{ الحب الاعمي }
الجزء الثاني
تابع الحلقه 11
بعد مرور ثلاث ساعات
وبعد ماعقد قرآن هيثم ع إكرام
صبا يوسف وقعد يسلم ع هيثم ويبركلا
هيثم: وهو مبتسم . الله يبارك فيك
معتصم: مشا شور هيثم . ومدلا يدا . وطبس يسلم عليه . مبارك ياباشا مبارك
هيثم: ابتسم . الله يبارك فيك
ابراهيم: كل شي ع بركة . وسلم ع هيثم
هيثم: الله يبارك فيك
جمال: مبرووك
هيثم: سلم ع جمال . الله يبارك فيك
عصام: وهو مبتسم ، طيري مبارك
هيثم: اووو برو الله يبارك فيك عقبالك ان شاء الله
عصام: ان شاء الله
وقعدو بالواحد منذر وفيصل ونزار يجو لهيثم ويباركولا
وجا خو إكرام واقربائهم يباركو لهيثم
واصحاب هيثم الي من طرابلس عزمهم ع فاتحه
قعدو يجو ويباركولا ومن بنغازي جاه عصام
وكان هيثم في لحظتها يضحك وعايش لحظه الي هو فيها
ابراهيم: مشا شور هيثم وهو ماسك الموبايل .
هيثم
هيثم: التفت ع خوه . نعم
ابراهيم: امسك الحاج
هيثم: خذا موبايل ع طول . وحطا ع وذنا . الو ياحاج
علي: كل شي ع بركه ومبروك
هيثم: ابتسم . الله يبارك فيك . كانت نقصتك انت بس وتكمل فرحتي
علي: مش مشكله المهم انت فرحان وخوتك وعيال خوتك كلهم جنبك
هيثم: بس ماحد يعبي مكانك ياحاج
علي: سكت اشويه. باهي تبيش شي مش ناقصك شي
هيثم: لا كنت نبي نسمع صوتك والحمد الله سمعتا
علي: باهي رد بالك ع روحك . والله الله في بنت الناس
خليك قد الخطوه الي خطيتها اتجاها
هيثم: ان شاء الله ياباتي
علي: خلاص سلملي ع جميع .
هيثم: باتي
علي: انعم
هيثم: راضي عليا
علي: تنهد . وكان متريح ان ساره غادي والمهم مع هيثم . الله يربحك دنيا واخره
هيثم: ابتسم . وتنهد براحه وحس زي الهم وانزاح ع قلبا . لما سمع كلمة الربح من باتا
باهي ياحاج رد بالك ع روحك وع صحتك
علي: ان شاء الله هيا السلام عليكم
هيثم: وعليكم السلام
وسكر من باتا وقعد فرحان اكثر من قبل
عطا موبايل للخوه ابراهيم وقعد مع شباب اصحابا
وبعد اشويه طلعو من جامع
ومشا هيثم هو وعيال خوتا شباب كلهم
واصحابا للمزرعه كانو ديريلا فيها جوا
وحفله صغيره وجيبيلي زكره
وقعدو يعزفو ويطبلو
وشباب يرقصو عليها وهيثم نسا كل شي
وقعد يرقص ويصفق مع شباب
كملو شباب حفلتهم مع ساعه اثنين في ليل
ورحو مع بعضهم للفندق بالعريس بكل
وكل حد فيهم خش غرفه متاعا
هيثم: خش ادوش وغير دبشا ورقد ع سريره
ورن ع إكرام
إكرام: الووو
هيثم: شن الجو ياكراميل
إكرام: بهي الحمد الله . انت شن امداير
هيثم:شي توا كيف روحت من لحوزا ع قولتكم
إكرام:هههه . انبسطت
هيثم: اها الشباب دارولي جو
إكرام: اهلك الكلهم جو
هيثم: اها كلهم ماعادا الحاج بس رن عليا بعد الفاتحه باركلي
إكرام: ايه باهي الحمد الله .
هيثم: وانتي شن درتي اليوم
إكرام: اني طايره اليوم يوم النجمة ولبست البودري
هيثم: هههه شن النجمة هذي
إكرام: هادي عاداتنا وتقاليدنا
هيثم:باهي تمام . دزيتلك مسج وصلك
إكرام: ايه شبحتا بس كانو جنبي البنويت وهرجا ماقدرتش نتصل بيك
هيثم:عارف حتي انا قلتها . لان حتي انا شباب قعدو جنبي ماسيبونيش
إكرام: باهي بترقد ولاشني بدير
هيثم: اها بكره ورانا يوم طويل . واخيراً بكره حتكوني جنبي
إكرام: ابتسمت. ايه فرحانه هلبا اني قعدت مرتك
هيثم: وبكره حتقعدي مرتي رسمي
إكرام: ابتسمت . باهي عاد تحرجنيش
هيثم: هههه هذي حقيقه .قوليلي حنيتي
إكرام: ايه حنيت
هيثم: عند وين
إكرام: لا احني مانديروش فيها هلبا
يعني نص كف الايد بس
هيثم: والله . انا نحب الحنه وديما نشوف فيها ع خواتي وأمي تعجب فيا . ومتمني نشوفها ع مراتي هكي
إكرام: كان قوتلي راه غيرت ودرتها بعاداتكم انتم
هيثم: اليد مش مهم عادي بس كرعيك كنتي اتحنيهن عند فوق
إكرام: خلاص لما تتنحا هدي . نوعدك انحني حنتكم
هيثم: تمام . وبعدين مش الحنه هي الي تخليني نحبك
صدقيني
بس انا خاطري اي شي نحبا نشوفا عليك
إكرام: ايه نعرف مصدقتك . واني انحبك هلبا هلبات
هيثم: ابتسم. خلاص راه انجيك توا .
إكرام: هههه تعاليلي
هيثم: بكره حنجيك ونأخذك ونعيشو مع بعضنا احلا ايام
إكرام: امين يارب .
هيثم: خلاص ياكراميل عدي تريحي وخليني نمشي نرقد
إكرام: باهي وانت امشي تريح.
هيثم: تصبحي ع خير
إكرام: وانت من اهله
