الدكتور جاء شافني و قال لي الحمدلله بقيتي كويسه بس لازم تتغذي كويس و بعد ٣ يوم تاني تجيني عشان انضف ليك الجرح و قال لي حاولي ما تخلي المويه تصلو و كده
وكتب لي خروج
مشيت معاهم بيتم والكان بيت بسيط جدا جدا بس فيو كميه من الحب و الدفئ والامان ما طبيعي ،، دعاء و داليا بقو يتشاكلو و كل وحده تقول عاوزاني انوم جمبها هههه داليا قالت ليها انتي اصغر مننا نحن قدر بعض خلينا ننوم جمب بعض في النهايه دعاء اقتنعت كان عندهم حوش كده كبيير انا و داليا فرشنا سرايرنا و رقدنا و بقينا نتونس لحدي ما نمنا
تاني يوم صحيت لقيتم كلهم صاحين لمن خجلت من نفسي بعداك عرفت انو اصلا في القري الناس بتصحي بدري ما عندهم نوم لحدي الشمس تمرق زي ما عندنا في الخرطوم
طوالي قمت علي حيلي لقيتم جابو لي فرشه اسنان جديده اتسوكت و اتوضيت و صليت الصبح ودخلت جوه كنت خجلانه شديد لاني ما متعوده عليهم داليا جابت لي الشاي جوه بي زلابيه قالت لي ما تخجلي ياخ اعملي الحاله واحده
وكانت لابسه ماشه المدرسه بتاعته وهي في نفس السنه بتاعتي تانيه ثانوي اتحسرت علي روحي لاني كان نفسي ادخل الجامعه😭
شربت الشاي و داليا و دعاء طلعو مدارسم و عم مزمل مشي المطعم بتاعو وانا شلت المكنسه عايزه انضف مع خالتي نوال البيت بس هي حلفت كان تخليني قالت لي انتي لسه عيانه امشي ابلعي حبوبك و ارقدي
والله يا جماعه خجلوني عدييييل كده
مرت زي تلاته يوم وانا كنت اول ما داليا تجي من المدرسه اشيل كتبه و اقعد اقرا قامت خالتو نوال قالت لي رايك شنو ادخلك مع داليا المدرسه قلت ليها يا خالتو لكن حايطالبوني بي اوراق التحويل من المدرسه بتاعتي قالت لي ما عليك اصلا مديرتم دي جارتنا و جنها قروش والله لو شافت القروش دي عيونه بتزغلل و ما بتسألك من اي شي
و فعلا مشت للمديره في بيته و قالت ليها البت دي بت امها بت خالي و هي يتيمه عليك الله خليها تدخل مع داليا الفصل وعلي ضمانتي انا البت شاطره و حاترفع ليكم اسم المدرسه و كده و ادته قروش زياده عشان ما تسالني من اي اوراق ثبوتيه و في النهايه اقنعته و الله الفرحه ما كانت سايعاني و بقيت بمشي المدرسه مع داليا و نقرا سوا و كنت مبسووطه شديد
بقو لي اهل و عمممرهم ما فرزوني من بناتم والله ابدا ما نسيت اهلي الحقيقين بس لقيت الاحن منهم علي و الحسيت بالانتماء اكتر معاهم مع انو ماف اي صلة قرابه
كنت شاااطره في المدرسه مع اني لمن كنت في الخرطوم ما كنت شاطره كده لانو نحن السنه كلها في مشاكل امي وضراته بس في القريه كان الجو مهيأ لي اكتر للمذاكره و ده غير انو انا و داليا كنا بنذاكر مع بعض و نشجع بعض
مرات بفكر في ناس بيتنا و حصل عليهم شنو والله ما كان في زول صعبان علي غير جدي وفراقو علي كان قاسي شديد و مرام كمان و مرات لمن اتذكرم بقعد ببكي لمن الله يغفر لي خالتو نوال كانت بتفهمني انو انا اشتقت لي اهلي بس ما كانت بتسالني من شي كانت بتصبرني و تاذرني و تقول لي يا بتي ده حال الدنيا بتفرق الناس و بتجمعم اصبري نحن اهلك و ما بنخليك ابدا براك
والله كلامه ده كان بصبرني و كنت ممشيه حياتي و نهائي ما عندي رغبه ارجع لي امي و لا لي أبوي
وصلنا تالته ثانوي و في مره راجعين انا و داليا البيت لاقتنا بت الجيران اسمه عايده كانت اكبر مننا سلمت علينا داليا سألته قالت ليها مالك قاشره كده قالت ليها الليله جايبين سدالمال لي نوره اختي كلمي امك و كلكم بعدين تعالو بيتنا
لمن وصلنا البيت داليا كلمت امها و مشو سد المال ومعاهم دعاء بس انا ما مشيت معاهم فضلت اقعد اذاكر في البيت وانا قاعده سمعت صوت زول بدق في الباب لبست توب و مشيت وقفت جمب الباب و عشان براي سالت في الاول منو
قال لي انا عوض اخو عايده من ناس العرس خالتي نوال قالت ليك ادينا الصحانه و الصواني بتاعت الشاي و الكبابي كلها الفي البيت
فتحت ليو الباب قلت ليو بس الحاجات دي كتيرا شديد انت براك ما بتقدر تشيله قال لي دقايق انادي الشباب ديل يشيلو معاي بس انتي جهزيهم لي،، قلت ليو كويس و مشيت المطبخ جهزت ليو العده العايزه كلها بعد شويه جو زي اربعه شباب كده وانا و اقفه في المطبخ و بدو يشيلو في العده اخر واحد كان بعاين لي شديد لمن عقدني بس انا اتعمدت اتجاهلو شالو العده العايزنها و فاتو
بعد طلعو قفلت الباب و دخلت دقيقتين بس تاني الباب دقه تاني مشيت قلت منو؟! قال لي انا محمود قلت ليو عايز شنو قال لي كل خير انا يا بت الناس عايزك لي قدام ،،! قلت ليو كيف يعني؟! قال لي عديييل كده عايز اتزوجك
طبعا اتصدمت وقلت ليو انت قايلني رخيصه كده جاي تقول كلامك ده من ورا الباب قال لي انا ما بعرف زول هنا اصلا جينا مع عماد صحبي ده لي سد مالو ده بس وبكرا الصباح راجعين الخرطوم و تاني ماف شي بجيبني البلد دي و انتي والله فيك كل مواصافات البت الانا عايزه بس عايزك تديني فرصه ما اكتر من كده
طبعا بقيت مصدومه وهو بقي يحلف فيني اني بس اديهو فرصه....
ويتبع....
