خش معتصم للفيلا وكان وراه شاحنه كبيره
خششها للقوراج
ونزل معتصم من سيارتا ومشا شور حوشهم
وخش ع أما
امي يا امي
سالمه: طلعت وهي مسكا ساقم في يدها، تي نعم كنك اتعيط
معتصم: عطيني الرضاعه متاعي
سالمه: تي عدي انا الهبلا الي طلعتلك ، وجت سالمه بتخش للمطبخ
معتصن: يضحك، تي انبصر معاك ياسلوما كنك عصبيه رايحا
اسمعي انا انسكر باب الحوش افطني ردي بالك تطلعي
وقولي للفرخا رحاب حتي هي راه تزرق وتقعد بتطلع شور هلها
سالمه: وعليش كنك
معتصم: جايين عمال بنركبهم فوق ، افطني بس
مش اديريلي اطروح لمباوعا متاع العزايز
وتقييد الاحوال
سالمه: تو امتا عمري درتا هالخبر هذا ، الي يسمعك يقول قيسها ديما تباوع أما
معتصم: هابا عليك ياسلوما عارفهن طروحك ،
سالمه: باهي اطلع اطلع ، مش فضيتلك ولا فاضيه لحناطتك توا خليني ندير الغداء
معتصم: شن ديرتيلنا باهي اليوم
سالمه: رشده
معتصم: يانا عليا وخلاص منك ، ننقنك حاجه كبيره ياسلوما ياعوينا بيك الي واخذك، انا حاسده
سالمه: ابتسمت، كلا انت لسانك هذا مصري
معتصم: خلاص ياسلوما الله الله في تبويع
سالمه: باهي خلاص
وطلع معتصم وسكر باب الحوش ع أما وهو يبتسم
ومشا شور صاحب الشاحنه
ونزلو العمال منها وقعدو ينزلو في الاثاث والحاجات
ويركبو فيهن شور شقة معتصم فوق في دور الثالث الي تقابل في شقة منذر
طلعت من دار وانا حطا يدي ع بطني وماشيا شور
موبايلي الي كان ع طاوله يرن
طبست بشويا وخذيتا
الو
هدي: حيوتا
انا: خيرات ياحنه شن جو
هدي: ميه ميه انتي كيف حالك يابطه
انا: الحمد الله، انتم شخباركم وكيف حال أمي
هدي: يسلمو عليك كلهم ، اسمعي ، اليوم عندك حاجه
انا: لا عليش
هدي: اصلاً ايمن جاي بيحدد موعد العرس مع باتي ولعيال
انا: ابتسمت، مبرووك مبروك ، وامتا ، اكيد عدا انتي عارفا
هذي: هههه اكيد ياحنه لاني انا الي مخترتا التاريخ هذا
انا: امتا
هدي: 17/7
انا: نص الشهر هذا ، حي عليك
هدي: اها ياحنه خلاص قبل العيد الكبير
انا: بس عليك زر ، حصلتو صاله
هدي: اها حصلنا، وحجز حتي فيها وانا شوفي من امتا نوتي في دبشي من ايام وانا في قماط
انا: ههههه عطك الخير ، يعني مش ناقص شي
هدي: لا خلاص مطبخ ودار النوم وصالون كلا واتي
توا بس نقعدو نوتو في حاجات العرس الموالح والحلويات بس
لكن بالنسبه ادبشي شوفي من امتا وانا انكركر ونوتي وندس
انا: وباهي ياحنه ربي يهنيك ونفتكو منك عدا خلاص
هدي: يانا عليا واخيراً معش انمص ليم ، كبدي انسحنت من ليم
انا: ههههه كلا انتي لسانك هذا ان شاء الله بعد ماتزوجي يقصر اشويه
هدي: ههههه خزيه ، باهي تبي اتجي بيش نتفقو ونهدرزو كلمت هاجر وفاطمه
انا: خلاص تو ان شاء الله يروح يوسف ، ونتغدو وانجي ان شاء الله
هذي: شن درتي غداك
انا:درتا طاجين
هدي: باهي معناها ، نرجوك ماطوليش
انا: باهي ان شاء الله ، باي
هدي: باي
