ساعات الدنيا بتعوضك بي ناس بكونو ليك سند اكتر من اي زول مع رغم انا ما عندي اخ شقيق يقدر يجيب لي حقي او يكون سند لي بس مرام اختي كانت بي مية راجل وقلبها قوي و ما بتخاف من زول حتي ابوي هي الوحيده الكانت بتتناقش معاو وتاخد و تدي معاو وتقلع منو حقنا غصبا عنو لدرجة انو مسمينها في البيت (الانسه مينشن)😂 تتزكروها بتاعت مسلسل سالي ديك
كانت شخصيته قويه وده اكتر شي كنت بحبو فيها و كان زفسي اكون زيها بس هيهات انا زولة جعجعا ساااي لو قالو لي هف ساي بقوم جاريه يلا ما علينا
مرام شالت التلفون وقالت لي ارح ننتظر عمار برا قلت ليها انتي ناويه تعملي شنو قالت لي بي نهره ارح بس
مشينا انتظرناهو في الشارع متضارين في الحديقه بتاعت البيت لمن لمحنا ليك عمار من بعيد جاي بس قالت لي تعالي معاي وانا كنت خايفه شديد قامت قالت لي طول ما انتي بتخافي كده عمرك ما حاتاخدي حقك
وكلمته دي فعلا حقيقه و ركزت في راسي ابت تطلع كلو كلو
المهم عمار لمن شافنا اتخلع قال لينا انتو المطلعكم شنو بالليل ده
مرام مشت علي خور كده فيو مويه وسخانه كده قاعده من ايامات الخريف ورفعت ليو تلفونو قالت ليو شفو زي ما جدعت لينا اسكريمنا في الخور الليله تلفونك ده حايتجدع
بسسس عمار قلع ليك عيونو وقال ليها ية بت انتي مجنونه ولا شنو جيبي التلفون ده ما حقي قالت ليو ولمن جدعت لينا اسكريمنا كان حقك
يلا عمار اللحظه دي غضب غضب شديد وقال ليها بي نهره يا مرام جيبي التلفون ده عشان اليوم ده يعدي علي خير
قالت ليو امشي جيب لينا الاسكريم بتاعنا اسي دي والا قسما بالله اجدعو في الخور
قال ليها و وشو محمر بالغضب وعايز يمشي عليها انتي قليلة الادب ولا شنو
وانا بقول ليها يا مرام لأ الله يرضي عليك اديو تلفونو خلينا نخش البيت
ومرام حالفه ما تديو التلفون لو جاب الاسكريم بتد شويه في ناس من الناس المرين بقو يركزو معانا ومرام واقفه جمب الخور ورافعه التلفون قصاد الخور
قالت ليو شفت لو جيت خطوه واحده علي طوالي حارميو وعلي وعلى أعدائي
حسيت ليك عمار ده عيونو بتطلع شرار و مشي علي محل الاسكريم اشتري ليو اسكريم وجاها راجع قال ليها هاك الاسكريم و اديني التلفون
مرام قالت ليو ادي الاسكريم لي ريان زح بعييييد هناااااك جمب العمود داك اداني الاسكريم و زحه قامت ختت ليو التلفون في الارض قالت ليو تعال شيلو يالله
وبي خطي سريعه دخلنا انا وهي البيت بعد دخلنا قفلنا بابنا البودينا للحوش الكبير وقفلنا ابوابنا و شبابيكن وقتدنا جوا
انا كنت خايفه شديد و ما عارفه مرام جاته الجرأه دي كيف انها تعمل كده و طوالي حكينا لي امي بس هو جاينا من هناك ويكورك ويجعجع و واقف يخبط في بابنا بي صوت عالي بقول والله يا مرام دقستي معاي شفتي الليله انا من هنا ما زاحي تفرجي علي الناس كده شفتي انا الليله يا كاتل يا مكتول
وانا دي خلاااص لحظته جاني ليك هبوط و مرام بترد ليو كلمه بالكلمه قالت ليو عايز تعمل شنو يعني انت رجالتك دي بتمارسه علينا نحن اخواتك امشي اترجل برا محل ما الرجال قاعدين قال ليها كويس انا قاعد ليك هنا عشان اوريك الليله الرجاله كيف
امي طلعت ليو قالت ليو مالك يا ولد فاير و متدفق فينا قال ليها يا خالتي ناديه ما تدخلي خلي مرام دي تطلع لي هنا بس قالت ليو ومرام عايز بيها شنو
اللحظه دي جات خااتو محاسن و تعالو شوفو الردحي والاصوات بقت عاليه
مرام طوالي اتصلت بي ابوي و حكت ليو الحكايه من اوله لي اخره وطبعا عشات ليو دور المظلومه و المقهوره و كده حبكت ليها حبكه دراميه مؤثره شديد بس ابوي طوالي خلي شغل وجاء البيت ولقي ليك الشغلانيه مدوره وقنب يهرج فيهم قال ليهم فضحتوني مع الجيران كل يوم اصواتكم عاليه كده اولع في البيت ده و اريحكم ولا اعمل شنو
خالتي محاسن قالت ليو وهي منفعله انت ما تلم بناتك ديل و..... قبل ما تم رصعه ليك كف صاموتي ثلاثي الابعاد خلي ليها راسه لمن لفه قال ليها بي نهره شايفه بناتي فاكات عشان تقول لي لمهم
طبعا حصلت لحظة صمت كده و امي و خالتي ساميه اللي هي مرت ابوي الكبيره لمن اتكيفو للكف و خالتي محاسن بقت تهرج والله ما قاعده ليك في البيت ده تضربني انا عشان بناتك حريقه فيكم كلكم عمار اللحظه دي داير يتشقه اهانتو مرام في الشارع و جوه البيت امو بتهين فيو بس اتفقع ليك في ابوي قال ليو وهو بكورك ااااي كلام امي صاح بناتك ديل ما مربيات و والله انا لو لقيت وحده فينم بالغلط ساي الا كان اكسر ليها راسه ده و مش بيتكم ده نحن ما قاعدين فيو ارح يا امي
ابوي برضو ادهو كف و قال ليو غوووور يالله ما داير اشوف خلقتك دي وكدي الله يقدرك تهبش وكده من اخواتك ديل عشان تشوف العمرك ما شفتو مني
عمار بقي يبرطم في الكلام ومشي شال هدومو و هدوم امو واخوانو وطلعو من البيت
ويتبع.....
