{ الحب الاعمي }
الجزء الثاني
تابع للحلقه9️⃣
هيثم: جابني المسج الي حضرتك دزيتيه ليا . وكيف تطلعي بدون ماتشوريني من الحوش
ساره: وكنا المسج فيه شي جرح شعورك يا استاذ
هيثم: مسح بيدا ع وجه ونزل بيها ع لحيتا . وبعصبيه ماتحكيش معايا بطريقتك هذي
ساره: رفعت حاجبها. وبعنجهيا. وحضرتك باي طريقه اتحب نحكي معاك
هيثم: عض ع فما . ساره ماتستفزينيش
ساره: بحتت في هيثم بتكشيخا. وكأنها مشمئزا منا .
باهي شن تبي المطلوب شنو
هيثم: بحت في ساره بتمعن . وزين وقعد ساكت ويبحت فيها
ساره: ربكنها نظرات هيثم لها. وباعدت عيونها. وزمطت ريقها . وبارتباك في صوتها . ك ككنك
هيثم: يبحت في ساره ومابش ينزل عيونا من عليها
وقدم شورها
ساره: وخرت وخافت ان هيثم يقرب منها . شن تبي كنك
هيثم: قعد يقدم ع ساره عند خلاها تخبط في طرف الباب
ساره: خبطت في طرف الباب. وجا هيثم مقابلها . وقعد قلبها يدق وخايفا
هيثم: رفع يدا اليسار وماسك فيها موبايل . وفاتح ع رساله الي دزتها له ساره ، وحطا قدام وجه ساره
ساره: تبحت في موبايل وفي هيثم . شن هذا عليش توري فيها ليا
هيثم: شير بصبعا السبابه اليمين . ع موبايل. اقريه المسج
ساره: بحتت في هيثم . عارفتا كنا
هيثم: شن اتحقي فيا قدامك
ساره: زمطت ريقها. كيف يعني مافهمتش
هيثم: اتحقي فيا فرخ ولا مش راجل بيش نرجا منك اتبرري موقفي ولاشنو
ساره: انا ماقصدتش هكي
هيثم: وهو يضغط بسنونا ع كلام . وانا ماطلبتش منك اتبرريني لحد ولا طلبت منك معروف
ساره: نزلت عيونها في الارض. وقعدت تبحت وهي ساكتا وسارحا
هيثم: نحكي معاك تسمعي فيا
ساره: وهي تبحت لوطا. نسمع فيك
هيثم: عليش درتي هكي
ساره: هذا المفروض الي كان انديرا من زمان
هيثم: يبحت في ساره وهي مطبسا راسها. وحط موبايلا في جيبا . وربع ايديه
انتي كنتي عند اخر لحظه قاعده وع اساس بتقعدي ليش توا غيرتي رايك انك تطلعي من الحوش
وبذات بعد قرب العرس
ساره: لان مافيش داعي لقعدتي
هيثم: كنتي تقوليلي قرارك مش تصدميني . وتبيني قدام هلي ان في شي وتخلي موقفي هكي مش عارف شي
ساره: لان كنت مانشوفش فيك . وماحصلتش فرصه نقولك . بعدين الشي هذا يرجعلي انا . وبحتت في هيثم
هيثم: انتي توا ع ذمتي اي شي تفكري فيه مفروض تبلغيني بيه قبل ماتعلنيه حضرتك
ساره: برفعت حاجب. وبعصبيه. باهي ومطلوب مني توا شنو يا استاذ
هيثم: بحت في ساره . اتردي للحوش
ساره: ابتسمت بهزوا. معش ينفع
هيثم: بعصبيه. ساره حتردي معايا هي كلمه وحده ساره: رفعت يدها يسار . وهي تهدد بصبعها السبابه
اسمع انا مش لعبه تقعد اتشيل واتجيب فيا وقت ماتبي و وقت ماتحب . انت توا عندك حياه اخره
وانا من حقي نعيش حياه ثانيه
ومش لازم نمثلو ان متزوجين خلاص كل شي قعد مكشوف للعايله كلها
وانا مش ردا معاك اخر كلام عندي هذا
هيثم: فات الكلام الي قلتا ساره كلا . وكان مركز ع يدها
ساره: هدت وبحتت في هيثم الي ماردش عليها بكلمه واستغربت ردة فعلا الهاديه
هيثم: ساكت ويبحت في ساره
ساره:بارتباك. كنك اتبحت فيا هكي
هيثم: حاولتي الدبله
ساره: عقدت حواجبها. وشن دخل الدبله في موضوعنا توا
هيثم: هز براسا . تمام ياساره تمام
ساره: مستغربه ومش فاهما هيثم شن يقصد وليش دار هكي
هيثم: طلع من مربوعا ومابش يحكي اي شي
وطلع برا الحوش وركب السياره وعدا شور الاستراحه
