام السمعتو ده زي الكنت بحلم لا اكيد ده حلم يا جماعه جعفر😍 قال لي بحبك لا لا لا ما مصدقه والله و خصوصا انا ما فيني المؤهلات البتخلي جعفر يحبني وبقيت اتكلم مع نفسي يا ربي جعفر ده عميان ولا شنو اسي انا فيني شنو يتحب حتي الانوثه الفي البنات ديك معدومه نفسي اعرف هو الخلاو يحبني شنو!!!!!!
امي و مرام بتكلمو معاي بس انا ماسامعاهم ودخلت جوه غيرت هدومي ورقدت في السرير و سرحت واتخيلت انو انا وجعفر اتزوجنا و اتخليت ليك اخواتي الشريرات ديلاك و هم ميتييين من الغيظ لانو متاكده انو كل وحده فيهم ميييته في جعفر هههه😂 ودخلت في دوامه من التفكيربس فنفس الوكت حسيت انو حب جعفر لي ده حايكون انتصار لي مش عشان اخواتي و الحنك ده لا بس عشان تفكيري السلبي الدائم اتجاه نفسي لانو لو رجعتتو فوق بتلقوني قلت ليكم اني ما فيني حتي انوثه و ده دايما تفكيري اتجاه نفسي اني وحده شينه و مجنونه و ماف زول حايغرم بي لحدي ما اموت او بمعني اصح اخواني الكبار المن ابوي مدخلين فيني العقده دي من صغيرا و طوااالي كان بسمعوني كده قلت بيني و بين نفسي لا لا لا يا ريان جعفر ده طال ما حباك بي شكلك ده ما تظلميو اوووعك لازم تكوني صريحه معاو حرام اظلمو معاي خلي يمشي يشوف ليو بت ناس زي الناس و زااااااتو عمتي ما حاتوافق لانو ال٢٤ساعه تفتخر بي اولاده وبزات جعفر ده ما حاترميو كده وحتي لو اتزوجنا حاتطلع عيني هوووي انا ما بستحمل عمتي دي نهااااائي
و قررت بيني و بين نفسي اني بكره امشي اكلمو و ارفضو و حتي ما حابرر ليو اي شي
ورقدت نمت....
صباحات الله بي خيرا صحيت اتسوكت وصليت وحتي بتذكر الوكت داك تحديدا الصلاة ما كان بي خشوع ربنا يغفر بس شربت الشاي ومقرره امشي طوالي احسم اموري مع جعفر اااي لااازم احسمو انا عمتي دي ما بقدر عليها مره قااااادره وحات الله واولاده ديل ما بتلعب فيهم و غير كده عشان العقده الاتجاه نفسي جواي طووااالي اتحركت ومشيت باتجاه القسم الثقاعدين فيو ناس جعفر و توووش دخلت لا احم لا دستور لقيت ليك عمتي فوشي انا نطيت وهي نطت قالت لي بسممم الله الرحمن الرحيم مالك يا بت في شنو انا طبعا اي كلام عايزه اقولو طار لي وكتها قلت ليها جعفر قالت لي مالو جعفر قلت ليها الاسكريم قالت لي يا بت اسكريم شنو انتي جنيتي ولا شنو 😂😂😂😂 والله بالجد ده الحصل بالنص قام جاء من جوه و هو ميت بالضحك قال ليها لا يا امي بس عشان انا و عتدها اشتري ليها اسكريم عمتي بقت تضحك قالت لينا مجانين انتو كدي اقعدي اشربي الشاي معانا و انا طبعا داخله جوه ضفوري قلت ليهم لا لا اسي شربت قام جعفر جراني من يدي و قال لي ارح نشتري اسكريم عن اذنك يا امي
ويتبع.....
