نزلتها بنت شفرة التغطيه رايحه من بدري
رواية #جميلة_في_عالم_الذئاب للكاتبه الهميل الشارد
الحلقه / الثالثه ،،
وصلنا لعند روعه تراجعي في امها قدام المدرسه في المرواح وطبعا فراس كان يقرا للشهاده حتقولن كيف اكبر منها ومازال اعدادي ،
وسعن بالكن وحتعرفن كل شي ،
المهم
هي واقفه وكانت لابسه الزي المدرسي وحجابها الابيض وكانت تشوف لساعة يدها بملل ،،
وفي اللحظه هذي قربو منها ثلاث شباب من جماعة التراكين والمعاكسات مايغباكم فيهم عاد جماعة بسبس ونجك ليا 😁
عاطهم رزيه ،،
المهم ،،
روعة رفعت راسها لقتهم قريب منها واول ماشافوها وخد منهم قال : اخخخخ طررررف نجك لي 😍
روعه تباعدت منه وقرنت حواجبها بغضب لكن زادو قربو منها وقال الشاب الثاني : سمحه وربي ،، ماتقوليش ليبيه بس ؟ 😍
روعه تأففت بطريقه واضحة من ضيقها وهم زادو يتبردو ،
والثالث وقف قدامها وقاللها :حتى وانتي معصبة تهبلي ، 😍
روعه بعصبيه : كذا حوول من قدامي انت وياه شنو قلت الادب هذي ؟
العيل الاول : وحي حي عالصوت ،، تهبلي ي بنت 😍
روعة غمتلها وطلعت من بيناتهم وخشت للمدرسه تقابلت مع فراس كان يهدرز مع بنتين بعد شاف روعه سيبهن ولحقها ،
فراس : رووعه ،، انتي ي فرخه ،نكلم فيك ،
روعه بعصبيه : احترم نفسك ومعش تقولي فرخه انت شنو ماتفهمش ؟
وجت بتمشي لكن فراس شدها من يدها وجبدها قدامه لعند جت قدامه وبتفنيصه همسلها : احكي كويس معايا راهو نقلبلك وجك .
روعة شدت يدها منه وقالت : معش تمسك يدي مية مرة نقول فيها لك ، وبعدين اسلوبي علي حسب اسلوبك معش تحكي معايا فاهم ؟
فراس جا بيتكلم سمعو صوت رقيه جاية ناحيتهم ،
رقيه : روعه حبيبتي هيا ماما نروحو ،
روعه شافت لامها ومشت معاها بدون ماتحكي كلمة ورقيه شافت لفراس وقالتله : فراس ارجوك بللش تضايق روعه خليها في حالها ،بليز ،
ومشت وخلاته واقف يشوفلهن بعصبيه ،
نوصفلكن فراس بعد كبر العيل شكله سابق سنه جسمه حلو ورياضي البشرة برونزيه والعيون خرش لا تعرفنهن خضر ولا عسليات والشعر بني وناعم واللحيه والشناب طرف عاطه دعوة 😍 وطويل ووجه طويل شوي بس حلو حلو ، 😁
وهو عارف انه طرف ومطيح البنات علي وجوهن
يحب يعيش حياته بالطول والعرض ومشترك في جيم رياضي ،، وفاشل في قرايته ويحب ينابش روعه همي ليش هو نفسه مش عارف ويمتنى يحصل عليها ،، وهي رغم ضعفها اللي باينله كانت قويه الاراده وديما تهرب منه وماتمشيش لحد ديما في شقتها مع امها وتقرا وتتفوق قي قرايتها ،
