{ الحب الأعمي }
الجزء الثاني
البارت الثاني للحلقه 1️⃣6️⃣
هيثم: كنك جيبني هنا لحوش سيدها
معتصم: زمط ريقا، لانها قاعده هنا
هيثم: بحت في معتصم، وسقم تقعميزتا ورفع مسند الكرسي، كيف عرفت انت
معتصم: بارتباك، لان ساره قبل العمليه قالتلي نجيبها هنا وانا الي شلتها
هيثم: مسح بيديه ع وجه، وتنهد بضيق، باهي انزل رن ع جرس
معتصم: نزل ، ويرن ع جرس
انفتح باب المزرعه
ومشا معتصم شور سياره ركب فيها وخششها جوا
ودرس
معتصم: ننقنا ماشور شي جيتنا في صبح
هيثم: بحت في معتصم، كيف ماشور شي راجل جاي لمراتا تبيني ناخذ موعد بيش نشوفها
معتصم: تنهد، باهي تمام ، خلاص اسكت جا الراجل، ونزل معتصم وهو مزلط لسيد ساره وسلم عليه
فتح هيثم باب سياره، وقعد يحاول ينزل وكانت نزلتا صعبه
فتحي: مرحبتين مرحبتين ، بشويه عليك،
هيثم: صبا وحاط يدا ع جنبا ، ومد يدا ثانيه سلم ع عم ساره
فتحي: الف حمد الله ع سلامتك
هيثم: الله يسلمك
فتحي: شن داير توا ، كيف خلوك تطلع من مستشفي
هيثم: بحت في فتحي، كيف ماطلعت ساره
فتحي: سكت اشويه، باهي تفضلو هيا خشو
ومشا فتحي للمربوعا وفتحها لهيثم ومعتصم وخشو فيها
معتز: طلع من الحوش وجا شور المربوعا ، واول ماخش جت عينا في هيثم
هيثم: بحت في معتز، وزاد اخره رقالا وغمت عليه،
معتز: مد يدا و سلم علي معتصم .
وقدم ع هيثم ومدلا يدا وسلم عليه بحراره
الحمد الله ع سلامتك
هيثم: الله يسلمك
معتز: قعمز قابل هيثم ومعتصم
معتصم: يبحت وساكت، لان كاين شايف عم ساره ومعتز في مستشفي بعد وصفلهم العنايه وجو حمدولهم ع سلامة هيثم بعد طلع من العمليه
فتحي: كان بيفتح موضوع وغير جو لان حسا جو احراج بذات لهيثم ، باهي كيف صار في راجل الي ضربك
وقعد مره هيثم ومره معتصم يحكو غيرو الجو وهما يحكو في كلام رجالا
وهيثم عقلا كلا في ساره وشوفتها
قبل ساعتين ونص
عند ساره
بعد رنت ع عمها ومعتز ، جتها الممرضه وساعدتها ع انها تلبس دبشها
وجا سيدها ومعتز ومعاهم امها
خذوها وطلعت من مستشفي
وكانت طول الطريق ساكتا وماتحكيش لحد وتذكر في شكل هيثم لما شافها
وصلو للمزرعة عمها ونزلو ساره
وقابلنها البنات ومرات عمها وسلمو عليها وحمدولها ع سلامتها
وخشو بيها للصاله جوا وقعمزوها ع كرسي
فتحي: وهو يقعمز جنب ساره، ويبحت فيها انا درت كل شي قلتيلي عليه و وفقت ع كل شي
بس توا لازم تحكيلي ليش طلعتي هكي وتفهميني شنو الموضوع
كاين معتز وصالحه واريج ورده وآمنه مقعمزين حوالين ساره ويبحتو فيها ويرجو فيها تحكي
ساره: زمطت ريقها، وهي تجمع في قوتها ، وتبحت في عمها
انا ياعمي فتحي قررت نطلق من هيثم
كلهم : انصدمو
فتحي: وشن صار مش انتي الي تبرعتي بكليتك وتوا جايا بتطلقي
انا مش فاهم شي
ساره: انت من قبل قتلي انا معاك في كل شي والي تبيه انا حاظر فيه
كنك تذكر في رمضان
فتحي: وانا مازلت عند كلمتي، بس الي مش مستوعبا انتي من حاجة كم يوم جيتيني
هنا وصدمتيني بخبر انك بتبرعي وقتيلي راجلي ومن حقي عليه نتبرعلا
وعندتي حتي امك هذي ، واهي شاهده امك
وطلبتي منا كلنا مانحكوش لانك قتيلنا حيعترضو لو قتيالهم وخلوها سر عند نطلع من عمليه
ونحنا احترمنا قرارك ، وخليتينا نمسكو دكاتره ونكتمو ع موضوع وحتي لما علمها ولد خوه الدكتور مسكتيه بروحك وأمنتيه
وتوا اتجي اتقولي بنطلق كيف اتجي هذي
ساره: حطت يدها ع جنبها وهي تألم
معتز: باتي خلاص ماتزرش عليها، هي تبي تطلق طلقها منا هذي رغبتها وهي عارفا مصلحتها مش صغيره
ساره: رفعت عيونها في معتز . الي ساعدها ع كلام
فتحي: انا مش ضدها ، انا بنفهم بيش لما نمشي للناس وللحاج علي نعرف شن انقول ونعرف كيف نتفاهم معاهم
ساره: عمي انا في شي كنت دستا عليكم ، ان انا وهيثم اساساً مش متريحين مع بعضنا وهذي احسن وقت ليا عشان نطلق
صالحه: وتوا خطرلك بعد تبرعتي وخليتي روحك بكلي وحده
ماني من قبل قتلك اطلقي وسيبيه من لما ازوج عليك
ليش توا ليش ياساره
وبكت صالحه
آمنه: حطت يدها ع ظهر صالحه ، طبطب عليها
ساره: خنقتها العبره ، وهي حطا يدها ع جنبها، ومابتش اتقول ان هيثم طلقها وصعبت عليها روحها انها تحكي حقيقه
معتز: بحت في ساره، خلاص ياساره انتي الي تبيه يصير وانا من قبل قايلك عندك خوين انا وايمن وباتي باتك
وانتي تبي طلاق وهذا يريحك مش حيصير غيرا
ساره: ابتسمت . ابتسامه وجع
فتحي: بحت في ساره ، بالك اتفكري كويس وتاخذيش قرار مستعجل
ساره: فكرت ياعمي ، وهذا انسب حل
فتحي: تنهد، ان شاء الله خير ، توا خلي الراجل يطلع من مستشفي، ويتريحو اشويه وان شاء الله نفتح الحاج علي في موضوع
ونطلقك منا
ساره: طبست راسها وبحتت في جنبها، وهي تحاول تمنع دمعا تنزل من عينها، تمام
انا بنخش انتريح
فتحي: بحت في اريج و ورده، صباً ساعدنها وخششنها للدار اتريح
