عشت ايام صعبه شويه بعد الحصل ده و عمل لي عقده من التعامل مع الناس كنت مرحا و بحب اضحك مع ده و اشاغل ده بس بعد الموقف الاتعرضت ليو ده كسر جواي حاجات كتيره حلوه
كنت اغلب وكتي بقضيو نوم وما بتونس كتير ولا بختلط بي الناس كتير فضلت كده اسبوعين كاملات لمن رقدوني ٢٤ساعه في المستشفي اخدت دربات تغذيه لقلة الاكل
طووول الفتره دي جعفر ما سابني لحظه واحده كان معاي لحظه بلحظه رغم اني ما كنت بتجاوب معاو لانو وكتها كنت ما طايقه زول
كنت دايما بحس بيو احن زول علي وانو ربنا عوضني بيو ااااي والله عوضني بيو وفي الوكت داك لسه ما كان في علاقه بيني و بينو بس مجرد اهتمامو بي كان دايما بحسسني اني ما براي في الدنيا دي و عندي السند
ابوي كان حاسي بي ذنب اتجاهي فظيع بس هو ما من النوع البظهر الشي الجواهو كان بجي بتفقدني يومي وفي اليوم ٣ او ٤ مرات بسال عني .. عشت ايام الله لا عاده
جعفر كان بجي يلقاني نايمه بجر كرسي ويقعد جمبي و يتونس مع مرام لحدي ما اصحي يسالني عن حالي مرات برد و مرات ما برد و مرات بجي يلقاني صاحيه و يجيب معاو بيتزا و اكل عشان يغير لي جو شويه بس انا ما كنت بتجاوب معاهو نهائي بس اصلو ما زهج مني وكل مره بحاول يكسر الروتين عشان يطلعني من حالتي بس الدخل جواي اكبر من البعملو هو
خالتي محاسن جات لي ابوي وبكت ليو و اترجتو انو يطلع ليها عمار من السجن ابوي قال ليها ما بطلتو الا ريان تعفي ليو جاتني واتكلمت معاي كتيييير وبقت تقول لي انو انتو اخوان و صحي هو غلط بس ده اخوك ما ترضي ليو بالسجن وانا ما حاخلي يجي جمبك تاني وكده .. وانا ما كنت بردها و بقبل وشي منها بس امي قالت ليها ما بنعفيو الا تمضوهو بي تعند انو ما يتعرض لي بناتي تاني ولو اتعرض ليهم بي اي شكل من الاشكال ما تلومو الا نفسكم
خالتو محاسن وافقت علي الشرط ده و فعلا طلعو عمار من السجن و مضي علي التعهد و محاسن رجعت بيته بس عمار قعد مع ناس جدو ما جاء البيت عندنا وانا بديت اتعافي الحمدلله وبقيت ارجع لطبيعتي شويه شويه بس بقيت بتحفظ شديد في تعاملي مع اخواني من ابوي وطلبت من ابوي انو ما يتكلمو معاي نهائي بزات الاولاد لو في اي شي انا بستاذن منك انت لو رفضت ما بعملو لكن هم ما يتدخلو فيني وفعلا ابوي حزرم و الحمدلله قدرت امرق من سيطرتم الكانت خانقاني وكنت بعتبره تسلط و انتقام اكتر من انو خوف علينا
اكيد ناس حايسالو انتقام من شنو ؟! انا حاجاوبكم لانو اصلا ما حكيت قصتي من انا طفله بديته من وانا في سنه تامنه يعني عمري ١٣ سنه اكيد وكتها ما كنت طفله كنت بت واعيه و كبيره بس طفولتي بتتلخص في اني من قمت بي مشاكل و غبينه بيني وبين اخواني والسبب امهاتنا الكان طل وحده بتحرض اولاده علي التانين و زرعو جوانا كره لي بعض وكانت حياتنا زي ما قلت ليكم في البدايه ماشه يقانون الغابه القوي ياكل الضعيف.
في مره وانا قاعده زهجانه جاء عبدالعزيز لقاني بتافف ساااي قال لي ريوون مالك زهجانه كده قلت ليو الاجازه دي ياخ ما عايزه تنتهي قال لي مش وزعوكم خلاص علي المدارس قلت ليو اي وزعونا بس لسه ما نزلنا قال لي يلا هانت قربوو خلاص شدي حيلك بس قلت ليو ان شاء الله قال لي ارح نطلع نتفسح شويه بدل ما تتزهجي لينا كده قلت ليو ياااريت ياخ طوالي لفحت عبايتي و قلت لي مرام ارح معانا ضربنا لي ابوي كلمناو و مشينا سوا التلاته و كانت كلعه حلون شديد اكلنا سندوتشات و اسكريم و هظرنا و ضحكنا و رجعنا البيت لمن دخلنا البيت لقينة جعفر واقف في نص الحوش ماسك الخرطوش برش قال لينا ماشاء الله ان شاء الله دايما مبسوطين قلت ليو جمعا يا رب عزوز قال ليو والله فاتتك طلعه رهيييبه بس الجايات اكتر قال لينا انتو ما عزمتوني لكن كان علي الاقل تجيبو لي معاكم اسكريم وضحك
انا كنت شايله باقي اسكريمي ما كملتو قلت ليو خلاص اسي ما فات شي هاك الاسكريم ده قال لي يا زوله ما داير قلت ليو خلاص ارح سوا نشتري تاني
طوالي رمي الخرطوش وقفل الماسوره و قال لي ارح و انا وكتها كنت بهظر ساي لقيتو جادي
ما حبيت احرجو قلت لي مرام و عزوز ارحكم معانا مرام قالت لي والله تاني ما برجع المشوار داك كلو امشو براكم و دخلت عزوز قال انا عندي كوره ماشي احضرا امشو انتو اشترو وجيبو لي معاكم
جعفر ما اشتغل بيهم وحراني من يدي قال لي ارح خليهم ان شاء الله يتفلقو زاتو
وفعلا مشينا وكنا بنتونس بي رواقه و الجو كان حلووو قام قال لي يا ريان انا عندي كلام عايز اقولو ليك بس لازم تفهميني صاح
قلت ليو خير ان شاء الله
اكيد عايزين تعرفو الحوار الدار بيناتم انتظروني الحلقه الجاين ان شاء الله
ويتبع....
