ثواب 💜 ( روايات ليبية ) مكتملة

الحلقة 7 💜

ثواب ح 7💜
.
.
محمد : مش منك من هالللبس بس ما عندي ما انقول طالعة قدام بوك 😏
رنا :😠😠😠 كيف تتجرأ اتقول هكيي
محمد : فوتي فوتي خير ما نطرك لحوشكم توا
الام : هيي تحششم على وجك ، سامحيني يابنتي خشي لدار ثواب ( رنا قلبت عيونها على محمد و مشت لدار ثواب )
رنا : كيييف متحملتييه
ثواب : هه عندي منه 3 نسخ ثانية على فكرة
رنا : تعالي عيشي معاي و الله معاناة يا بنت خالتي 😑
ثواب : 😂😂 عطك السلامة تي وين بس
رنا : ندعي عليهم عادي ؟
ثواب : " خفت اهاا منبيهاش تدعي عليهم بالرغم من يلي شفته منهم بس هم خووتي عزوتي او المفروض يكونوا عزوتي هه ": لالا ردي باالك
رنا : تفوو ( حشاكم) على خوت مش مقدرين اختهم
ثواب : الله غالب ، تي هياا ضرب النكد توا نوضي هي نتغدوا
رنا : جيبيه هنا منبيش انشوف خلقت خوك
ثواب : اكيد طلع ، بس تمام تو انجيب هنا الغداء
رنا : تمام نبيك في موضوع ضروري اصلا
ثواب : تم تم .
.
.
في المطبخ 🍴
.
ثواب : ماما سختيلنا الغداء ؟
الام : اهاا
ثواب : ماما عيب محمد يتكلم معاها هكي
الام : الله غالب يابنتي معش نقدر نربي توا
ثواب : كله من بابا الله يسامحه 💔
الام : شيلي الغداء قبل لا يسقع ثواب : بنتغدوا في داري تبيش تطلع هي
الام : تمام بنمشي نقيل انا
ثواب : تمام نوم الهناء ( خدت السفرة و مشت لدارها لقت رنا مقعمزة تفكر )
ثواب : فيش تفكري ياحنة ؟! 😕
رنا : تي خليني نعبي بطينتي قبل
ثواب : هي يا مفجوعة كولي ( وبدن ياكلن و كملن شالن السفرة و غسلنها و ردن للدار )
ثواب : هي احكي
رنا : ياحنة الايام يلي فاتن جو خطابة
ثواب : هييي متقوليش انتي؟
رنا : لا لامي
ثواب : مبردك احككي
رنا : هما يقربوا لبابا من بعيد و ولدهم كبييير بيني و بينه 15 سنة تقريبا
ثواب : استوب استوب ، توا انتي تحكي انك مقتنعة ولا كيف ، اولا انتي مزلتي صغيرة و خودي شهادتك قبل الراجل ملحوق عليه و الله و فرق العمر برضو كبير حتى التفكير حيكون فيه فرق
رنا : تي ماهو عارفة و انا قلتلهم سكروا على الموضوع و اصلا ماما من الاول مش راضية غير قلت نحكيلك
ثواب : بغض النظر على انه كبير و هك بس انتي صغيرة و الحياة قدامك ان شاء الله تاخدي شهادتك و الباقي ملحوق عليه
رنا : ايي و الله هي نبي ناخد قيلولة
ثواب : حتى انا خلاص خلي نظلم الدار قبل
( ظلمت ثواب الدار و رقدن )
.
.
عند محمد ن:
.
.
بعد روح هو و منار ركب لداره و ركبت وراه امه طقطقت وقالت :
احميدة
محمد : خشي خشي
نعيمة : نبيك بعدين اتشيلني لحوش جدك خلاتك اليوم ملتمات
محممد : تمام نبي نرقد لعند توتي روحك
نعيمة : نجيلي وليدي يا ربي يلي مايرفضلي طلب
محمد : هههههه ان شاء الله دوم المدح
نعيمة : نخليك ترقد توا ( طلعت و مشت لمنار ) : ديري كيكة انشيلوها لعت جدك
منار : وافق السيد مالا
نعيمة : اهاا
منار : ماما تعالي قعمزي بنقولك حاجة
نعيمة : شن في ان شاء الله خير
منار : متذكرة شكل ثواب انتي ؟!
نعيمة : اها ليش تسألي ؟؛
منار : اليوم شالني محمد معاه للكلية ..... وحكتلها
نعيمة : يعني !! لشن تبي توصلي ؟
منار تربعت على سريرها: يعني لو محمد يفكر يتجوز مش حتلقي احسن منها
نعيمة : لا بتي مش لدرجة ناخدها لولدي خوتها ما ينطاقوا
منار : شن دخل خوتها بعدين انتي حتكوني انقذتيها منهم
نعيمة : نوضي نوضي الاتراك مأثرين عليك انقذتيها ما انقذتيها
منار : نضت نضتتت هاا ( و مشت للمطبخ )
نعيمة : فرخة آخر وقت
.
.
في العشية :
محمد : حتى انتي متوكلة ؟!
منار : نقعد بروحي مالا ؟
نعيمة : متتعاركوش هي اطلعوا قدامي اطلعوا
محمد: خليني نسخنها قبل
منار : نلبس في كويشي
محمد : بتطولي بنمشي
منار : مش مطولة ها كملت
( و ركبوا السيارة و توكلوا )
نعيمة : احميدة السبت فاضي ؟
محمد : عليش ؟
نعيمة : نبيك اتشيلني انقيس السكر و الضغط
محمد : تمام تو انشيلك
نعيمة : جعلنك ما اتغيب
منار : هيوا كلا منار مهما ادير مااتقوليلها جعنك ما اتغيبي 😢
محمد : توتو عليش الحسد بس
منار : انقني حاسداتك 😂👌
محمد:قل أعوذ بربي الفلق ✋
نعيمة : متقولش هضا محامي و هذي قريب تتخرج
منار بصوت مرا كبيرة : الكبر شين يا بنيتي كح كح كح 👵
نعيمة : عقل ان شاء الله
محمد : حي حي على الزحمة
نعيمة : قول مشاء الله
منار : حتى هن الخلاتي 6 😂
نعيمة : هاها ✋✋
محمد : اجدودي تو بعد بنروح بيكم نسلم عليهم منبيش نخش
نعيمة : تمام
منار : شريني في بنات و نتحشم 😂😂
نعيمة : انزلي و انتي تفترمي
محمد : بنتك بنعزقها عزق و كان نلقى نتبرع بيها بسسس
منار : بعدين نتفاهم معاك مش توا (و نزلوا )
.
.
عند ثواب :
رنا : ثواب عن دا نوووضي
ثواب: شوية 5 د وانوض
رنا : و حق الله لو متنوضيش بنكلم بابا يجي يروح بيا
ثواب : ها ها نضتتت عليك صداع كلا انتي
رنا : ايوا خليك هك من الأول اسمعي الكلام

ثواب: حولي حولي بنمشي نصلي
رنا : صح النوم المغرب قريب يأذن
ثواب : عداتك ماما شكلها
رنا : 😂 الكلام مقتبس من ماما
( مشت ثواب صلت و دارت قهوة ليها و لرنا و امها و قعمزن في الصالة )
الام : شن قرايتكن
رنا : و الله يا خويلة كلا انا كيف قلت بسم الله و الباين ان شور ثواب حيجيب نتيجة معاي
الام : هههههه ربي يوفقكن ان شاء الله
ثواب : وين بابا مشفتاش اليوم
الام: اليوم عرس ولد صاحبة ماشيله
ثواب : خاطري في عرس 😢
رنا : خويلة هضا تصريح غير مباشر من ثواب 😂
الام : لا ياحنة بنيتي مش مستغنية عنها
ثواب : حي علمك عليك يلي تقلب في الدوة 😠 بعدين ما انضني في حد يقبل بنسابة زي خوتي 😷
رنا : معااااك حققق مليون في المية
الام: ربي يهديهم
.يوم السبت في الصبح 🌞
عند محمد :
محمد : هيااا
نعيمة : هيا جييت وانت مستعجل
محمد : ماه بنتكي على الكلية بناخد اوراق قبل
نعيمة : خلاص تو نقيس في المختبر يلي يالا الكلية
محمد : تماام
نعيمة : هي اطلع اني لاحقتك
محمد : السيارة سخنت
نعيمة : يااربي اني طلعت شنو هضاا
..
عند ثواب و رنا
رنا : ياحمارة رديلي البيتة مدخلنيش
ثواب : انتي لولا سيارتكم يلي خربت راه مروحة من الخميس
رنا : توبة مزلت نبات عندك
ثواب : سرعي هيا
رنا : اهو وصلنا ليش مستعجلة
ثواب : هيييي 😍😍😍
.
.
.
#رواية_ثواب
#rwayat_br0o