رواية #جميلة_في_عالم_الذئاب للكاتبه #الهميل_الشارد
الحلقة / 37 والأخيره ،،
___________💚قراءة ممتعه،💚__________
تركب فيه هزايب وهو يضحك عليها ، ويساير فيها ، لعند حددو عرس حنان وخالد وحسين قرر يطلع الفرح قبل مايسافر للعمرة لان اسمه واسم رقيه طلعو وخيريه لا ،،
لكن رقيه تنازلت بقرعتها لعمتها اللي ياما دعتلها وشكرتها وحمدت ربها عالكنه الغريبة اللي جابها لها خير حتى من بنيتها ، وكانت سفرتهم بعد اسبوع العرس بيوم ،
وقبل العرس باسبوع قررت رقيه تمشيلها هي ونجاة وحليمة صبيتها رغم قلت فضوتها ،،
وتحاول تتصالح مع ضرتها قبل عرس خالد لانها امنية خالد وحتى حسين اللي يقعد منشغل علي بناته في النهاية اعياله حتى هم ،
لانها حست ان خولة قطعت المشي للعيلة بعد هي تجوزت حسين ، وشالهم فراس ،،
واول ما انفتح الباب شافن مهيبة ،
نجاة : السلام عليكم ،
مهيبة شافت لرقيه لوت وجهها وقالت لنجاة : وعليكم السلام ، اهلا عمتي نجاة ،
نجاة :اهلا بيك ي بنتي ، امك قاعدة ؟
مهيبة : قاعدة ،
نجاة : ممكن نشوفوها والا ماتبينا نخشو ؟
مهيبة انحرجت وقالت : لا حشاك ي عمتي نجاة تفضلن ،
فراس لامه : انا حنرجاكن هنا ،
نجاة : تمام ،
وخشن فضلتهن مهيبة للمربوعه بحكم فاضية مافيها حد ومشت تكلم في امها ،، وطبعا طولت شوي ونجاة ورقيه مقمعزات ايشوفن لبعضهن اذا خولة بتجي تسلم وتستقبلهن والا لا !
وخشت خولة لابسة جلابيه حوش كحلية مخربشة ورابطة محرمتها لاورا وباقيه اتقول عزوز عمرها ستين سنة والا سبعين ،
بالرغم انها بينها وبين حسين ثلاث سنوات بس ،
لكن للاسف ديما هاملة روحها ومنكدة علي روحها وعلي راجلها واعيالها ،
سلمت علي نجاة باليد والخد لكن سلمت علي رقيه باليد وسلام مرخي ،
وواضح انها مش متقبلة رقيه بكككل ، طبعا عارفات ان رقيه جميلة جمال غربي تي روسيه ،، لكن مع جمالها كانت مهتمة بنفسها وصحتها وبعد تجوزت حسين بدت تهتم اكثر بيه وبنفسها واتدلع فيه وهالشي خلا حسين يتمسك برقيه اكثر واكثر لانه فاقد الاهتمام من خولة ،
المهم
الحوش فيه جارات خولة شوية مش واجد وعيت خوها الكبير مراته وبناته وكناينه ،،
خولة : خير ان شاءالله .
رقيه شافت لنجاة ونجاة التفتت لخولة ،
وقالت : الحق ي خولة اللي اصرت اتجي هي رقيه مش نا وتبي تحكي معاك وياريت تعطيها فرصة لانها والله من زمان تبي اتجيك ،
خولة بنظرات غل : ونا كنت رافضة ، شن تبي مني مش خذت راجلي وباعداته عليا ؟ شن تبي مني اخرا ؟ مش فاضيه راه ،
