تفاعلن حناتي عشان خاطر عمكن هسين عالاقل 😁
رواية #جميلة_في_عالم_الذئاب للكاتبه الهميل الشارد هميلو
الحلقة /35
___________, قراءة زايطة ،____________
ومشو بالسرقة تقول موعد غراميات واول ماوصلت لممر الديار ينفتح باب دار عمتكن خيريه تبي التواليت ، وروعه يبست من الفجعه وفراس انطمر بين العارصة متاع باب الممر كان فهمتن عليا وروعه ناقدرت تتحرك ،
خيريه تعمش في اعيونها وتثاوب واتفادع تبي تمشي شافت روعن انفجعت قبل انجلطت ،
خيريه : بسم الله الكريم فيش اديري انت هنا ؟
روعه بلعت ريقها وبتوتر بدت تتلعثم،
روعه : اا اا انا .. ا انا ..
خيريه : انتي شنو ؟ كنك اتحسي في شي ؟
روعه تمالكت روحها في اخر لحظة وقالت : لاا ك كنت في المطبخ خذيت حاجة بناكلها ،
وخيريه شافت ليد روعه لقت شكارة كبيرة معبية شكاير وكواغط وقالت : هضا كله بتاكليه بروحك !؟
روعه بتوتر : هاه !! اه قصدي لا شوية حاجات بنتسلى بيهن ، تبي نعطيك ؟
خيريه وهي تلف بتمشي للتواليت : لا صحيتي نا السكر مش باهي ناكل منه زيك ، وانتي خففي منه راهو يضرك ،
روعه وهي اتشوفلها : حاضر ،
وخشت عمتكن خيريه للتواليت وعمكن فراس متحنط عالساس وروعه شافتله بصدمة
وقالت : انت لازم تروح قبل مايشوفك حد ،
فراس مسك يدها وقال بهمس : نروح شنو بس ونا ماصدقت شفتك ،، تعالي وريني دارك ،
روعه شيرت بيدها علي باب دارها جنب دار الجده وخشو فيها وقفل فراس الباب بالمفتاح ،
روعه بخوف : انتوشن ادير ؟ لازم تروح قبى مايشوفك حد افرض عمو طلع وشافك ؟؟ وااا والا ماما جابتلي واحد من خوتي ؟ وين بتطمر ؟
فراس قرب منها وكانت شخصيته طاااغية عليها : وعليش ننطمر ؟ انا جاي لمراتي مش صاحبتي ، وماحد له الحق يحاسبني ،
روعه : بس انا اليوم زايرة والمفروض تكون انت في الحوش غادي وتروح بيا بكره ،
فراس قرب اكثر لعند معش في شي فاصل بيناتهم وهمسلها في وذنها : وعادي نروح بيك توا لو تحبي ،
روعه تلبكت : م.مم. اا .فر. فراس ،
فراس بهيام : اعيونه ،
روعه : ل.. لازم تروح .
فراس خذا منها الشكاير وحطهن جنب السرير وشاف لدارها وقال : توقعتها هكي دارك ،
روعه وهي اتهف علي روحها حاسة بحرارة ركبت فيها : وشن عرفك ؟ وكنها داري ؟
