ثواب 💜 ( روايات ليبية ) مكتملة

الحلقة 1 💜

رواية ثواب ح 1 ❤
.
.
قبل البدأ في سرد قصتي اعرفكم بنفسي اولا : انا ثواب عمري 19 سنة نقرأ قانون أنا البنت الوحيده بين 4 اولاد وانا آخر العنقود مفروض انكون مدلعة بس هه العكس لان عيلتي متشددة و عندهم ان البنت مكانها المطبخ و الحوش بس و لو تعلمت و تكلمت بصوت عالي و كأنها ارتكبت جريمة ، اكيد حتقولوا كيف و انتي تقري قانون ! حنردوا سنة للوراء عشان تعرفوا كيف عانيت  💔
.
قبل عام 🌸
.
.
كنت مقعمزة جنب ماما في العشية و نشربوا في قهوتنا .
ثواب : معش طلعت النتيجة كل يوم نقول اهو بلكي ينقدوا على وجوهم و ينزلوها لكن شيء
امها : ليش تراجي فيها وانتي مصيرك الحوش احمدي ربك خلوك تقري الثانوية
ثواب حطت فنجان القهوة بهدوء و ضحكت ضحكة استهزاء وقالت : نحمد ربي عشان خلوني نكمل الثانوي هه كيف موافقوا على الثانوي حيوافقوا على الكلية و الماستر و الدكتوراة ليش انتي ديما مقللة من شأنك و شأني ليش راضية حتى ولد بطنك يتطاول عليك عشان هو ذكر و انتي انثى !!!! تي خليتيهم ينسوا حتى انك امهم و تحت كرعيك الجنة
امها : خلاص اسكتي خوك جاء
ثواب : و يجي انا منيش خايفة من حد خلاص فددتوني في عيشتي و الكلية حنقراها ( و خشت لدارها و قعمزت تاخد في شهيق و زفير و متبيش تبكي زي كل مرة .. نردوا لأمها و خوها يلي كيف جاء)
مازن ( خوها الثاني ميحبش القراية و فاشل فيها قرأ لعند 2 كلية و بطل و فتح محل مواد غذائية ): كنها الجالطة بنتك صوتها العالي كم مرة نبهتها عليه اااه
امها: شيء خليها انت كنك جاي توا
مازن : بناخد فلوس بنمشي انجيب بضاعة للمحل
امها : ربي يفتحها عليك و يزيدك
مازن : ان شاء الله
.
.
ثواب : اصبروا خلي نعطيكم معلومة عن خوتي هما فاشلين و ميحبوش القراية عكسي نهائيا خلي نعرفكم عليهم
1"محمد : شاري شهادة و يشتغل بيها في الضمان
2"مازن و عرفتكم بيه
3"مراد قاري معهد عالي حاسوب بس مخداش شهادتها لين روحه قريب طلعت يشتغل مع واحد في صالة ملابس
4"مجاب امبطل من صف 9 بس جارنا فتح ورشة تصليح السيارات و شغله معاه ( الله يربحه فكني من وجهه )
بوي : عصبي لدرجة و بخيل عنده القرش بحسابه
حتقولوا كيف بنت تكرهه خوتها !!
اول شيء جاهلين ميحبوش العلم ثاني شي حارميني من كل شيء حتى التلفزيون مفيش في الحوش تخايلوا و بوي مطاوعهم و الطلوع من الحوش للمدرسة و من المدرسة للحوش و هك حياتي مملة .
.
.
نردوا لقصتنا  ....
فالليل كل واحد روح من شغله و قعمزوا في الصالة و معاهم امهم و بوهم
محمد : ثواااااب
( كيف غفيت نسمع في حد عيطتلي نطيت و جيت بنفتح الباب بس وخرت و رديت تغطيت و قلت )
ثواب : يملح اكيد يبي يتسمسم
.
محمد : وينها بنتك الهم هذي
امها: خليها قول شن تبي
محمد : تو اتشوف تستكرد الفرخة كبر رأسها خلاص ( وناض متجه لدارها و امه وراه تتجده فيه ميضربهاش زي كل مرة ادير حاجة و متعجباش بس هه ولا عدل خش كرها من مرفقها جت مصبية و عطاها كف لين عيطت و طاحت من جديد)
محمد : نوضي توا ديريلي حاجة ناكلها ( وطلع و هي تشوف لأمها يلي واقفة اتشوفلها و مش قادرة ادير شيء ولا بوها يلي مقعمز في الصالة ولا هزتله شعره من صوت عيطتها و قالت :)
ثواب : دينه كل يوم يزيد و حنردله كل كف عطاه ليا بس مش باليد هههه ( و طلعت دارتله عشاه و هي ساكتة حطت قدامه الصفرة و كمل الدخان و بدأ ياكل و هي اتشوف ل بوها مقعمز بين مازن و مجاب و يهدرزوا على الشغل و تجرأت و قالت )
ثواب : بابا ممكن بكرا تمشي للمدرسة تسألهم على النتيجة
مجاب: احمد صاحبي قال طلعت يمكن قبل اسبوع و هكي و انتي ليش تسألي شن بتفرق يعني
ثواب : اسبوععع طالعة و انا منندريش و..(قبل لاتتكمل قاطعها بوها)
بوها : تو نمشي بكرا انشوفها غير اسكتي رأسي مصدع
ثواب : تماااام تماااام ( و خشت للدار و قعدت تبكي على حالها و كيف يعاملوا فيها و كيف حتقنعهم انها تقرأ كلية و مليون حاجة في رأسها بعدين مسحت دموعها و وكلت امرها ل ربي و خدت الكتاب يلي يحكي عن القانون و عن المحاماة يلي قربت انها تكمل قرايته ( من ايام المدرسة كانت في ابلة كبيرة في العمر اسمها "نعيمه "تحب ثواب واجد لانها جريئة و قوية وهي حببتها في القانون فجابتلها الكتاب عشان تزيد تشجعها لدراسته  )

رقدت ثواب و هي تحلم انها حتكون يوم من الايام محامية .
.
.
ثاني يوم ناضوا الكل و اولهم ثواب فهي قررت الهدنة مع خوتها لين توصل يلي تبيه
مازن : وين القهوة
ثواب : تفضل
مجاب: الشاهي و الكعك وين !!!
ثواب : تفضل
محمد : سوريتي حددتيها ؟؟
ثواب : حددتها
مراد : ضميلي داري كويس
ثواب : حاضر
و طلعوا خوتها و بدت في تنظيف المطبخ خش بوها
ثواب سلمت على رأسه و قالت : صباح الخير
بوها : صباح النور خوتك طلعوا ؟
ثواب : طلعوا ، بابا راك تنسى المدرسة
بوها و هو يفطر : ماشي توا
ثواب : اهااا

( وتدعي انها تكون ناجحة ، طلع بوها و  كملت هي و امها حملة التنظيف بعدها خشت لدارها و غيرت فيها كم حاجة عشان تتغير نفسيتها)

ملاحظة : انا مجربتها لازم بداية القراية نغير شيء في داري عشان تتغير نفسيتي و نبدأ عام دراسي بنفسية كويسة و حتى بعد يكمل العام نغير فيها شيء و هكذا ..
.
في المدرسة  :
.
المدير : انت اب ثواب
بوها : اها بوها
المدير : و الله تسلم ربايتك في بنتك أدب و علم
بوها : تسلم تسلم جاي نبي نسحب ملفها و ناخد نتيجتها
المدير : بنتك مشاءالله  جابت اعلى نسبة بين الطلبة %98.9
بوها : كويس
المدير استغرب من ردة فعل بوها و قال : بنتك المفروض تخششها لاحسن الكليات
بوها : معندناش بنات يقرن كلية
المدير : حرام تظلم بنتك
بوها : قلت بلسانك بنتي و توا لو سمحت نبي ملفها
المدير : تفضل ( خدا بوها الملف و اتجه للحوش)
.
كانت ثواب قريب تموت من الخوف وانها جابت نسبة ضعيفة او ساقطة شوية وخش بوها
ثواب : شنن صار
بوها : هاك ( مدلها الملف و ورقة النتيجة و شافت النسبة فرحت و قعدت تنقز و امها باركتلها و شافت ل بوها و انصدمت من ردت فعله قعمزت على ركابها يالاه و قالت )
ثواب .......
بوها : 😦😦😦😦
امها : 😭😭😭😭
.
تتوقعوا شن يلي قالاته ثواب وهل حيغير رأي بوها توا ؟؟؟
.
رواية تلتمس الواقع ، و انا شخصيا نعرف بنات هك يعاملوا فيهن خوتهن في الوقت هضا فحبيت نكتب الرواية هذي عشان نوصللكم رسالة و حتعرفوا كل بعد حلقة رسالة ❤
رأيكم في البداية 😊
#ثواب
#rwayat_br0o