في مره وانا راجعه من المدرسه مع جدي قلت ليو يا جدو والله انا مشتاقه لي سهي صحبتي شديد عليك الله وديني ليها قال لي لكن امك لازم نوريها قبل ما تمشي،، قلت ليو كان وريت امي ما حاتخليني امشي عليك الله يا جدو ارح ساي،، قال لي سمح ارح بس بعدين امك لو عرفت انا ما لي دعوه قلت ليو كويس،،،
مشيت لي سهي ولمن شفنا بعض حضنا بعض و بكيينا شديد كنا مشتاقين لي بعض و كمان اشتقت لي حلتنا شديد و قعدنا اتنوسنا انا و جدو معاهم و بقت تحكي لي في شمارات الحله
وقالت لي والله والله يا ريان مرت ابوك الجديده الاسمه سندس دي طييييبه شديد ما كعبه وناس الحله كلهم حبوها بس محاسن دي بتعامله كعب و حاقره بيها شديد خلاص قلت ليها اصلا خالتي محاسن دي حركاته و مع ناس امي برضو كانت كده ،، قالت لي لا لا لا مطبقه ليك في سندس دي جنس نظريه لمن المره جاته امها تحرسه
طبعا اتخلعت قلت ليها و امها حاتقعد وين اذا سندس عندها اوضه و برنده بس ، قالت لي قاعده في القسم بتاعكم ياختي مفرشين ليها سرير وقاعده زي العجب
وواااي بس ما شفتو احساسي يعني نحن ما فارقين مع ابوي لدرجة انو يجيب لينا ام مرتو ويقعده في الجهه حقتنا؟؟!! معناها ما عايزنه نرجع اصلا يعني نحن رخيصين عندو للدرجه دي؟! ده حتي سؤال ساي ما سأل علينا
احييي بس اول مره كنت احس بي كره شديد اتجاه ابوي وندمت اني جيت اليوم داك لي سهي ياريتني لو ما جيت و لا عرفت شي
قلت لي جدو يا جدو ارح البيت خالتو حنان ام سهي قالت لي مالك يا بتي مستعجله اقعدو اتغدو معانا ،،، قلت ليها لايا خالتو معليش اعفي لينا انا عشان ما وريت امي و حاتقلق علي
ودعناهم و طلعنا ماشين في الشارع قلت لي جدو انا مشتاقه لي حلتنا دي شديد يا جدو،، ضحك فيني قال لي امرك عجيب يا بتي اسي في زمتك دي حله يشتاقو ليها بقيت اضحك في كلامو وبس فجأة اشوف ليك عربية ابوي جايه قاطعه فينا
في الاول ما انتبه لينا لكن تاني ركز فينا و جانا راجع وقف عربيتو جمبنا و نزل وجاء بي خطي سريعه فاتح لي دراعاتو نظام مشتاق لي و كده و ضماني عليو بس وحاتكم ولا اتهزيت كنت جامده فردت فعلي ووشي ده رابطاو ربطه شينه خلاص
وسلم علي جدي و جدي زاتو سلم عليو سلام بااارد كده قال لي مالك يا ريان ؟ ما مشتاقه لي ؟؟! ما رديت عليو تاني قال لي انتي جيتي هنا عشان تسلمي علي مش؟!
قلت ليو انا جيت لي سهي صحبتي ،، قال لي وانا ما عايزه تسلمي علي قلت ليو وانت ليي ما فقدتنا الفتره ديك كلها سنه كامله انت ما سالت مننا ،، قال لي انتي ما شايفه عمايل امك؟!
قلت ليو ونحن زنبنا شنو؟! مشاكلكم دي نحن ما لينا دعوه بيها يا ابوي،، قال لي فعلا انا قصرت فحقكم معليش ،، قلت ليو معليش دي ما بتعمل لينا حاجه ولا بترضي غرورنا نحن عايشين يتمي يا ابوي وانت لسه حي طوووول عمرنا انا و مرام فاقدنك حتي لمن كنا هنا كنا برضو فاقدنك بس سؤالك عننا الفي الشهر مره داك كان ببرد قلبنا شويه
اسي عرست و انشغلت بي مرتك و نسيتنا لا وكمان يا ابوي جبته امها و قعدتها في الجهه بتاعتنا يعني انت اصلا قنعان مننا و لا نحن فارقين معاك في شي علي العموم ان شاء الله يضوو ليك ارح يا جدو،،، و وكتها دموعي بقت تنزل
قال لي لا يا ريان انتي ما تاخدي الموضوع بالناحيه دي يا عمي عمر ما تتكلم و توعيها البت لسه صغيرا ما تخت افكار زي دي في راسه
جدي ضحك قال ليو عمي عمر هو انت خليت فيها عم اسي انا بتي من جات بيتي داك انت عملت لي انا خاطر و جيتني؟ يا ولدي كدي امشي لي بيتك و وليداتك الله يهدينا و يهديك
وعاين لي قال لي ارح يا بت قدامي .. وفعلا مشينا خلينا ابوي واقف و متحيير وكان اول مره الووم ابوي في شي ما حصل لمتو بس احساس الغيرا الجواي خلاني و من غير ما احس اطلع الجواي كلو
وصلنا البيت و لقينا امي لابسه توبه و واقفه في الشارع لمن شافتنا نازلين من التاكسي قالت لينا كنتو وين انتو و كيف تطلتو مشوار من غير ما تكلمونا؟
جدي قال ليها كدي استهدي بالله و ادخلي جوه الكلام في الشارع كده ما صاح
بعد دخلنا بدت التحقيقات جدي قعد يحكي ليها الحصل كللللو وانا بالزعل من ابوي دخلت الاوضه حقتنا و قعدت ابببكي بس اشوف ليك باب الاوضه فتح و كانت امي و دخلت قفلتو بالمفتاح و قالت لي يا حيوانه يا غبيه انتي البخليك تمشي تتكلمي مع ابوك شنو
وقبل ما ارد وقعت فيني ضرب شديد وانا كنت بصصصرخ وهي كانت عاادي من شدت الغضب تشيل راسي وتخبط بيو الحيطه او الدولاب عملت الحركه دي مرتين و في المره التالته انا اغمي علي طوالي و جسمي كان كلو دم زي كانو انا ما بتها زي كانو كانت بتضرب في حيوان ما انسان ياخ الحيوان زاتو ما بضربوهو كده
جدي و حبوبتي كانو بدقو ليها في الباب بس ما قادرين يفتحو
و يتبع.....
