رواية #جميلة_في_عالم_الذئاب
للكاتبه الهميل الشارد هميلو
الحلقة / التاسعه ،،
قراءة ممتعه ،،،،،
ومر وقت وركبو طيارتهم بعد سريب المطار والختم ،
واول ماقمعزت روعه جنب عمها فراس انقهر وجت تقمعيزته بروحه و طول الرحلة وروعه مش معبرة فراس ولا تحكي معاه رغم خوفها من ركوب الطيارة ،،
واسماعيل كملها نوم يادوب اينوض ياكل الوجبة وياخذ دوا الضغط ويعاود يرقد ،
وفراس حاول يلفت نظرها او ينرفزها بس روعه طول الرحلة قرت قرآن وبعدها غفت وتنوض تاكل الوجبة ومتجاهلة فراس رسمي ،
الشي اللي خلاه يزيد يحط روعه في راسه ومر الوقت ووصت طيارتهم لموسكو ومانحكيلكن عالجو ينعلاااي ي بنات البرووودة والثلج اللي مغطي بلادهم حاجة خياااال 😍
ياريتتي غادي 😭 ماعليكن مني نا كائن شتوي نا ،
نكملو ،،
وصلو وطبعا روعه جايبة كبوطها لبساته وحتى عمها وفراس واول مانزلو فراس قرب من روعه خلطها بكتفه ونزل قبلها ،
روعه بصوت واطي : بارد ،
فراس سمعها بس فاتها واول ماوصلو لصالة انتظار الركاب شافو خال روعه يرجا فيهم ،،
وسلمو عليه وطبعا روعه احضان ودمووع ومانحكيلكن ، وطلعو ركبو في سيارة خال روعه ومشا بيهم لحوشه طبعا ماخلاهمش يمشو لفندق ، وروعه في كل لحظة قريب تنهار خلاص ابي تشوف امها وصلو لسكن خالها ( جينسن) وطبعا متجوز وعنده ولد وبنت البنت طفلة في ال ١٠ سنين والولد في الثانوي ومانحكيلكم عالروس عاد خبر لا تعرفنه جمال والا جاذبية والا كياته ينعلي الولد ملامحه عالاشقر والعيون زرق زي بوه وعمته والشعر اللي سابل وامهم شقرا والبات اشقر والبنوته حاجة كده ملااااك وشعر ناااعم ولركبيها
العيلة يقربلو لعيت البقلاوة شكلهم 😍😂
المهم اسماعيل وفراس ضيفهم جينسن في جناح للضيوف فيه مطبخ بار وتواليت وغرفتين نوم وصالة صغيرة عاد هالخبر كان عندنا يقولك الولد جوزني ونسكن فيه 😂 وهم دايرينه للضيوف ،
خلني ساكته خير ، 🤭
المهم
روعه سلمت علي عيلة خالها بحكم عندها صور ليهم مع امها اما فراس كان رغم اعجابه بالبلاد والعيلة بس كان بعيونه ايدور علي روعه ،
اسماعيل لولده : كنك مصبي تريح قمعز ،
فراس : هاه .. لا متريح ،
بعدها سلح جابوتي متاعه وقمعز عالكنبة وقال : هوااا هوا روعه بتبات غادي معاهم ؟
اسماعيل : اكيد . خالها مجهزلها غرفة خاصة بيها ،
فراس : المفروض تبات في وحده من الديار هذين وانا وياك في دار ماتنساش في شاب غادي ،
اسماعيل : الولد صغير ،
