ثواب 💜 ( روايات ليبية ) مكتملة

الحلقة 24 و الأخيرة جزء 2 💜

رواية ثواب ح 24 و الأخيرة جزء 2 💜
.
العملية هي :
اقتحام بيوت السحارات و حظ رنا جاء بيت السحارة يلي ادير عندها سوزان ( خشت رنا و معاها صبايا من الشرطة للحوش شدوا السحارة و لقت سوزان )
رنا : هيي انتي !!! توقعت و الله
سوزان تبكي : ساعديني و النبي ساعديني
رنا : هه تعالي ياشرطية شدي هذي و احرسي كويس عليها ( و خدت فون سوزان منها و مشت سوزان و هي تبكي و تتندم ) اصصصبري ( تلفتن الشرطية و سوزان ) الباس ياسمحة افتحيه ( فتحاته زي البنت الطيبة و شالتها الشرطية و رنا حطت على رقم نعيمة لقاته مسجل ( اللفعة أمه 😂))
رنا : الو
نعيمة : الو سوزان !
رنا : يا عمتي انا صاحبتها " حشاني نصاحب زيها 😑" نبي عنوان حوشكم
نعيمة : شن في !
رنا : ياعمتي نوصل و نوضحلك
نعيمة : نسكنوا ...( وصفتلها الحوش و رنا بمأن حتى هي تسوق مشت بسيارتها لحوش هل محمد فتحلها محمد
محمد ناسي شكلها طبس رأسه و قاللها تفضلي وخشت لقت منتهى و منار و نعيمة و بوهم )
رنا : السلام عليكم ( بوهم جاي بينوض ) ياعمي خليك و لو تنادوا محمد
منار " شايفتها و الله "
بوهم : محمد يا محمد
محمد : نعم
بوهم : قعمز البنت تبينا ( كلهم مقعمزين و مش عارفين شيء )
رنا : طبعا انا رنا ... قانون جنائي و اليوم اقتحمنا بيوت السحارات يلي خربن حواشين ناس واجد و مع الأسف ان انقوللكم سوزان ... كانت ضمن من يتعامل مع هذين السحارات و حاليا قاعدة في مركز الشرطة ( كلهم مصدومين و يشوفوا لمحمد ) متخافوش نحن مجهزين كم شيخ حيفكوا سحر لكل شخص مديورله عند السحارات يلي قدرنا نعرفوا مكانهم ، و انا صاحبت ثواب با منار اذكرتينا !
منار : اذكرررتكك و الله تلاقينا في الكلية
رنا : اها ، لهذا تقدروا تخبروا هل سوزان على يلي صار و هضا فونها
نعيمة تبكي : حسبييبي الله و نعم الوكييل فيها السحارة الله لاتربحها لادنيا ولا آخرة
محمد : يعني الكوابيس و الضيقة يلي كانت فيا منها ! من سحرها !!!!
رنا : انا نستأذن
نعيمة : بارك الله فيك يا بنتي الله يساعدك و يقويك
رنا ابتسمت : ولو يا عمتي هضا واجبي 💜 ( وطلعت و تنفست براحة ) "حتضحكلك الحياة و اخيرا يا ثوابي 💜"
.
محمد في الفون: ايوا خالد
خالد : اهلا بونسيب
محمد : خليتوا فيها بونسيب انتم امشوا لأختكم السحارة في مركز الشرطة و انسوا انكم عندكم عت عم ( وسكر )
.
في حوش اهل سوزان :
بوها : كنه محمد !!
خالد : قالي ... ( وحكاله )
امها: لالا بنتي مستحيل اديرها
اختها بعياط : دارتها و يا ما حذرتهها و قلتلها فككك بس بنتك مشت لطريق الحرام و خدت محمد بالسحر
بوها : و الله العظيم من اليوم معش عندي بنت اسمها سوزان ( و تبروا منها و مفيش حد مشالها لمركز الشرطة و رنا مشت لحوش اهل ثواب ) .
رنا تجري : ثوااااب ثواب طالعة من المطبخ : كنكك بسم الله
رنا : قنننبلة
ثواب : احكككي
رنا : ....( وحكتلها ، و ثواب من الصدمة قعمزت على الكرسي )
ثواب : يعني محمد خداها بسبب مفعول السحر !!!
رنا : اهاااا و اخيييرا
ثواب : اخيرا لشن !!
رنا : شيء شيء ( هي انا بنروح )
محمد خش : مغرب توا باتي
رنا انفجعت : امتى تبطل هالحركة ؟!
محمد : انتي مفجوعة شن انديرلك هههههه
ثواب : صح باتي و بكرا الصبح امشي للمهمتك
محمد : شن صار في العملية الكبيرة ؟
رنا : نجحتت الحمد الله
محمد : سلم مراتي الشاطرة
ثواب : هههههه لسانها اختفى ، خلاص خليها
محمد : هههه بنطلع انا بنكمل المشروع عشان يحددولي يوم اناقش فيه
ثواب : موفق ان شاء الله
محمد : ان شاء الله ( و طلع و قعدن رنا و ثواب )
رنا : امتى بتروح خالتي !؟
ثواب : بعد بكرا ان شاء الله
رنا : باهي على خير ان شاء الله
.
.
عند منذر :
قاعد يلم في حجاته من على المكتب و بيطلع بيروح بمنار من هلها خشت الممرضة
ممرضة : د.منذر في شخص برا اصر يبي يخش قال يبيك ضروري
منذر : بس انا انتهى دوامي
ممرضة : و الله قالي ضروري
منذر : تمام خليه يخش
ممرضة : تمام ( منذر رد لبس البالطو و قعمز )
يوسف : السلام عليكم
منذر بصدمة : ا ا انت !!! يوسف : سكرت عليا في الفون جيتك هنا مخليتليش خيار ثاني
منذر : خير شن تبي بعد 6 سنين !!
يوسف : تكلم كويس مع بوك
منذر : ههههههههههه من من ! بوي هههههه تي انا معنديش بو بوي يلي تبرا مني عشان صححت غلطي ،بس الحمد الله تجوزت و عندي بنت و حيجيني ولد و عايش يا استاذ !! بس انت شكله انقلبت عليك المدام ؟
يوسف : آسف يا ولدي الشيطان غرني و خالتك ( قبل مايكمل )
منذر بعياط : متقوووولش خالتك انا يلي يجرح الانسانة يلي ربتني نمحيه من قاموس حياتي
يوسف : غالية مريضة يا ولدي عندها السرطان منتشر في جسمها كله و هي تبي امك ضروري
منذر : و الله ثم و الله كان ماتبعد عنا انت و المقرفة مرتك نعرف شن اندير مش انت سافرت معاها و لا تندري عنا حيين ميتيين عندنا وين نقعدوا ؟ يوسف : خلاااص فهمت فهمت كل انسان بغلط ربي غفور رحيم
منذر : تواااا بعد سنين جاي اتقول هالكلام ؟؟ بعد شن ! بعد مادمرت امي ؟ و خديت اختها ؟؟ و لا بعد تبرأت مني ؟؟؟ خلاص و النبي امشي انسانا كيف ما نسيناك ( و خدا حاجاته من على الطاولة و طلع لسيارته و يجري رن على منار طلعتله و روحوا و ميبيش يقوللهم على بوه زي كل مرة ، اما يوسف طلع و هو تأكد انه حياته الحلوة يلي كان عايشها مع منذر و امه مستحيل ترد و ان غالية شوي و تموت كيف حيعيش ؟؟ فقرر يحجزله مكان في دار المسنين و يقعد فيها )
.
ثاني يوم في مكتب ثواب و هي غاطسة في الأوراق شافت خيال
محمد ن ؛ ثواب 💜
ثواب وقفت : م م محمد
محمد ن : متذكرتيني !
ثواب : احم تفضل استاذ محمد
محمد : ثواب و الله جاي توا و في بالي حاجة وحدة ،حنطلبك من بوك و نعيشوا حياتنا من حقنا نفرحوا خلاص سنين فاتن من عمرنا كل حد عايش في تركينة
ثواب تشجعت : تمام انا موافقة 💜
.
.
بعد اسبوع :
رنا : قصدك فاتحتي و فاتحتك في نفس اليوم 😂
ثواب : بعد شهر 😭
رنا : خودي راحة من المكتب عشان تبتتي
ثواب : و حتى انتي
رنا : خلاص من بكرا نبدوا
( محمد تخرج و دار بيان لرنا بعد مروحوا امه و بوه و محمد ن خطب ثواب ونعيمة فرحت بيها عشان عارفتها)
بعد شهر 🎉
ثواب خاشة ماسكة في بوها و خوتها الأربعة محاوطينها لين وصلت للكوشة و صوروا كم صورة بعدها حضنت بوها كويس و قعد يبكي لين بكى الناس ، و طلع اما خوتها حبوا يديرولها مفاجأة ، فجأة مدت امتاع دي جي الميكروفون لمحمد
محمد : اليوم فرحتي اثنين فرحتي بعرسي و فرحتي ب محاميتنا ثواب يلي تعذبت واججد بكل عشان تضحك زي هالضحكة
مراد : هههه كلنا كنا ضدك ثوابنا 💜 يا محاميتنا بس انتي حاربتينا كلنا و أثبتي ان البنت مش مكانها المطبخ و الحوش البنت مكانها في مجتمعها بشاهدتها
مازن : خيتنا الوحيدة يلي مكناش حاسيين وجودها ولا عمرنا تذكرناها بحاجة هي تذكر فينا في دعواتها و لما تشوف حدفينا مضايق تهون عليه
مجاب : ثواب لو في يوم اضايقتي منه حتى شوي تعالي نحن 5 حنسندوك و نكونوا معاك مش ضدك ، لو يوم اضايقتي حوش بوك مفتوحلك يا محاميتنا الحلوة 💜 ثوابنا ربي يفرحك و يكون محمد الراجل يلي حتكملي معاه باقي عمرك 💜( حط الميكروفون على الأرض و حضنوها هما الأربعة و امهم تبكي فرحانة بصغارها كيف قعدوا قلب واحد و ثواب تخرب مكياجها من الدموع و حتى خوتها بكوا و طلعوا )
بعد ساعة زفوا كل عروس لعريسها 💜
بعد مرور 3 سنوات
في حوش هل ثواب :
محمد : رناااا تعالي لولدك هبلنيييي
امها : حرام عليك المرا في المطبخ من الصبح مده لليا هنا
( خش مازن وفي يده باكوا و خش وراه مجاب شاد باكووات  )
مازن : كل عام و انتي بخير يا احسن ام
مجاب : هدايا الكون كلهن شوية فيك
رنا في يدها تورتة : ان شاء الله ربي يدومك لينا ولا يحرمنا منكك
مراد : وانا هديتي ليك حنجيبلك كنة
بوهم : وانا بوكم راه
امهم: شنو غرت يا حاج !
كلهم : ههههههههههه
.
في حوش هل محمد ن :
نعيمة : ثواب امشي لصغارك انتي و خلي تو نكمل عنك
ثواب : لالا عميمة تو لؤي قاعد يلاهم
نعيمة: و الله انشوف فيك كيف تعاملي فيه احسن من امه الله يربحك بنت اصول 💜
ثواب: هضا ولدي و زيه زي خوته الثانيين ( و خش محمد وجه ميتفسرش )
نعيمة : شن في !
محمد : احم عمي كلم بوي قاله كلموه مركز الشرطة عشان يستلم جثة سوزان اليوم طلقوا سراحها و هي طالعة ضربتها سيارة و عطاتك عمرها
ثواب : الله يرحمها 
نعيمة : الميت ما تجوز عليه الا الرحمة و بوك مشى معاه ؟
محمد : ايه ، كلمني منذر قبل يبينا نطلعوا بكرا كلنا للبحر حتى هل ثواب و كلم خوتك
نعيمة : ايه ليش لا هذك مش هلها تبروا منها خلاص مالا مفيش عزاء بكرا نمشوا
.
ثاني يوم :
ثواب : حمادي انت شيل الصغار و عمتي و عمي  انا في اوراق ضروري نشيلهن للمكتب تو نلحقكم
محمد : تمام ردي بالك على روحك ثوابي 💜
ثواب : حتى انت 💜 ( طلع محمد بالصغار للشاليه  و لقاهم كلهم غادي و ثواب مشت لمكتبها جابت الأوراق و مشت للشاليه لقتهم امدايريلها مفاجأة )
ثواب الصغيرة تكر في امها  : ماما ماما في تيتة تبيرة هنا
ثواب بصدمة : شن دايرين انتم !
محمد ن : هضا اقل شيء يمكن انديره في حق الإنسانة يلي استوطنت قلبي و جابتلي ثواب الصغيرة و رواد الانسانة يلي من لما خشت حياتي عبتها امان و ضحكة و فرحة الانسانة يلي كافحت و تعبت و حققت حلمها 💜 كل عام و انتي بخير يا غالية 💜
لؤي : عرفت ان الأم مش يلي تجيب لا الأم هي يلي تربي و تحافظ و تهتم بصاغرها ماما كل عام و انتي بخير يا اجمل أم 💜
رنا : توأمي المحامية الطموحة الشجاعة ثواب كل عام ان شاء الله أحسن من عام 💜💜
بوها : بنتي يا احسن محامية أثبتيلي فعلا ان الجاهل هو يلي ضد العلم و التعلم ربي يحميك 💜
امها : ثواب حبيبتي بنتي و صديقتي و اختي
علمتيني ان الضعف عمره ما كان للمرأة 💜 كل عام و انتي بخير يا روح امك 💜
منذر : بنت عمي يلي كان ليها فضل كبير ان نتغير و نتلاقى مع الإنسانة يلي حبها قلبي 💜 كل عام و انتي بخير 💜
محمد ، مراد ، مجاب، مازن ( طربقوا الزينة ): كل عام و انتي بألف خير يا احسن اخت 💜💜💜
ثواب تبكي : و الله مش عارفة ك ك كيف نشكركم بجد ربي يحبني ان انا نعرفكم
منار : هي كنتنا الحلوة قصي الكيك 😂
( جت ثواب بتقص الكيكة لقت كتاب يالا التورتة مكتوب عليه ثواب شافتلهم بمعنى شن ؟! )
محمد خوها : أنا كتبت قصتك كرواية لكن النهاية خليتلك صفحة بيضة اكتبيها انتي 💜 ( فرحت ثواب بيها و قصت الكيك و تمنت ربي يدوم الفرحة و كلوا و فرحوا و كل واحد مشى لمكان و ثواب شادة كتاب يلي فيه قصة حياتها بين يدها 💜)
محمد ن : شن حديري النهاية
لؤي : ماما اكتبي لؤي قعد دكتور 😌
ثواب الصغيرة : اتتبي ثواب دعدت  زي مامتها ( اكتبي ثواب قعدت زي مامتها )
رواد : لالا ماما اتتبي ان رواد قعد زي بوه
محمد ، ثواب : هههههه
ثواب : ان شاء الله يا حبايب ماما تقعدوا يلي تحبوه بس حنكتب جملة وحدة و شافت لمحمد 💜 ( ولأني محامية قررت ان يكون الدفاع عن حقي بك هو قضيتي الاولى و الاخيرة )
ثواب الصغيرة ، رواد ، لؤي ، صفقوا : هييييييي النهاييية 💜💜💜
.
ثواب البنت يلي تعبت واجد من خوتها و بوها و تعذبت عشان تحقق حلمها و تجوزت إنسان بسبب طمع و اطلقت و هي صغيرة بس كانت صبورة تحملت لين ربي استجاب دعائها و تغيرت حياتها للأحسن حققت حلمها و تزوجت بالإنسان يلي تحبه و ختمت بتوأم ثواب الصغيرة و رواد 💜💜
رنا كانت اخت لثواب ، بدت قصتها بلعبة عشان تنتقم لأختها بس حبت هالشخص بجبروته بكل بس دفنت المشاعر لين هو اعترفلها كانت مركز تغير محمد يلي توجت مشاعرها بولدين 💜💜
محمد اخ ثواب  اكثر شخص عذب اخته بدون رحمة بين يوم و ليلة خشت حياته بنت قلبت موازينها و غيراته. كافح عشانها و قرر يقرأ من جديد و تخرج و قعد باش مهندس محمد 💜 و تجوزها و قعد عنده ولدين 💜
سوزان الانسانة يلي اختارت طريق الحرام عاشت فترة فرحانة بس ربي يمهل ولا يهمل كشفها على حقيقتها و خسرت ولدها و راجلها و هلها و يوم بتطلع من الحبس خسرت حياتها
خالد خوها خش في طريق الممنوعات و خالط شلة مش تمام بس ربي هداه و تاب و رد يقرأ
محمد ن الشخص يلي كان ميآمنش بالحب ، فجأة خشت حياته بنت غيرت تفكيره كله بنت عرفها غير عن البنات ضاعت منه فترة و فقد الآمل خطب و تجوز و جاه ولد بس عرف انه كان تحت تأثير السحر  لكن  كل حد و نصيبه و ربي جمعه بيها و جابتله احلى توأم ثواب الصغيرة و رواد 💜
يوسف خش لدار االمسنين و غالية ماتت  و لطيفة فرحانة تربي في احفادها و نست يوسف و أيامه و نعيمة تحمد في ربي كل يوم ان ثواب كنتها 💜💜
#النهاية
.
و هكي انتهت رواية ثواب يلي كانت من الخيال الواقعي 💜 نتمنى كانت النهاية نالت على اعجابكم 💜 و شكرا لكل شخص دعمني لتستمر هذه الرواية 💜 الى اللقاء في رواية اخرى 💜
#الكاتبة_أبرار
#رواية_ثواب
#rwayat_br0o