تأخرت من تغطية النت تريح وتضعف ،، الله غالب 😁
رواية #جميلة_في_عالم_الذئاب_5 للكاتبه الهميل الشارد هميلو
الحلقه /5 ,,, قراءة ممتعه ،،،،،
وصلنا لعند انصدمت خوله وبناتها من جية روعة عندهم ،، وسلامهن كان بارد وروعة لا حظت مجانلتهن لها بس بينت روحها عاديه وقعدت مقمعزة عالصالون في الصالة ،،
وفراس مقمعز في المربوعه ومعاه خالظ ولد عمه حسين وفراس يرن علي عمه ويلقا فيه مشغول مشغول لعند فات وقت الغدا وخش خالد القي روعه بـروحها في الصاله والعبرة خانقتها ،
خالد : نورتينا ي بنت عمي ،
روعه بصوت يا دوووب طلع : بنورك ،، شكرا ،
خالد : وين البنات ؟ في المطبخ زعما ؟
روعه هزت اكتوفها وقالت : مش عارفه !!
خالد خش للمطبخ القي امه وخواته كلهن مهيبه عالكرسي ومعاها رتاج ،، وخوله تشرب في مية وانتصار تاكل في طرف بطاطا ،
خالد : وين الغدا ؟ كنكن طولتن ؟
خوله بغل : نرجو في باتك ،،
خالد : باتي عقبولا عادي ،، نا معايا الراجل مسكته للغدا،
خوله : راجل ؟ تي من ؟
خالد : فراس ولد عمي اسماعيل ،،
وعمتكن انتصار جت مصبيه قبل وصلت للسقف وقالت بفرحه : فراس هنااا ؟
خالد : تي من بدري ونا نرجا في القهوة ،
انتصار : ليش ماقلت من بدري ؟
خالد : مصح وجوكن ماهو اللي جاب روعه هنا ،،
خوله : كيييف ؟ وشن خلطهم علي بعضهم ؟
خالد : توا مش وقت دوة جهزن الغدا بسرررعه ووحدة منكن تمشي تقمعز مع روعه عيب مخلياتها بروحها ،
مهيبه : اوكي باهي امشي قمعز مع الراجل ونحن نجهزو الغدا عيب مخلي الراجل بروحه ،
خالد طلع وخش لفراس القيه يتصل بالفون وشكله متوتر،
خالد : كنك ياراجل شكلك متضايق ؟
فراس : باتك مايردش ياخالد ،، شكله مازال ما لقا مرت عمك هيثم ،
خالظ بصدمه : قصدك ام روعه ؟ كنهااا ؟
فراس غمتله من خالد كيف نطق اسم روعه ،، وقال : ماهو عليش جبت بنتها هنا الوليه لتوا ماجتش لبنتها خذتها كيف العاده ،،
خالد: ان شاءالله خير ،، اكيد صايرلها ظرف جبرها كان هضا راهي جت ،
وقعدو يمولجو وروعه تبكي بصوت واطي تفكر في امها وين لتوا ماجتها وليش تأخرت عليها ،
وجت رتاج قمعزت مقابلتها وتشوف لروعه بنظرات قويه روعه توترت منها ،،
رتاج : عليش جيتي هنا ؟ في سبب ؟
