قلت ليو قرار زي ده ما في يدي انا وانا اسي ما مستعده للموضوع ده معليش قال لي انا بجيك تاني بس المره الجايه مع اهلي
ومشي انا جسمي كلو كان برجف و خفت شديد ومشيت شربت مويه و رقدت في السرير وبعد هدات كده قعدت افكر في كلامو قلت في نفسي يعني انا ليي قلت ليو كده كان ارفضو وخلاص ما عايزه يسبب لي مشكله و خصوصا الحاجات ابزي دي عند اهل القريه خط احمر عديييل كده
وبعد يومين من الموقف ده كان يوم جمعه لاقيت داليا وشها جاييب الوان زي الكانت متشاكله مع زول سالتها مالك ما ردت علي
دخلت الطبخ لي خالتو نوال برضو كانت متغيرا ما عرفتها مالا و عم مزمل كمان جاء طالع و ما سلم علي استغربت و بقيت متحيرا الناس دي مالا يا ربي
عدا اسبوع بالحاله دي وانا كنت لمن اسالم بتهربو مني لمن غي مره واجوهوني قعدني عم مزمل و كان الوكت مع المغرب كده قال لي تعالي اقعدي هنا يا بتي،، قعدت
قال لي انتي يوم سد المال حق جيرانا ده الحصل شنو بالضبط لمن كنتي قاعده براك هنا
انا بقيت استحضر و نسيييت موضوع الولد ده نهاااائي قلت ليو ما حصل شي خالتو نوال رسلت لي اخو العروس و معاو شباب شالو العده وبس تاني ما حصل شي
بقو يعاينو لي بعض قامت داليا قالت ليهم مش قلت ليكم يا ابوي الناس ديل بتكلمو ساي
خالتو نوال قالت ليها انتي اسكتي
وعاينت لي قالت لي يعني يا بتي ماف زول كده ولا كده جاك هنا؟! وريني برااحه كده انا زي امك ،،،،، بس طق اتزكرت الولد و طوالي حكيت ليهم الحصل كللللو
عم مزمل قال لي يعني الود ده ما دخل هنا؟! قلت ليو اقسم بالله ولا اصلا بعرف شكلو ولا فتحت ليو الباب انا و بقيت دموعي تنزل ،، قال لي طيب ليي ما كلمتينا ؟! قلت ليو والله يا عم مزمل انا ما اديت الموضوع اهميه وفعلا كان مفروض اكلمكم معليش انا اسفه ما تزعلو مني
خالتي نوال قالت لي معليش يا بتي انتي لسه صغيرا و جاهله وما بتعرفي لي عاداتنا و تقاليدنا هنا الحاجات دي محرمه عديييل كده ولا حتي انك تتكلمي مع ولد خلي انو يجيك و البيت فاضي
قلت ليها و انا ببكي والله يا خالتو نوال ما دخلتو وقف برا قال كلامو ومشي
عم مزمل قال لي القريه كلها بتتكلم عنك و قالو انك دخلتي الولد الغريب البيت امشي مكان ماف سيره غير الموضوع ده
داليا قالت لي اصلا الناس ديل كده ما برحمو زول و بهولو الامور ما عليك منهم
عم مزمل قال لي طيب يا بتي ما جاء الوكت المفروض تحكي لينا عنك والحصل معاك الخلاك تجينا هنا؟؟!!!
قعدت ابكي و احكي ليهم من عمايل ابوي و نساوينو فينا لحدي ما امي ضربتني و قعدت ابببكي بكي هستيري لمن خالتو نوال جابت لي عصير ليمون هديت شويه و تميت ليهم الحكايه لحدي ما وصلتهم
عم مزمل قال لي لا حول ولا قوة الا بالله طيب يا بتي كده ما صاح لكن اسي انتي ليك سنه كامله معانا اهلك هناك بكونو جنو عديل كده !!!! انا معاك انو ابوك و امك غلطانين والغلط راكبم من ساسم لي راسم بس برضو ده ما مبرر للعملتيو ده انتي لازم ترجعي لي اهلك
قلت ليو وانا ببكي لا يا عم مزمل انا ما عايزه ارجع اهلي عليك الله خلوني معاكم،، قال لي انتي كده مستقبلك حايضيع لانو لو ما جبتي شهادتك بتاعت تامن و بتقي اوراقك ما حاتقدري تمتحني للجامعه ما تشوفي المره دي ساكته كده نحن مسكتنها بالقروش بس
قلت ليو ما عايزه امتحن انا ولا عايزه اقرا بس خلوني معاكم،،، ما رده علي وقام مشي من جمبي قلت لي خالتو نوال عليك الله يا خالتو نوال ما ترجعوني لي ناس امي تاني انا هنا مبسوطه معاكم
قالت لي يا بتي بعد الحصل ده تاني ما ينفع تقعدي هنا الناس اكلت وشنا طال ما عندك اهل لازم ترجعي ليهم نحن حانقوم معاك بالواجب لحدي اخر لحظه و نسلمك لي اهلك
قمت علي حيلي و دخلت جوه و قعدت ابكي داليا و دعاء بقو يصبرو فيني دعاء قالت ده كلو من خالتي صفيه جارتنا الشمشاره القواله دي قلت ليها قالت شنو فيني قالت لي هي الشافت الولد بتكلم معاك و طلعت الكلام ده في الحله كلها و زادتو شمار و كزبره من عندها طبعا
داليا قالت لي فعلا يا ريان هي بقت تالف في القصه و قالت انو الولد كان طالع من البيت ما قالت كان واقف برا و بتكلم وطبعا ناس الحله هنا اي كلام بطلع اول هو البتصدق عندهم حتي لو ما صاح وتاني لو قعدتي تحلفي في المصحف ده ورقه ورقه ما بصدقوك ،،، ختيت يدي فراسي و اتحسبنت عليها و قلت ليهم ربنا يوريني فيها يوم اصصصلو ما مسامحاها و لا عافيه ليها تلقي فيي روحه ان شاء الله
دعاء قالت لي يعني انتي اسي حاتسيبينا
اول ما قالت كده انا اتفقعت بالبكا و هم بقو يبكو معاي ...........
لمن جينا عشان ننوم دعاء جاتني تبكي قالت لي سمعت ابوي بقول لي امي انو بكره حايرجعك لي اهلك....
ويتبع.......
