الحلقه9️⃣
ساره: كملت الاغنيه وتنهدت . وطبست راسها . تمسح في دموع نزلاً منها
وقعدت اطبطب بصوابعها في جيهت اعيونها وتمسح بشويش
هيثم: صبا ورأ ساره بزبط.
وطبس راسا يبحت فيها
انحبك
وبصوت واطي مش مسموع اعترف بيها هيثم بينا وبين روحا
ساره: حست بحد وراها. التفتت . ورفعت راسها . لقاتا هيثم
ردت اتبحت في بحر
هيثم: قعمز جنب ساره . وثنا كرعيه وحط ايديه ع ركبيه
. وبحت في ساره . سمعتي شن قلت
ساره: بلامبالاه . وهي تبحت في بحر ،انت حكيت اصلاً ، شن قلت
هيثم: زمط ريقا. وقعد بيحكي بس كاين متردد .
ساره: بحتت في هيثم. شن قلت
هيثم: يبحت في عيون ساره من قريب وملامحها. وهو يحاول يجمع كلام ويحكي ،لو انتي قتيلي ماتجوزش انا مش حنجوز
ساره: انصدمت .وزمطت ريقها . وقلبها قعد يدق بالقوه ، وجت بتحكي . بحتت في هيثم . اشويه وقعدت تفكر وسكتت
هيثم: يحكي بصوت هادي . كنك سكتي
ساره: بحتت في البحر .
هيثم: قوليلي بس توا قلبك ينبض بالقووه قاعد ،
ساره: هزت راسها بمعنا لا وقعدت تهز فيه وابتسمت بهزوا . مستحيل انت . وبحتت في هيثم
هيثم: يبحت في ساره . عليش
ساره: عضت ع فمها من تحتها . ورفعت حاجبها . وهزت براسها بمعنا لا . وغمضت عيونها.
وردت تبحت في بحر . وهي تضغط ع سنونها انت مريض
هيثم: عقد حواجبا . واستغرب . كيف يعني مافهمتش
ساره: بحتت في هيثم. وضغطت ع حروف الكلمه . مريض ماتعرفش كيف
هيثم: عشان قتلك هكي نقعد مريض
ساره: بحتت قدامها. هيثم طلقني
هيثم: يبحت في ساره وساكت . وضغط ع يدا بالقوه
ساره: بحتت في هيثم. سمعت شن قتلك انا معش نبي نقعد معاك دقيقه وحده ،
وصبت ساره وعطت لهيثم بظهرها ومشت .
هيثم: وهو يصبي . ويبحت في ساره تباعد عليه . راه كان مشيتي حنجوز
ساره: التفتت ع هيثم. وهي رافعا حاجبها. اجوز ماحد ماسكك
هيثم: يبحت في ساره وحط ايديه في جيوبا. هذا اخر قرار عندك
ساره: اكييد
هيثم: تنهد . وبعصبيه وهو يقدم شور ساره. تمام انتي الي اخترتي
وهلب من قدام ساره ، وهو رقيلا . هيا نروحو
ساره: هلب من جنبها هيثم . بحتت فيه . ومشت وراه وهيا مطبسا راسها. وقلبها يدق بخوف
هيثم: كاين يمشي قدام ساره وعاقد حواجبا ورقيلا .
وصل للشليه ركب مع درجتين . وفتح باب طفأ ضي الشاليه
وبرم عليه وطلع سكر باب بالمفتاح
ونزل لقا ساره مصبيا جنب باب السياره ومربعا ايديها وترجا فيه
قدم عند باب السياره وفتحها . وركب هيثم وطبق باب بالقوه
ساره: فتحت الباب . وركبت . وهي ساكتا ومربعا ايديها
هيثم: ولع السياره . وخر ومشا
وكان طول الطريق وهو وساره ساكتين ومايحكوش
وكل حد فيهم يفكر في عالم ثاني
وبعد حاولي ساعه . درس هيثم في حوشهم
ساره:فتحت باب السياره. ونزلت بسرعه وخشت جوا
وصبت عند باب الدار لقت عزيزه مقعمزه
وتفرج ع تلفزيون
خيرات ياعميمه
عزيزه: بحتت في ساره. وين ياخيتي مشيتي اختفيتي يابتي . شغلتيني
ساره: ابتسمت. وهي تقعمز . اها ياعميمه طلعت لقيت هيثم برا مشيت انا وياه مشوار وجينا
عزيزه: اها وباهي ياحنه تما بالي مشغول قلت هذي وين اختفت
ساره: تنهدت . وابتسمت مجامله للعزيزه. وهي تخفي الغصه الي في قلبها
هيثم: خش للحوش وهو رقيلا وماسك مفاتيح متاع السياره
وخش للدار لقا أما مقعمزه وساره
عطا نظره للساره وبحت في أما
يا أمي
عزيزه: وهي منفجعا ها ياباتي كنك بسم الله الكريم مندعب علينا لاسلام لاشي . شن في
هيثم: نبيك في موضوع
ساره: بحتت في هيثم . وصبت . باهي انا نخش مطبخ ندير قهوه ياعميمه
عزيزه: وباهي
ساره: كانت بتطلع من دار وهيثم مصبي ع باب مسكرا
هيثم: وسع وجا ع جنب وعطا طريق للساره
. وهو يبحت فيها بنظرة غل وعصبيه
ساره: هلبت من جنب هيثم وجت بتمشي المطبخ وكانت مصبيا في ممر الي يشيل للمطبخ وقفتها كلمة
هيثم
هيثم: وهو يحكي بصوت عالي ومسموع . وبنبرة فيها عصبيه . يا امي راه خامس يوم العيد عرسي
ساره: قلبها دق بالقووه . وحست بغصه في قلبها. وخنقتها العبره . ومشت شور المطبخ .
عزيزه: حطت يدها ع قلبها. هييي اسم الله الكريم . شن دوتا هالخبر ومن امتا
هيثم: ياامي انا قررت ومن فترة انتم عندكم علم بأن عرسي قريب وبنجوز مره ثانيه
عزيزه: عارفا . بس مش ع اساس بالسرعه هذي
وبعدين حتي خطبه نحنا ما مشينا خطبنا ولانعلمو عليها حاجه الوليه الي اتريد اتجيبها هذي
هيثم: انا متفق مع خوها وكلام كلام رجالا . وبعدين بعد يقعد عرس قريب عليش الخطبه والعادات وتقاليد
انا والبنت وخوها متفقين مع بعضنا وراضين
الموضيع تانيات كلهن اشكاليات بالنسبه ليا
عزيزه: مهما انكان الاصول اصول مفروض في خطبه ودفع ع اقل وبعدين طقوس العرس بس مش ع طول تجوز
هيثم: امي انا مش في وقت نقعد خطبه وندير في مواضيع هذينا . لاني انا نبيها وبالحلال وقريب عشان هكي مادرتش الامور هذينا
عزيزه: والله ياوليدي مانريد انلطها عليك لكان ننقناك استعجلت ونحس فيك مستعجل . انكان اتريث وتعطي روحك فرصه اتعرف حتي ع هالوليه الي اتريد اتجيبها كويس
وتعطي فرصه حتي مراتك هذي ليش رافضها مرأ اتقوليش سماحه وسقما وهاديه ليش اتدير في روحك هكذاهي
هيثم: وهو يحط في يدا ورأ رقبتا ويمسح فيها من لورا
امي انا قرار وقرارتا وكلمه ومش حنرد فيها
العرس خامس يوم العيد
وقتلك بيش توتو ارواحكم
عزيزه: وليش هالستعجال انا نريد نفهم بس
حتي حاجات ماوتينا .
هيثم: كل شي واتي ماتخممي في شي انتي نبيك بس توتي رداك الي بتمشي بيه وغادي تلقي كل شي جاهز
حتي وين تقعدو موتيلكم كل شي انتي عليك تمشي بس
عزيزه: تنهدت وسكتت
هيثم: فيش تفكري يا امي كنك
عزيزه: لاشي ياباتي لكن انا من راي اتحكم عقلك وتفكر اكويس ليش الاستعجال هذا
هيثم: فكرت وحكمت عقلي . والله يربحك يا امي فكوني من قصه هذي
عزيزه: خلاص علي كيفك انا مانريدكش تندم بعدين بس
هيثم: ان شاء الله مش حنندم
عزيزه: ان شاء الله . باهي قلت لباتك
هيثم: تو طالع ماشي بنحكيلا
عزيزه: باهي خلاص . بس ريت بيش تشوف خيتك احلام راه مسافره لمصر
هيثم: والله
عزيزه: والله ، واليومين هذينا قبل العيد تبي تمشي
هيثم: هو خلاص اصلاً بكره الكبيره وبعد بكره اول يوم العيد اعلنو عليه
عزيزه: اها عارفا
هيثم: خلاص تو نشوفها تو احلام . تو نرن عليها
عزيزه: وباهي . قلت لمراتك انت عندها العلم . انا مش عارفا كيف نصرف . اقسم بالله ماتحشما وماعندي وجه حتي لها ولا حتي كيف نحكي جنبها اني بنحظر عرسك الثاني
راه مهما نكان وااعره ع وليه وانا مانبيكش تظلمها معاك رد بالك راه ظلم الصبايا واااعر
هيثم: تنهد. هي راضيا وهي تبي هكي وموافقه
وانا خليني نطلع نشوف احلام وبعدها نمشي لباتي خلاص معش في وقت
ومحتمل ان اول يوم العيد مش حنكون معاكم حنسافر طرابلس اندير مواضيع غادي ونوتيلكم الجو وانتم اطلعو ثاني يوم العيد
عزيزه: وباهي كان مشينا يعني كيف فهمني . شن بنديرو
وشايل معاك ذهب ومتفق ع شي هذا ولا لا
عدا حتي نمشو لأمها ونتفق معاها ونشوفها
هيثم: امها وباتها ميتين وعيشين مع جدتهم وهما يديرو جوهم
ونحنا عندنا يوم صاله بس
تمشي للصاله تلقي كل شي جاهز فيها العشاء الديكور الحلو المسرح الفرقه كل شي تملكم فيه بأذن الله
عزيزه: وماتريدش ادير اسبوع
هيثم: ان شاء الله يا امي ثاني يوم الزفه مسافر برا ليبيا طالع شهر العسل شهر برا وبعد نروح حنروح هنا ونقعدو في جناح الي فوق
عند مانبني جنبكم حوش هكي اصغير
عزيزه: تنهدت . وسكتت .وكان مش عاجبها الكلام ومعترضه بس مابتش تحكي لهيثم وتنكد عليه ، لان كاين باين ع وجه ان مضايق وفي شي مزعلا
هيثم: تمام يا امي عرفتي الامور كيف مرتبهن .
عزيزه: عرفت ياباتي وان شاء الله خير .شاور باتك وشوف رايا وربي يسهل ان شاء الله
هيثم: ان شاء الله. وقدم ع اما . وطبس عليها وحب علي يدها. ورفع راسا وبحت فيها. وبصوت مخنوق .ادعيلي انتي بس
عزيزه: ندعيلك في كل وقت ياوليدي ربي يريح بالك . كنك نحس فيك تعبان فيك شي اشكيلي نا امك ونخاف عليك قولي فضفضلي سلم اوليدي انت بسلامتك غامض وماتحكي في شي هذي مشكلتك
هيثم: تنهد . وبأبتسامه مجامله. لاغير من ايام الي فاتن نشتغل ونتعب ومانرقدش اكويس ونخمم في العرس هذا عليش باين عليا تعبان
عزيزه: باهي ياباتي رد بالك ع روحك
هيثم: ان شاء الله . وصبا هيثم . خلاص يا امي انا طالع تبيش شي
عزيزه: لاسلامتك . بس قبل ماتطلع جيبلي دواء متاعي في مطبخ حطتا فوق مكرويف
هيثم: حاظر .
وطلع هيثم من دار من جنب اما ومشا شور المطبخ
