_________
وأثناء ما أنا بتكلم مع عبدالعزيز ونقاشى معاه جاء محمد طالع من البيت ، وشافنا بنتكلم مع بعض ، جاء سلم علينا وعاين لي من فوق لي تحت كده وقال لي انتي بت منو فيهم؟! قلت ليو قصدك شنو؟
قال لي يعني بت ياتو مره فيهم ؟
كلامو بالإسلوب دا زعلني شديد ، كان مستفز وكأنو بنفخ فى نار جواي ، إتنفخت وإتمليت وإتغليت من جواي ، وبغضب قلت ليهو:
لو سمحت إحترم نفسك ، شنو ياتو مره دي، والكلام الشين دا ، شايفنا بهايم عندك هنا ؟
قال لي بكل استفزاز : خلاص خلاص ما تفوري و تدفقي لينا هنا قصدي ياتو خالة فيهم ..
قلت ليهو بكل برود وإحراج ما بخصك بت منو فيهم في النهايه بت خالك عثمان و بسس
ومشيت دخلت خليتو واقف محتار ، بعد شويه تاوقت ليهم لقيت عبدالعزيز بشاكل فيو اتكيفت وقلت يستاهل ومشيت بيتنا لقيت مرام اختي حكيت ليها الحصل ..قالت لي: اي فعلا الود ده مفتري وشايف نفسو شديد علي شنو ما عارفه لو في افتراء مفروض جعفر اليفتري وتلت كلماتها بغذل بنات وااااي من جعفر و من حلات جعفر و من سماحة جعفر وااااي بس ، وتعابير وشها بقى قلوب ، اول ما جابت سيرتو قلت ليها بإندهاش وإستغراب وعدم لا مبالاة :
هوي هوي انتي كمان بلا جعفر بلا بطيخ اصلا يفتروا ليي فيهم شنو زايد يخليهم يفتروا كان جعفر و لا اخوانو بشر عاديين جدا
قالت لي بلهفة المشتاق والمستلذ بسيرة المحبوب :
واي منو ياريان ، اسكتي بس جعفر ده ما بشر يا بت دا ملاك ، دا مكمل الوسامة ، بس كبوها فيه كب ..
ضحكت فيها ومن إنبراشها الناعم ، و دخلت رصيدي ونشطت خدمة النت وبقيت موتسبة و مفسبكة و ما شغالة بيها ..
لمن جات علي قالت لي بخلعة :
يا ريان يا ريان قلت ليها مالك بتكوري يا بت ؟
قالت لي :تعالي شوفي جعفر عشان تاني تلمي لسانك ده عليك..
قلت ليها بدم بارد : أقسم بالله انتي ما عندك موضوع يا بت عليك الله طيري مني بقت تحنس فيني في النهايه مشيت معاها لقيتها بتاووق بالشباك و جعفر كان واقف بتكلم بالتلفون عاينت ليهو ولقيتو فعلا وسيم جدا وملامحو بتدل علي انو زول عااقل و راااكز بس برضو ما اثار فيني شي ولا انبرشت فيهو زي ما اخواتي منبرشين و بعد شويه اكتشفت انو بنات الحله كلهم منبرشين فيهو ما اخواتي بس ، جاريات ومقطعات نعلاتهن وراه ، وانا متعجبة من موقفن دا ومستغربة حد الإندهاش ، إستغفرت مالك روحي ، واستغربت فيهم لانو انا الوكت داك ما كنت بعرف يعني شنو علاقات و حب فعلا كنت في سن مراهقة بس كنت من النوع الصعب اني انبرش في زول بسهوله الزول الوحيد الفي الدنيا دي انبرشت فيهو كان شورخان في الفلم الكانت فيهو معاو كاجوول ، كان مبالغة ..
غير كده الرجال عندي كلهم واحد او تقدروا تقولوا وكتها كنت صغيرا وعقلي ما منفتح للحاجات دي او الحياة العشتها من قهر ابوي و اخواني دخل فيني عقدة من الجنس التاني كل الاحتمالات دي وارده
في يوم وانا شعري منكش و اقفه في الغساله بتاعتنا بغسل في هدومي و هدوم اخواني و بشرهم في الحوش الكبير جاء واحد من اخواني ماف داعي لي ذكر اسماء لانو ما حانخلص ماشاء الله وكان اصغر مني بسنه قال لي و هو مكشر وشو قال لي :
انتي ده شنو البتعملي فيهو ده؟
قلت ليهو بخلعة :
مالك عملت شنو انا؟
قال لي وعيونو كانن من الغضب محمرات :
مش عارفه انو جعفر و عبدالعزيز و محمد اولاد عمتي قاعدين في البيت ده ما تلبسي ليك عبايه او توب
_قلت ليهو : اولا انا بغسل عارف يعني شنو بغسل وتاني شيء لو سخنت وكتمت الجلباب اللابساه ده زاتو بقلعو عشان السخانه اقوم البس لي توب ولا عبايه وبعدين انت مالك و مالي ..
قال لي بي زعل وغضب :
كويس لو ما كلمت ليك ابوي
قلت ليهو :
طير كلمو يعني حتخوفني بكلامك دا ، فى اللحظة دي عمتي رقية جات و شكلها سمعت كلامو قالت ليهو فيها شنو يعني جعفر و عزوز و محمد ديل زي اخوانها..
قال ليها ولا اخوانه ولا شي نحن زاتنا اخوانها تلبس مننا التوب خلي اولادك انتي قالت ليهو بزعل والله ده لا شفناه ولا سمعنا بيهو
امي سمعت النقاش وجات جاااريه قالت ليهم في شنو يا جماعه ؟
اي صاح والله يا رقيه ديل زي اخوانها بس انتي عارفه اولاد اخوك متربين تربية ناس البلد واحد زايد واحد يساوي اتنين
عمتي ما اشتغلت بي كلام امي وخشت جوه
اخوي حمر ليو عيونو وفات مشي امي قالت لي بي نهره هوووي انتي ما تسوي لينا مشاكل في البيت ده مش الهدوم دي سيبيها انا بشرها قلت ليها احسن والله ريحتيني ومشيت اوضتي رقدت نممممت ما صحيت الا بي تلفون سهي صحبتي رديت عليها وكنت كارهاها كره لانو صحتني من احلي نومه قلت ليها ياخ مالك يا قشران ياخ ما لقيتي الا اسي عشان تضربي لي وتصحيني من النوم
قالت لي النايمه ليها شنو اعلنو انو نتايجنا بعد بكره
طبعا لمن قالت لي كده انا خلااااااص ركبي ساحن و بطني و جعتني وعيوني زغللو.. وراسي لفه قلت ليها انتي منو القال ليك كده؟! قالت لي افتحي التلفزيون قناة النيل الازرق واقري الشريط الماشي بي تحت ده
طوالي قفلت معاها الخط وجريت فتحت التلفزيون وفعلا لقيتم كاتبين اعلان النتايج بعد غد بس خلاص من الوكت داك انا بقيت في دنيا تانيه امي بتقول لي يعني شنو اعلان النتايج عادي بتعدي يا بت اي شي و خلاص المهم تنجحي ومرام اختي شغاله تصبر فيني و تتكلم بس انا كلامهم بدخل بي اضان و بطلع بالاضان التانيه وبقيت ما عندي نفس للاكل و لا للشراب ولا لأي شي و داخله و طالعه في البيت و بنضف و بغسل العده و الهدوم و ما حاسه بي تعب نهائي لحدي ما جاء يوم النتايج انا اليوم ده من الصباح قعدت في شباك البرنده وخاته يدي فى راسي و ببكي.. ناس البيت بمرو علي نفر نفر و بتكلموا معاي بس انا ما شغاله بيهم ولا حتي سامعاهم هم بقولوا في شنو بس منتظره المؤتمر يبدا و حلف كان يبدا حسيت باليوم ده طويييييل و الزمن ماشي برااااحه مشيت قعدت في حديقة كده جمب باب بيتنا عاملنها من السياج مشيت قعدت فيها عشان ابعد من الناس ..
ويتبع ....
