{ الحب الأعمي }
الجزء الثاني
البارت الاخير للحلقه 1️⃣5️⃣
ركبت إكرام فوق للجناح متاعها بعد ماروحت من مستشفي
وغيرت دبشها وقعمزت في صاله رقيالها
من هيثم وليش يعامل فيها بطريقه هذي
لوطا في حوش جدي علي
عزيزه: كنك ياحاج من لما جينا وانت تبرم وماسك هالموبايل في يدك
علي: انرن ع ساره ورقمها مقفل
عزيزه: وشن اتريد فيها
علي:بحت في عزيزه ، كيف شن نبي فيها، بنشوفها وين مختفيه من اول يوم معش شفتها بلكل
وانا مافضيتش بيش نسأل وينها
عزيزه: تنهدت ، وقعمزت ع شلتا ، ماتعبش روحك ، انت اتريدها اتجي لهيثم
علي: شن قصدك انتي عارفا شي ودستيه عليا
ياحاجه ولا شنو
عزيزه: ريت ياحاج انا عمري مادخلت في قرار خذيتا
وديما مصبيا معاك حتي لو كان القرار هذا مش عجبني
لكن المره هذي انريد انقولك اطلع منا موضوع ساره وهيثم
وخلي ولدك يصرف ع كيفا وياخذ قرار بروحا من دون ماتدخل
علي: قعمز ع شلتا ، وقابل عزيزه، شن اتقولي انتي
شايفا شي ولاسمعا شي
عزيزه: ياحاج قبل ماهيثم يصير معاه الي صار
تعارك مع ساره عركه كبيره وشفت في عيون ولدك
نظرة قريب قتل البنت وركبت نريد انحز بينهم لكن
قالي ماندخلش
علي: يبحت في عزيزه ويسمع ومتفجأ
عزيزه: نزلت ودرت روحي قاعده تحت
لكن بعد سكر عليه الشقه ركبت لاني خفت يصير شي
وسمعتا يعيط وصوتا يجيبك من وين
ولدك مايبيش البنت وساره بروحها قالتلي خلاص
الله يربحك ياحاج هالمره ماتدخل بينهم
وخليهم هما يصرفو في بعضهم
علي: شن دوتا هالكلام الي اتقولي فيه هذا ، كيف ماندخلش انتي عارفا اني مانحبش السلبيه
وبذات انا ولي امر هالعيله ومسؤول ع كل واحد فيها
عزيزه: مش في كل شي ندخلو صاح انت الكبير وممكن نضرتك تفرق علينا كلنا بحكم خبرتك وعمرك
لكن ياحاج مرات تدخلنا يخرب حاجات
وانا نشهد بالله ويشهد عليا ربي ، ان بنت هذي بدل مانسعدوها ظلمنها
علي: بحت في عزيزه وعاقد حواجبا، كيف ظلمنها
عزيزه: ريت ياحاج انا عارفا نيتك شنو وعارفتك يوم ماخششتها ع هل الحوش الا انك اتريد تحافظ ع أمانة رفيقك
وفرضتها ع ولدك ولدك ماعصلكش أمر وخذها
لكن ياحاج شن الي صار تراه قول ايش الي صار في هالزيجا هذي كلها
صحيح هي قعدت بين عيونك بس البنت مظلومه مع ولدك
ومشا جاب ع راسها وليه ثانيه وهي صاح قالتلك موافقه بس عشان ماتريدش اتزعلك
علي: ومن قالك هذا كلا انتي ، ساره قالتلي موافقه وكانت راضيه وحياتها ماشيا عاديه كيف اي وليه تزوج ويزوج عليها راجلها
عزيزه: هذي مشكلتك انت ياحاج ، انك تعامل في عيالك ع اساس هما من جيلك
راه زمانا وزمانهم مش واااحد
نحنا زمان المرأ ترضا وتصبر مع راجلها
وكان راجلها جاب مرأ ثانيه تصحبها وماتقعد الا اخت لها مش ذرتها
ومهما دار راجل في مرأ كانن يتحملن ويصبراً
وكنا نزوجو رجلتنا مانشفوهم الا يوم الزفه ونبدو معاهم الحياه من هذك اليوم ولاعندنا حب لاشي
كلا جيل توا ماعاد فيهم الشي هذا
توا لازم يحبها قبل وتحبا وبعديين يزوجو
علي: يسمع في عزيزه ، وساكت
عزيزه: انت تحساب ان ولدك راضي بيها وتحسابها هي رضت بولدك
هما الاثنين كارهين بعضهم غير الايام جبراتهم يقعدو ومافي حد مظلوم في هل القصه هذي كلها امفيت هالقزونا طيحت السعد
ونشهد بالله انا قعدت ع كراسي عقلي ليا اربع ايام وحسبتها
قلت بالك الي صاير في عيلتنا هذا كلا قعدين من مستشفي لمستشفي وكل مره فينا واحد صايرتلا حاجه
يكون عشم ، ومايبقا الا عشم هاليتيمه
علي: فكيني منا كلام عشم ماعشم هذا كلام فاضي
هذا قضاء من الله وابتلاء ونأجرو عليه
ماتربطيش الي يصير بساره
عزيزه: باهي خلي عنك هالكلام ، بالك صحيح هذا ابتلاء
لكن ولدك وساره مش طيقين بعضهم ومش منسجمين مع بعضهم
الله يربحك ماتدخل خلي ولدك ينوض ويصرف بكيفا
وريحا وريح هالبنت وخليها اتشوف حياتها مع واحد غير ولدك
علي: عليش تعارك معاها هو شن السبب الي يخليه يتعارك معاها
عزيزه: تنهدت، السبب ان ساره طيحت إكرام من دروج
وإكرام رمت العيل
علي: انصدم ، شنوو
عزيزه: هذي مشكله شفت غيرت صبايا ايش ادير ، ومازال اتقولي هيثم وساره يبقو مع بعضهم
علي: لو كان نشوفها بعيني ساره دارت الشي هذا مستحيل نصدق ، الموضوع مش هكي بلكل ومستحيل ساره ادير شي كيف هذا
بتغبيني غير في تربيتها وشخصيتها ساره مش من نوعيه هذي
عزيزه: باهي بعد عندك الفرسا انت وعارف ، ليش مانكش شايف انها مش متريحا مع ولدك
علي: امالا تحسبيني غير انمص في صبعي ، انتي عارفتيني اني انقيس في كل شي بنظره وحده بس
عارفهم مايبوش بعضهم
لكن انا نشوف في شي انتي ولاغيرك يشفو فيه
حتي ساره وهيثم مش شايفينا الي انشوف فيه
عزيزه: استغربت، شن الي اتشوف فيه قولي عليه ع اقل ريح قلبي
علي: ولدك غاوي البنت وهي غاويه فيه ،
عزيزه: شن دوتا هالكلام انكان غاوين في بعضهم ماهذا حالهم وراه مااجوزش عليها
علي: ساع اتشوفي انكان ماطلع كلامي صاح
ودقيها ليا خضرا
انا مادرت هذا كلا الا لاني عارف انهم في بينهم محبه
لكن تبيلهم وقت بيش يعرفو لان ولدك انتي عارفتيه
كيف الساس ومعاندي وراسا كاسح
ومايكسر راسا ولعناد الي هو فيه امفيت ساره لانها كيفا بزبط
عزيزه: وباهي الحل شنو نخلوهم هكي ، البنت قالتلي ماتبيش ولدك ،ليش مش راضي تفهم ،وبعدين الوليه الثانيه حتي هي هذي المسكينه شن نديرو فيها بنت الناس الي جابها هنا والي بسبب ساره رمت ولدها
علي: كلا قصة ساره طيحتها هذي ماتخش دماغي بلكل اكييد في شي ثاني وعلما عند ساره
وكنك ع وليه الثانيه ولدك راه لايحبها ولا حتي متقبلها
عزيزه: تنهدت بضيق. وانت شن عرفك انكان مايحبها راه ماخذهش
علي: قتلك عناد ، انتي عارفتيه بعد يقول كلمه مايردش فيها ، وقالي ان حيزوج الي يبيها يوم مشكلتي معاه في زررده هذكي
وعندني وعشان مايطلعش هو الي غلطان ازوج بيش يثبت كلما بس
عزيزه: يبقا عشم إكرام الي راكب في ولدك ،
علي: استغفر الله العظيم، ياوليه خاطي البدع الي اتقولي فيهن ، قتلك هذا ابتلاء لاعشم لاسو
عزيزه: امالا كيف يزوج وحده بيش يثبت كلاما ، وانت راضي بالشي هذا ياحاج
علي: انا مش راضي وقتلا اني مش راضي بس ماعندتش عشان نبيه يعرف غلطا شنو
لان كبير وفاهم عند امتا بنقعد وراه نجري ونصحح في اخطاءه
توا خليه يحول شوكا بيدا
عزيزه: يعني كيف ماتبيش تدخل في موضوع
علي: مش توا كنتي اتقوليلي ماتدخلش. واني سمعت كلامك
ساع نقعد واخذ زاويه ونتفرج عليه ، كيف يدير بروحا
ومش حندخل لافيه لا في صباياه الاثنين
لكن عندي مشوار واحد انديرا هو شور ساره عشان نفهم منها
ومن بعدها نطلق بينا بينهن وريني كيف يصرف بروحا
عزيزه: بحتت في علي ، وسكتت
علي: ليش النظره هذي شفتي كلامي غلط
عزيزه: تبقا عارف هذا كلا وماتبيش تدخل وتخلي ولدك يتخبط بروحا
علي: انتي طلبتي مني ماندخلش ليش توا غيرتي رايك
عزيزه: لان نحسب ولدك مايردهش ، لكن بعد كلامك هذا حسيت ولدك بيظلم الاثنين
ولازم ندخلو نحنا هلا
علي: لا مش لازم خليه يحل مشكلا بروحا ، وريني كيف الجيل هذا يصرف
عزيزه: بحتت في علي بنص عين ، وهي رقيالها وساكتا
علي: بنفهم ليش انقلبتي وقعدتي تخزري فيا اتقول انا الي غلطت ومشكله انتي الي قتيلي بعظمة لسانك ماتدخلش فيه
عزيزه: انت تقول هيثم راسا كاسح ومعاندي، هالكساحا ولعناد جيبهن لكي
فوله ونقسمت منك سبحان الله
علي: بس نا ماازوجتش عليك
عزيزه: ابتسمت، تقدر غير اديرها
علي: ريتي الي خلاني مانزوجش عليك انك مسرع ماتضحكي
عزيزه: ابتسمت، ماهو هذا من هبالي
علي: ابتسم ، وانا غالي علي اهبالك
عزيزه: حاج خلاص راه يخش علينا واحد من ضنوه
تبقا كشفا رايح روحك
علي: باهي ديريلنا طويست شاهي من تحت ايديك
وتعالي نهدرزو وخلي هيثم عنك
ولا تزعلي روحك ولاتحطي في بالك انا بعد نشوف اني لازم ندخل ساع ندخل
عزيزه: والنبي صحيح
علي: والله ياحاجه ماعليك فيه ، خليه توا هو بروحا يحل مشاكلا ونشوف كيف يصرف وبعدين لو لقيت اني لازم ندخل ساع ندخل
عزيزه: يعني برايك انت نحتجوش ندخلو فيه
علي: مشكلتا هو هذي ، وهو الي غلط وازوج وجاب مرأ ثانيه وظلم الاوله والثانيه
خليه يعرف كيف يدبر روحا ويتعلم يحل مشكلتا
ويصرف كيف الرجالا
انا ماني قاعدلهم العمر كلا ، نبيهم بعد يوحلو في مشكله بروحهم يحلوها
عزيزه: الله لايغيبك عنا ويعيطك طول العمر والصحه
وتبقا ديما فوق روسهم
علي: ان شاء الله ، لكن كم قعد من العمر اكثر مامشا منا
لذلك نبي نطمن ان كلهم رجالا ويعرفو يحلو مشاكلهم وحدهم
وهذا اختبار لهيثم ونشوفا كيف يصرف فيه
عزيزه: صبت من شلتا، باهي انا نعدي نجيب لعداله ونشوهي
علي: وع طريقك جيبي مصحف متاعي ، خليني نقرأ اشويه
عزيزه:وباهي
