ابوي كان غضبان شديد ومشي علي غرفتو و كل زول مشي القسم بتاعو امي جات تهرج فينا قالت لينا انتو حاتجيبو لي الضغط انتو الاتنين مالكم ومالو الهطله دلدول امو ده مية مره كلمتكم ما ليكم دعوه بيهم مرام قالت ليها يا امي نحن ما هبشناو هو الهبشنا اول مالو ومالنا نشتري اسكريم ولا غيرو هو مالو و مالنا
امي قالت ليها مله التخنقك يا حيوانه هو خايف عليكم وصحي كلامو ماف بت بتطلع بالليل عشان اسكريم الا تكون بت ما نافعه ساي مرام قالت ليها يا امي انتي بتدافعي ليو مالك!!!
وقبل ما امي ترد عليها ابوي جاء داخل انا طوالي جريت دخلت تحت السرير وبقيت بتاوق لقيت ليك ابوي ده بالزعل داير يطق بقي ينادي في مرام قال ليها تعالي هنا ده مرام جاتو قال ليها الحصل شنو بالضبط مرام حكت ليو اي حاجه و طبعا معاها كم دمعه كده وبقي ينادي فيني انا دي خلاااااص قلت الليله بكتلونا طلعت من تحت السرير و شعري منكوش و عرقانه وحالتي بلبله ابوي قال لي بي نهره كده انتي مالك عامله كده
وانا بررجف من الخوف اصلا ما حصل اتكلمت مع ابوي عشره دقايق علي بعضم واليوم العايز يتكلم فيهو معاي بي سبب شكله و وشو كا كان مبشر نهائي
انا سكته سااااي زي الصابه فيني مطره تاني ابوي عاد لي السؤال بي نهره بقيت اتعلثم في الكلام لمن امي حنت علي طوالي نطت قالت ليو انت يا عثمان ما تنهرا كدن عاين البت دي خايفه كيف قال ليها انتي ما تدخلي مرام قالت ليو وهي بتقشقش في دموعه كانت متدسيه تحت السرير خايفه منك
ما عارفه اللحظه ديك ابوي نفسو قالت ليو شنو هدأ شويه كده وقال لي امشي غسلي وشك وتعالي طوالي جريت الحمام
امي سريع سريع خلطت ليها عصير ليمون و جابتو لي ابوي وقالت ليو هاك رووق اعصابك دي كده شويه ابوي شال العصير وبقي يشرب فيو وشارد و سرحان و مهموم امي قالت ليو انت ما تعمل كده لي اولادك يا عثمان ديل مهما كان حته منك
ابوي قال ليها يعني عاجبك البعملو فيو ده امي قالت ليو مهما كان في النهايه ديل لحمك و دمك حاول قرب منهم و لمهم عليك انا ما بتكلم عن مرام و ريان بس بتكلم عنهم كلهم اسي عمار ده كان تتفاهم معاو بالهداوه هو كان خايف عليهم بس في النهايه ديل اخواتو
ابوي قال ليها انا ما مشكلتي عمار مشكلتي في امو ما بتحترمني عشان كده خليها تتادب و عمار وكت ما عايز يرجع اليرجع امي قالت ليو امشي صالحو خلي يرجع البيت ابوي قال ليها لا يعني انتي عايزاني انا امشي ليو؟! هو المفروض يجيني لحدي هنا و يعتذر كمان امي قالت ليو والله يا عثمان انت حر لكن ربنا لمن قال ( اذا كنت فظآ غليظآ لنفضو من حولك) ما قاله ساي اسي أقرب مثل شوف ريان بتك لمن جيت داخل جرت اتدست منك كيف لدل ما تجي عليك و تحضنك.. وشالت كباية العصير و دخلت
كلام امي ده وقع علي ابوي زي الصاقعه وخلتو يعيد حساباتو وكتي
لمن شافني طولت بقي ينادي فيني بس انا وحاتكم سكنت في الحمام سكنه عشان ما اواجهو بكيييييت كده قدرتي في الحمام لمن سمعتو بناديني طوالي طلعت وانا برجف مشيت وقفت قدامو بقي بعاين لي وظااااهر اني كنت باكيه قال لي انتي اسي بكيتي ليي
