اسفة عالتأخير التغطية درهت كبدي ،،
رواية #جميلة_في_عالم_الذئاب للكاتبه #الهميل_الشارد
الحلقة / ،36 ,
_____________،،قراءة ممتعه ،،_______________
وقلنا العيلة جوهم كويس وملتمين بعد روحو فراس وروعه من السفر وهدرزة وجو حلو لعند روح كل حد لحوشه ورقيه اصرت علي حسين يروح بخولة وبناتها ويبات معاهن وهي حيروح بيها خالد ومعاعا خيريه وفعلا استجابلها ومشا بخولة اللي تحسابها هي الدوة ،
وروعه ساعدت حماتها وعمتها شوي بعدها ركبت لشقتها واول ماخشت سمعت صوت التلفون يرن رفعت السماعة ،
روعه : السلام عليكم ،
.......: وعليكم السلام باهي اللي رديتي ياروعه ليا زمان نتصل وكل مرة يرد حد ثاني ،
روعه توترت وبلعت ريقها وشافت لباب الشقة وقالت : نعم ي عمتي شن تبي مني ؟
ام عبدو : عبدو طلع من المستشفى الحمدالله لكن مأنبه ضميره ياروعه لا ياكل ولة يشرب ويطلب مني نتصل بيك بيش يسمع منك انك مسامحته ،
روعه بخوف : قوليله مسامحته خلاص ، مافيش داعي تتصلو بيا ،
ام عبدو : باهي قوليها له بس خليه يسمعك تقوليها لان والله تغير ومغير يبكي وخلاص ،
روعه وجعها وقالت : اوكي وين هو ؟
وشوية وسمعت صوت رجولي : الو .
روعه بخوف وحست بحرارة ركبت فيها وبلعت ريقها ،
عبدو : الوو روعه !!
روعه : اا ايوا ،
عبدو : سامحيني بالله اتسامحيني ، انا .. انا اسف وربي نادم ،
روعه بحزن وحست من صوته انه فعلا حزين وقريب يبكي
وقالت : الله يسامحك ، خلاص انسى ،
عبدو : بالله تسامحيني ،، اسف ،اسف ،نبي نسمعها منك انك سامحتيني ،
روعه : مسامحتك والله ،، اذا ربي يسامح فانا من مانسامح ؟! الله يسامحك ويسعدك مع مراتك وولدك ،
عبدو تنهد وقال : شكرا ليكي ويسعدك ويحفظك فراس راجل راه وشاب مافي منه ربي يسعدكم ،
روعه : شكرا ، انا مظطرة نقفل توا ، ياريت معش تتصلو بيا ،
عبدو : شكرا ليكي ، وانا اسف بس حبيت نسمعها منك بيش نصدق انك سامحتيني ،، مع السلامة ،
وقفلت روعه وهي مرتبكه وترررعش ،،
وفي المربوعه كان فراس موصل سماعه تلفون ارضي في فيشة خط ارضي ويتصنت عالمكالمة لان بعد ركبت روعه لحقها ولما سمع التلفون وروعه تحكي سمع بداية الكلام خش للمربوعه وطلع السماعه ووصلها بحيث قدر يسمع مكالمة روعه مع عبدو وامه ،، وفك السماعه وتنهد ومسح علي وجه وهو يخمم ودس السماعه في مكانها وطلع من المربوعه وخش للشقة القيها هاديه وخش لدار النوم القي روعه مبدلة دبشها ولابسة بيجاما سكريه حلوة وطالقة شعرها ، واول ماشافت فراس ابتسمت ،
