اتعافيت بس مرضت بي حاجه تانيه عارفنها مش؟!
ايوااا بس هو زاااتو مرض حامد يا جماعه كانو الدنيا دي اتوقفت علي اللحظه الخته يدو علي راسي عشان يشوف الحمه نزلت ولا ما نزلت ياخ اتمنيت انها ما تنزل زاتو
وبقيت اراجع نفسي ومرات اكفت روحي علي اسلوبي الوقح الكنت بتكلم بيو معاو يوم النتيجه ليييي ياخ انا عملت كده وكيف زاتو اتجرأت واتكلمت معاو بالاسلوب ده
مالي يا ربي كنت غبيه ولا عقلي ما في راسي
المهم عدا كم يوم وبقيت اتمني اشوف خيال جعفر ساي بس
في مره جارتنا ضربت لي امي قالت ليها بتها جاها عريس وجايبين ليها قولت خير وانو لازم امي تحضر وقالت ليها رسلي ي مرام و ريان يساعدوني شويه
امي قالت ليها كويس وجاتنا انا ومرام وقالت لينا خالتكم مها دي الليله جايبين لي بتها قولت خير وقالت عايزاكم تساعدوها اللبسو عبايتكم وامشو ليها
مرام نطت عيونه وقالت ليها لا لا لا اصلو ما تقولو لي عزه بت خالتو مها البايره جاها عريس انتي جاده يا امي !!
امي قالت ليها اااي ماشاء الله البايرات الفي الحله كللهم اتخطبن انتي اقعدي لي كده
مرام يا امي انا كان ما كملت قرايتي مااااا بعرس
امي قالت ليها علي اساس انك الاولي علي دفعتك يعني عرسي عرسك ساااي يا بت
طوالي انا نطيت قلت ليها يا امي عليك الله خليها تم قرايته اصلا ماف زول معبره يبقي عدم عرس و عدم قرايه كمان امي بقت تضحك ومرام سكتني ودقتني جنس دق😂
يلا مشينا بيت المناسبه ولقيت ليك بنات حلتنا كلهن قاعدات موهطات هناك البتغسل العده البتنضف البتضاير
جينا انا و مرام داخلين وحده فيهم نطت قالت لينا ما بدري يا هوانم مرام عاينت ليهم وبقت تضحك وبي صوت مسموع قالت ليهم بررررضو لن يتزوجكم وفقعناها ليك انا وهي ضحكه والحريم الحولنا برضو بقو يضحكو وهم محل ما يخشو ما عرفو ومرام كان قاصده احمد ود خالتو مها جاء من برطانيا عشان يحضر عرس اختو
المهم عدينا اليوم هناك وبعد رجعنا استحميت قلت لي كرام ارح نمشي ناكل اسكريم نفسي فيو
قالت لي بري انا تعبانه من الشغل في بيت العرس ما ماشه امشي براك و جيبي لي معاك فعلا لبست عبايتي وبقيت مارقه لمن وصلت باب الشارع لاقيت عمار اخوي ود ابوي اكبر مني قدر مرام اختي كده وانا بخاف منو لانو سمين وطويل ويدو تخينه لو خبطني بيها ما بقوم تاني قال لي ماشه وين
قلت ليو ماشه اشتري اسكريم قال لي والواطه اتاخرت خلي الاسكريم ده لي بكره طوالي رجعت ولا اتناقشت معاو وحكيت لي مرام وزعلت وجات سايقاني قالت بي صوت عالي امشي يا بت جيبي الاسكريم وتعالي انا واقفه ليك هنا
هو بعاين ليها ساااي ولا فتح خشمو معاها قلت ليها انتظريني هنا ما تمشي قالت لي سمح وجريييت مشيت هو طلع ما اتكلم معانا زراني ليك في نص الطريق وانا شايله الاسكريم راجعه لمن شفتو جاني هبوط قال لي يعني انتي ومرام بتعاندوني مش؟ قلت ليو نحن في الشارع الله يرضي عليك خليني امشي قام شال الاسكريم وجدعو في الخور قال لي عشان تاني ما تعاندوني ومشي مني انا رجعت وممغوووسه مغسه ما يعلم بيها الا الله مرام سالتني قالت لي وينو الاسكريم؟! بس من سالتني فقعت ليك بكا قالت لي بتبكي مالك الحصل شنو حكيت ليها الحصل كلو الغضب الدخل جواها انا قلت مرام دي الليله حاتولع فيو قالت لي طييييييب انا بوريو السمين الاكال والله الا اندمو ولد محاسن
مشت فتحت التلاجه لقت امي عامله مديدة دخن شالته سخنته وختته في صحن ومشت بي جهة ناس خالتو محاسن ام عمار قالت لي خالتو محاسن امي عملته قلت اجيب ليكم حبه خالتو محاسن قالت ليها كتر خيرك يا بتي لكن غريبه والله الليله مالكم نازل منكم انتي وامك
مرام ههههه لي بتقولي كده يا خالتو محاسن اصلا الدنيا دي فيها شنو في النهايه ما واخدين منها غير العمل الطيب خالتو محاسن صحي والله يا بتي كلامك
كرام اتلفتت يمين وشمال لقت تلفون في الشاحن قالت ليها التلفون ده حق منو يا خالتو محاسن قالت ليها ده حق عمار والله سرقو تلفونو القديم ما عارفه جاب ده من وين مرام قالت ليها ايواااا
خلاص عليك الله فضي لي الصحن عشان انا ماشه حالتو محاسن دخلت تفضي الصحن طوالي مرام فكت التلفون من الشاحن ودستو لمن جابت ليها صحن شالت الصحن وطلعت جاتني قالت لي يا ريان عايني ده و رفعت لي التلفون قلعت ليها عيوني و قلت ليها ده شنو قالت لي ده تلفون عمار قلت ليها وانا مخلوعه يا مجنونه انتي عايزه تعملي شنو قالت لي اصبري وشوفي و اتعلمي
