وانا ماشه في شوارع القريه لحدي ما لقيت لي بيت مكسر كده دخلت فيو و رقدت في الارض نمممت ما صحيت الا بي اصوات الكلاب بتنبح بي اعلي حس ليها جريت اتدسيت في غرفه كده من غرف البيت برضو مكسره و وبابه واقع وكنت خايفه شديد و دموعي ابت تقيف لحدي قريب ااصباح انا صاحيه بعد ما الكلاب مشت تاني رقدت نمت الشمس لمن طلعت قمت علي حيلي و جسمي واجعني شديد من نومت الارض اتنفضت و كنت جعااااانه شديد مشيت الشارع و الناس كانت متحركه وبقو بعاينو لي بي استغرااااب ما اشتغلت بي زول كتير بقيت اللفلف في الشوارع لقيت ناس قاعدين في مطعم شعبي كده و بياكلو و انا كنت جعانه شديد بس طبعا ما بقدر اقول لي زول اديني ولا من طبعي اشحد زول كان اموت بالجوع
دخلت لي سيد المحل كان راجل كبيير في السن،، قلت ليو انا عايزه اشتغل عندك اليوم بس بنضف ليك الدكان كللو مقابل تديني حاجه اكله،، عاين لي كده قال لي يا بتي انتي شكلك غريبه من هنا انتي جايه من وين؟! واول ما قال لي كده دموعي نزلو لانو انا في وكت ما عايزه زول يسالني من الماضي بتاعي نهائي دنقرت راسي و اتحركت من جمبو ناداني قال لي طيب تعالي يا بتي انا بخليهم يدوك تاكلي و من غير أي شي
قلت ليو لا لازم بمقابل ما باكل ساي ،، قال لي بس انتي يا بتي صغيره و غير كده انتي شكلك مضروبه لانو في شاش ملفوف علي راسك خليني اساعدك بس
يلا انا اصلا ما بحب الكلام الكتير طوالي قبلت علي الباب طالعه تاني ناداني بس ما رديت عليو لمن جاء وراي لحقني قال لي خلاص تعالي يا بتي تعالي رجعت معاو اداني المكنسه قال لي طيب نضفي المحل
بقيت اكنس و اكنس في المحل و بقيت حاسه انو حيلي ما شايلني
خلصت الكنس شلت الجردل و المساحه عشان امسح لمن وصلت نص المحل كده راسي لفه و جيت واقعه ما حسيت بي شي تاني
صحيت لقيت نفسي في المستشفي مركبين لي درب و راقده في عنبر مليااان ناس وانا ما جنبي اي زول اتخلعت وقبلت علي الحيطه و قعدت ابببكي وحده من السسترات جاتني مرا كبييرا في السن كده قالت لي في شنو يا بتي مالك انتي و الله حيرتينا فيك
ما رديت عليها قالت لي يا بتي الدنيا دي ملياااانه هموم استغفري كتير و سبحي ربنا ده احن واكرم منو ماااف قامت ادتني كيس قالت لي الكيس ده فيو جلباب و عبايه جديده سابه ليك الراجل الكبير في السن الجابك هنا خشي الحمام ده استحمي وغيري ملابسك دي لانو شكلك كم يوم ما غيرتي
فعلا كنت محتاجه لي اني اغير ملابسي من غير ما اتكلم بس دموعي نازله مشيت استحميت و غيرت ملابسي وجيت رقدت في سريري لقيت السستر منتظراني و صلت لي الدرب تاني و جابت لي اكل اكلت لاني كنت جعااانه شديد،، قلت ليها انا عندي شنو؟! قالت لي انتي جرحك الفي راسك ده لا مؤاخذه خزن شديد ده غير انو جسمك فاقد
غذاء عشان كده ركبنا ليك درب
قلت لينا بس انا ما عندي قروش ادفع حق المستشفي ده قالت لي الراجل الجابك دفع ليك
دموعي غلبتني و بقيت ببكي قالت لي يا بتي انا ما عايزه اسالك الحاصل عليك شنو بس الواضح انتي عندك مشكله وما حابه زول يتكلم معاك بس لو محتاجه لي اي شي اعتبريني زي امك انا عندي بنات قدرك سمح؟
اشرت ليها براسي بمعني كويس ومشت خلتني بقيت راقده و بستحضر في الحاجات الحصل لي كللللو و ما عارفه السبب الحقيقي الوصلني المرحله دي شنو كنت عايزه اعاقب اهلي وفعلا عاقبتهم بس عاقبت نفسي اكتر و ما عارفه مصيري شنو و بقيت خايفه من مصير مجهول بقيت خايفه من الحاجات الممكن تحصل لي بقيت ما عارفه اتصرف مع نفسي كيف
فضلت في الدوامه دي وشويه ابكي و شويه اكون ساكته واثناء ما انا في الدوامه دي جاني الراجل صاحب المطعم و معاو مرتو وبناتو اتنين اتخلعت لمن شفتهم ودايره اقعد احتراما ليهم قال لي خليك زي ما انتي يا بتي نحن جينا نتطمن عليك انا عمك مزمل دي زوجتي خالتك نوال وديل بناتي داليا و دعاء حكيت ليهم عنك قالو الا يجو يسلمو عليك
يا حليلم يا خواني والله صحي السودان بي خيرو و الناس الطيبين والفيهم خير راقديييين سلمت عليهم و قلت ليهم شكرا ليكم و الله ما عارفه اقول ليكم شنو جيتكم دي عندي بالدنيا
داليا قالت لي يا بت ما تقولي كده اعتبرينا اخواتك بس ما وريتينا اسمك،، قلت ليهم انا اسمي ريان قالو لي اتشرفنا يا ريان ،، خالتو زوال قالت لي عاد يا بتي بعد تطلعي من هنا لازم تمشي معانا البيت يعني حاتمشي وين؟!
قلت ليهم بس انا حاتقل عليكم عم مزمل قال لي يا بتي تتقلي شنو البسري علينا يسري عليك و اصلا ماف زول حايسالك من شي وكت ما تكوني محتاجه تحكي لينا انا و خالتك نوال ديل موجدييين و تبقي لينا بت تالته ان شاء الله اصلا بس عندي البتين ديل تقلينا شويه ههههه
دعاء قالت لينا اي عليك ما ترفضي ياخ عايزنك تكوني معانا،، قلت ليهم كويس
فرحو شديد وبالجد شالو مني هم كبير
ويتبع......
