لقينا خالتو محاسن مغمي عليها و بحاولو يفوقوها بقينا واقفين في راسه و عمار العوير يبكي زي البنات ويقول لي ناس امي و عمتي امي مالا عملتو فيها شنو انتو؟! والله لو حصلت ليها حاجه ما بخليكم
عمتي هرشتو وقالت ليو قفل خشمك ده وطير بيتكم جيب ليك ريحه نشممه ليها عشان تفوق
جابو ريحه ورشوها بالمويه و صحصحت و قعدت تبكي وتقول والله ما كنت قايله حايعمل كده😭😭
ونحن بقينا طاشين شبكه وامي و خالتي ساميه كل وحده خاته يدها فراسه و قاعده قلنا ليهم في شنوو
ساميه قامت تجوط في محاسن كلللو منك كلو منك انتي اسي اها جاب فينا الرابعه كده ارتحتي
تننننننننن نحن طبعا بقينا عاملين كده😰 عمتي قالت ليهم وانتو زعلانين ليي البشوف كل وحده فيكم كده يقول هي الزوجه الوحيده تلاته من اربعه ما فرقت المهم اتعايشو مع واقعكم وخلاص
امي قالت ليها و كمان جايبه لينا هنا صحي الاختشو ماتو خالتي ساميه بقت تكورك و تتكلم و توجهه لينا في الكلام قالت لينا شايفييين عمايل ابوكم مشي عرس الرابعه وحايجيبه يسكنه لينا هنا يعني تقول نحن ناقصين مرام قالت ليهم ددي فهمونا يا جماعه من حقنا نعرف اي شي،،! و خالتي محاسن و شها جاييب الوان
عمتي قالت لينا زي ما سامعين ابوكم عرس الرابعه عشان كده امهاتكم عاملين الهليله دي كلها
رامي قال ليهم هو ابوي ده فيو حيل عشان يعرس تاني اسي يعرس لينا نحن ولا يعرس هو؟! ساميه قالت ده كلو منك يا محاسن انتي الخليتي يعرف المره دي اها خمي و صري
خالتو محاسن شغاله تدنب في حظها و قاعده عمار قال ليهم فهمونا معاكم كيف يعني امي السبب في الموضوع ده
خالتي ساميه قالت ليو المره العرسه ابوك دي صحبت امك اسمه سندس كانت الاربعه وعشرين ساعه متلصقه في امك واحده خسيسه خشت ورا ابوك و لطشتو مننا
عمار ختا يدو في راسو وقال لااااااا حولااااااا خالتي سندس دي مش متزوجه؟؟!!!!!!
خالتي ساميه قالت ليو اتطططلللقت من راجله انت قاعد وين
عمار طوالي صر وشو وطلع وكلنا مشينا بيوتنا ومصدومين
مرام قالت لي امي سندس دي حكايته شنو يا امي؟؟!!! امي دمعته مااااا جفت و خصوصا انها الزوجه التالته و المره الرابعه دي حاتون فيها هي،،؛ قالت لينا سندس دي صحبة محاسن كانت متزوجه ليها واحد عندها منو ٣اطفال ولدين و بت وكانت عندها مشاكل مع راجله ورفعت عليو قضية خلع وكانت بتجي تشتكي همومه لي محاسن و تتبكي ليها قامت محاسن زي الفالحه قالت لي ابوكم انو يكلم ليها صاحبو الاسمو عباس المحامي عشان يترافع عنها وبقي ابوك طالع و نازل معاها في الموضوع ده و فعلا كسبو القضيه و اتطلقت من الراجل الكانت متزوجاو
وبعداك اتلصقت في ابوكم لمن عرستو شكيته لي الله ان شاء الله ما ينفعه يا رب ولا تتهني بيو
مرام قالت ليها لاااااا حولااااا شووووفي العقربه دي عليك الله والله نوريها النجوم في عز الضهر ما نخليها تتهني بيو ولا ثانيه
قلت لي امي عشان كده خالتي ساميه كانت بتقول ليها كلو منك يا محاسن هههه غايتو جنس شي!!!!! وهو عرسه بتين يا امي ؟! قالت لي عقد عليها يوم كنا في الرحله داك
مرام قالو ليها اتاااااااريو عشان كده من اليوم داك ما جاء البيت و نو قاعد في شهر العسل و نحن ما جايبين خبر
طبعا يا جماعه انا واحده من الناس ما فارق معاي زول ولا حتي ابوي مع اني والله ما بكرهو هو ابوي في النهايه و بالعكس مرات بكون ظريف معانا وبهظر معانا بس ده شي قليل جدا وطوالي بعيد مننا يا سافر لي شغل ولا قاعد في غرفتو المطرفه ديك عشان كده احساس الزعل البكون اتجاه الحاجات الزي دي ماف ... قلت لي امي و مرام عاينو والله كلام عمتي صاح اصلا ما فارق تلاته حريم ولا اربعه في النهايه يا اني ما كان معرسك براك
طبعا امي اصلا زعلانه وانا زدت ليها الطين بلا شالت شبشبه و بقت ساكاني من اوضه لي اوضه وتقول لي مرام الا تمسكيها لي غايتو اليوم داك اتدقيت دقه حااااره الله يسامحك يا امي....
بعد امي دقتني زعلت شديد لانو انا شايفه نفسي كبرت علي الدق الزي ده مشيت الحديقه الجمب بابنا وانا دموعي نازله و زعلااااانه شديد وبقول في نفسي ان شاء الله يدبلم عشره بس كيييتا فيكم كده و زاتو معاو حق يعرس فيكم😢
جاني عزوز قال لي الجميل مالو زعلان؟! قلت ليو عليك الله طير من وشي يا عزوز ما ناقصاك انا ،،؛ ضحك كده و قال لي بالمناسبه مبروك لي خالي ياخ قالو جابه الرابعه هههههه وفكه ليك الضحكه عاينت ليو كده و قبلت ما رديت ليو قال لي والله انتي عارفه انا خالي ده مكيفني شديد ياخ انا حاقتدي بيو
ويتبع.....
